2016.03.18 - 03.29 鬼佬華佗史密夫，外科手術成日do；醫道仁心口碑重，金刀一亮除病汙。
瞓醒覺，精神好尐，繼續講古。話說：
三月十八日。朝早九點，阿珊、大小姐同我去到醫院，喺櫃檯登記後，就坐定定等嗌名。北岸醫院，似酒店多尐，由櫃檯、牆身、天花裝飾設計，到工作人員服飾，你都睇唔出係身在醫院。更加絕對冇白袍人搭住聽筒走嚟走去。咁樣應該可以降低病人對醫院嘅恐懼。
十點半，接咗我哋入等候病房，情形就好似照胃鏡一樣。等候，係一件好煩惱嘅事，等咗粒半鐘，呢粒半鐘真難捱。十二點，卒之就有麻醉䕶士入嚟。佢驗明正身，辦好手續，用一張好暖嘅氈冚任我。同至愛再次輕輕擁抱，我就瞓喺車仔牀，一路推入手術室。望住家人喺我視綫消失，真係有孤身走我路嘅感覺。
雙掩門推開，手術室前係個窄房，呢度就係麻醉室 Anesthetic bay，唔知點解，手術室都有個好大嘅鐘，而家係十二點半。冷氣好凍，我冚多張暖氈 。
後面門推開，麻醉師橋茵醫生走入嚟。趁門推開嗰一剎那，我望見手術室，其實係一個好大嘅大廳，我見到十個八個着住深藍色手術袍嘅人，正喺度佈置緊手術設備。佢自我介紹，並且解釋佢將會做尐乜嘢，我全部冇異議（可以咩？）。佢喺我右手臂近脈門處打兩支針，先將呢部份肌肉麻痺，就喺呢度揷入兩支針咀，再用膠布固定，以後麻醉針藥就由呢處注入。佢又話，再會喺我鎖骨上照辦煮碗，挿入三支針咀，手術後嘅 PCA 止痛針藥及營養液，就由呢處注入。不過我唔會睇到佢點樣做，因為當我全身麻醉後，佢先至會搞鎖骨呢三針。
原來搞下搞下都搞咗成粒鐘，手術室似乎準備得八八九九，士密夫醫生入嚟打招呼。大鐘搭正一點半，睇住橋茵醫生喺我手臂注入麻醉藥，我就即時冇咗畫面，真係快過打針。睇戲時，麻醉師會叫人數123，我麻醉過四次，冇一次係咁，尐編劇喺咪揾苯嘅呢？
其實，麻醉咗係好舒服，時間亦過得好快。以往三次我醒返，都似瞓醒覺，好舒服。但係今次醒返，就覺得周身唔自在。我記憶第一句說話聽到，就係有人用英文問我痛唔痛，「sore！」我迷迷糊糊咁答。又聽到有人嗌 「morphine」，此後斷斷續續有尐對話，都係 yes no questions，我瘟瘟燉，唔知有冇答錯。冇耐，我稍為清醒，知道全家都喺我身邊，先至知道自己已經入咗 ICU。大少大小姐見我瞓醒覺，又得知情況穩定，就開始講笑，又話唔好引我笑，因為一笑，肥腩就痛。我記得我冇乜點講嘢，只係同佢哋單眼。唔知幾耐，佢哋都返屋企，今晚，我一個人就會喺 ICU 呢度過夜。
而家回帶。個手術可能四點零搞掂，即係約三粒鐘，我就推咗入 ICU，阿珊知道消息，即刻趕嚟，五點半，全家就齊集 ICU 嘞。離開手術室嘅我，經已改造成為一個「差不多無謂人」，腹腔裏面，只剩低唔夠四分一個胃，所以又唔係咁「無謂」喎。本來連接胃部嘅十二指腸，而家同個胃部分離，並且封咗個入口，成為掘頭巷，不過仍然繼續佢接受嚟自肝膽胰酵素嘅功能，幫助消化食物。切一節小腸，一邊連住嗰四分一胃，另一邊就成為十二指腸及小腸嘅三义路口。點解唔直接將十二指腸連接胃部切口，而要搞到咁複雜呢。原來如果咁做，十二指腸嘅消化液就會流入食道，咁就好唔舒服喇。
內裏嘅改造，外邊人睇晤到，不過由胸骨劍凸開始一直落到肚臍嘅一道 6 吋疤痕，就盲嘅都睇到嘞。我左邊身由大髀至頸都貼住一粒粒電極，電線連住監視器，電視就顯示住生命數據：心電圖、心跳、血氧量⋯⋯。右手邊就好似橋茵醫生所講，手臂仲接住麻醉止痛藥，鎖骨就連住營養液 Intravenous Drip （IV）。仲有，肚臍右邊有條管，將腹腔嘅液體帶出體外。右邊鼻哥窿挿住鼻喉，一路伸入喉嚨直達胃部，傷口嘅液體就通過呢支管抽出。
五粒鐘，變成咁，你有乜感想？
今晚，我唔得閒諗尐咁深奧嘅人生哲理，喺嗎啡嘅影響下，如果乖乖哋唔係周身郁嘅話，我都唔算好痛，但係成個人就瘟瘟燉燉，似醒非醒，似瞓非瞓。牆上個鐘指住十點二，係一個 V 字，咁係咪幫我打氣呢？我瞓咗好一陣，掰大眼，個鐘又係 V 字，如是者，瞓瞓醒醒唔知幾多十次，個鐘都係 V 字！我開始懷疑我揩咗嗎啡，出現幻覺，點解時間停頓咗？
我瞓喺 ICU 病房，䕶士枱就喺門邊走廊。䕶士隔住玻璃，分分秒秒都可以望住我，每個鐘頭，䕶士都要埋嚟，有時量血壓，有時拮手指，總之多嘢搞，其實我都唔知自己有冇瞓過！轉頭望向左邊窗簾下透出外面少少光線，都唔知係夜晚定係清晨。一個冇晒時間概念，又唔知瞓到幾時嘅夜晚，原來好難過。
我望住 ICU 嘅走廊，昏暗嘅燈逐漸光起嚟，亦多咗䕶士，係交更嘅時候。哦，黑夜終於過去。此時，再望牆上個鐘，仍然係 V 字。唓！唔係乜嘢幻覺，原來只係一個壞鐘。計起嚟，我攤咗喺 ICU 足足十五粒鐘。
兩個䕶士要喺病人面前做好交接手續，講病歷，打過乜針，食過乜藥，有乜嘢喺當更時發生過嘅事等等，而接更䕶士又會向病人自我介紹。
三月十九日清晨。個天愈嚟愈光，走廊亦愈嚟愈多人。ICU 醫生埋嚟問我有幾痛，原來醫院用 1－10 度，畀病人自己去形容佢有幾痛，此後，呢個 rating，我一日畀人問幾次，此是後話。當時仍然覺痛，所以答「七」。佢可能係麻醉科，或者係 pain management 嘅醫生。佢將我最先做手術前右手臂嘅針咀拆咗，咁即係再冇定時定候供應嘅麻醉止痛藥注入喇，然後係鎖骨處預先裝好嘅針咀，接駁一條管，呢尐就係所謂 PCA 喇（Patient-controlled analgesia）， 個主機鑲喺營養吊針架上面，一支家庭裝牙膏咁大嘅嗎啡針筒（好似小型玻璃膠），就擺喺自動注射器，並且鎖喺透明膠盒裏面。呢個透明盒要用鎖匙，及輸入我手帶密碼先至開得到，每次唧出劑量預先調校，此後，冇人可以擅自更改。醫生畀個控制器我掛喺右手腕，如果覺得痛，我就撳佢一嘢，定量嗎啡就由膠管引到鎖骨入口，經過血管，直達腹部神經，咁就止痛喇。真係好方便。
十點。有物理治療師埋牀，自我介紹一番後就要我起身。各位，此時，只係手術後十幾小時！物理小姐先要我「隊」一劑嗎啡，等個腩唔使咁痛。到落牀時，梗係要費一番周章，我左張龍右趙虎，論論盡盡，終於坐咗喺牀邊高身疏化，又唔係天旋地轉咁差，不個都係 wee wung wung 個隻。原來物理小姐要教我呼吸，佢擺咗一疊雪梨晨鋒報喺我枱面，然後叫我揭一頁就深吸一啖氣，忍住三秒，呼氣，再揭另一頁，如此類推。哦！咁即係深呼吸運動啫。受麻醉藥及肌肉鬆弛藥物影響，手術病人用以呼吸嘅肌肉後墮，而且收縮能力減弱，深呼吸運動，可以幫助清除肺內積水及防止肺氣腫。又因為擴展肺部，令橫隔膜、胸腔腹腔肌肉可以運動，幫助復元⋯⋯。呢尐係常識啫，難唔到我。不過有一樣我唔明，「點解要揭報紙呢？」我問。「係數住你做咗幾多吓！」噓，好彩我冇問點解唔揭澳洲人日報。
物理小姐交低功課，就去第二間房。我鬼咁勤力，成份揭晒，又揭返轉頭，連都唔知佢識唔識嘅「腹式呼吸」、「胸式呼吸」都一一練習，原來真係唞大氣都會頭暈。佢再出現，「乜你仲揭緊？」「你冇叫我停噃。」「我預你做十五分鐘左右。」「⋯⋯」
阿珊嚟睇到我都嚇咗一驚，乜咁快就落咗牀！阿珊坐喺我對面望住我做呼吸運動。
冇事冇幹，就唔再住 ICU ，揭完報紙上返牀就要預備搬房喇。
下午一點。睇我嘅䕶士同埋大隻佬將我推走，牀尾仲放咗大少爺大少奶送嘅花。我住喺五樓南座嘅一間房，窗開向東北，因為地勢較高，風景好到不得了，就算我瞓喺牀都睇到窗外風景，算係咁喇。
我今日當然比噚日啱啱做完手術嗰陣好好多，但係都只不過係廿四小時左右，其實仍然好瘟燉，上咗病房後，阿珊佢就一直陪住我，我就只係攤喺牀，有一句冇一句同佢講嘢，一有尐痛，就自己唧嗎啡，唔使麻煩尐靚䕶士。令我想起以往病人痛到飛起，大嗌「姑娘，好痛呀。唔該打止痛針吖？」尐䕶士四圍䠮，忙到七彩，「等陣喇，忍下先喇。」叫痛聲此起彼落 ⋯⋯。咦，唔知香港醫院有冇尐咁嘅設備？
七點左右，佢要返屋企，又剩低我一支公喇。不過，我唔會太安定，每四粒鐘，就有人入嚟量血壓、探熱，又問你有幾痛。咁上下又入嚟換營養液、嗎啡針等等。其實，我都好難瞓得著，咁多條管喺身，又唔畀得佢哋繞嚟繞去，又要顧住唔好壓到尐傷口，瞓覺招式非常有限，就只得「肚腩朝天」呢一招。
三月二十日。第一個病房夜晚又過去，踏入秋天，太陽愈出愈遲，七點半，窗簾映出陽光，撳鐘叫人幫手打開窗廉，朝陽晨光由窗右角射入，左邊雲端一片紅霞仲未散去。乜真係靚得咁交關！其實，好多日出我都睇過，少年十五二十時嘅鳳凰山，尼泊爾 Sarangkot、喜馬拉雅 Kala Pathar、台灣阿里山⋯⋯，咁呢度北岸醫院有乜咁好睇？唔通經過改造，內裏嘅思維、諗法真係會唔同咗？
太陽出嚟，房外走廊亦熱鬧起嚟，人聲、推車聲，砰碐磅硠， Pantry 預備緊早餐。早餐又冇我分，我喺 NBM（Nil by mouth ），有得聞（睇都睇唔到）冇得食。都係瞓唔着，不過仲可以睇下 iPad ，咁都冇咁悶。
冇耐，又有物理小姐埋嚟，今次佢先要我每5分鐘撳一次 PCA ，等個腩揩夠嗎啡，先至開始落地行。起身坐喺牀邊，都係一番掙扎。企得起身，推住掛滿晒嘢嘅轆架，開步行出走廊。我行咗兩三步，就已經攞返腳踏實地嘅感覺。行走廊？難倒我？南美洲印加古道都行過 ⋯⋯，話口未完，走廊頭行到走廊尾，兩隻腳仔，震過貓王。點到你唔服！震騰騰坐返上牀，今日功課係咁多。
又到黃昏時分。阿珊佢返屋企之前，都會先幫我搞掂個瞓覺架步，確保一切所需物品，都喺伸手可及嘅距離。升降牀、燈光、叫人鐘全部妥當，佢又要返屋企煮飯食，真難為佢。
剩返一支公，就同 iPhone 、iPad 玩喇。成日揩嗎啡，仲係瘟下瘟下，我齋睇唔回應。睇到攰就瞌埋眼，但係始終都瞓唔著。換咗夜間護士，佢地喺昏暗嘅走廊走動，攞住電筒推住儀器走入病房。為咗唔騷擾病人，佢哋唔會開房燈，摸黑幫病人探熱打針量血壓。即刻諗起克里米亞戰爭嘅南丁格爾，拎住油燈照顧傷病患者。我又要好大力咁捽住嚿木，因為我有幸得到高標準、合人道嘅醫療䕶理照顧，但係幸福唔係必然，睇程思華嘅〈地獄醫療逃亡實錄〉，其中提到：大陸醫療毫無「䕶理」觀念，一般病人根本完全接受唔到任何䕶理，家人要照顧病人一切所需，唔止食撒疴瞓，着衫沖涼等生活基礎必需外，仲要照顧埋醫療設備，營養液、傷口護理，都由家屬負責！絕對係魔鬼醫療制度！人哋160年前，已經咁重視專業䕶理，160年後，又話生產力，又話GDP，奢言大國崛起。咁多錢，去晒邊？點解人民要受呢尐苦？
最近同佢講起澳洲、大陸、香港三地嘅醫療制度評價，佢話好簡單，就係天堂、地獄、人間。
要睇思華嘅真實回憶可買呢本書：（先賣廣告）
地獄醫療逃亡實錄 - Jul 3, 2015
作者: 程思華
出版社: 紅出版(青森文化)
定價: HKD $78.00
蔣家受惠於英式政治制度，常懷感激之心。識得感恩，並唔係中國文化獨有，優良人類，不論富貧，就有呢種質素。七十年前香港，蔣家窮到搵個仙刮沙都冇，但係阿媽居然可以喺1947、1949 及1955 三年，喺贊育醫院（西邊街舊贊育），接受剖腹手術，令我及兄姊得以寄生呢個塵世。唔係話英國政府畀錢香港（雖然係喺1922年，由倫敦會傳教士所創立），嗰時啱啱打完仗，英國佬自己都好窮，好唔掂。而係個英式制度，以人為本，紓緩貧富矛盾。喺「各有各世界，各有各搵食」之餘，亦伸手支援弱者，咁樣，社會就和諧得多喇。不如問下神州，一個有質素而又安全嘅剖腹產子手術，今時今日，開價如何？一般蟻民，孭唔孭得起呢條數？
上世紀末，我離開英屬居留地，移居袋鼠國，大半個世紀，得以繼續享受此一制度之福，開心又放心。香港人個個都識講：「得人恩果千年記」，我常懷感恩，實應有之義，唔係一句「漢奸走狗」，就可以抹煞一個人嘅生命軌跡。我而家喺袋鼠國醫院病牀上寫嘅，就係我親身嘅感受。
三月二十一日。噚晚，已經少咗瘟瘟燉，但都係瞓得唔好。呢排，尐䕶士成日問我放咗屁未。南丁格爾唔講「發」咁粗魯，講「 passing wind」。咁就斯文得多嘞。原來有得發，係表示個消化系統正在復元中。唔講唔發，哈，一講就發出嚟喇，上午七點： 1st fart， yeah！我四圍話畀人聽：「我發咗喇」，「Wow, that's good」個個笑住同我講。各位試下同人講發咗，睇下得到乜嘢反應。
都只係手術後嘅第二日，傷口嘅痛，喺 PCA 嗎啡嘅控制下，經常保持喺 3 至 5 度之間，絕對唔算難受。最困擾嘅係條鼻喉，佢由右邊鼻窿經咽喉、食道，直入胃部，主要用嚟吸取傷口嘅分泌物，鼻喉外面連接一個盛載袋
，喉上面有個分义口，䕶士經常用針筒喺呢度抽出分泌物，然後記低抽出幾多分量。如果抽到好多，即係表示分泌物堆積喺度郁唔到。如果愈嚟愈乾，即係話分泌物識得向前行，咁表示個系統正在工作中。而家我條鼻喉已經愈嚟愈少嘢抽到，窈窕尐嘅靚䕶士有時都晤夠力掹個針筒！咁係好事嚟嘅！係就係，條鼻喉幫緊我，大家諗下，每次吞口水，我都感覺條喉存在，瞓低尤其辛苦，有時佢會惹到你咳，仲死。一咳，個傷口可以痛到 7 至 9 ，咁點瞓得安樂？
物理小姐又嚟，今次起身落牀都爽手好多，推住個架行出房外，已經冇話暈陀陀，簡直只係一件餅。物理小姐跟住我行咗個匝，見我冇乜問題，就去下一場，我見行得咁過癮，點會畀佢停，一於兜住走廊係咁行。初初見到人都笑吓打吓招呼，一次兩次三次n次，再見到，微笑就算喇。我諗，咁樣行嚟行去，唔知會唔會阻住人做嘢呢？如是者，卒之行咗半粒鐘，見肚腩有些微感覺，又係時候收工上牀喇。
如常，攤喺牀上都唔會十分安靜，靚護士咁上下就會嚟招呼你。我鎖骨揷住嘅喉管，係可以喺嗰度抽血，抽血時只需擰螺絲駁住針筒即可，我完全冇感覺。對比以前，餐餐要喺手臂、手指拮針，現代醫學，真係造福人群。
阿珊佢返屋企後，又係我獨自胡思亂想嘅十幾粒鐘。
三月二十二日。瞌下、醒下， mee mee more more 又天光喇，第三個病房夜晚，咁又過去。已經可以自己落牀，第一件事企起身，睇下自己尐喉有冇打晒 kick ，然後掹咗揷穌，咁你就可以推住個架四圍走嘞。首先執返好間房，將枱仔推返去窗邊，降低返張牀⋯⋯等等，自己刷牙洗面都冇問題。
噚日行得咁過癮，今日繼續行，而且開咗個 sport tracker，紀錄下時間距離都好噃。我推住個架。行行重行行，卒之，我用一粒鐘行咗 2.3 k。今日比噚日行得耐，靚護士度度都見到我，又要收慢腳步，又要因住會 kick 倒我，都唔知好嬲定好笑。
今日照顧我嘅係男護士威廉，佢生得高大，可能慣喺群雌粥粥，連自己乸乸哋都唔係好覺，佢好有能力，有佢照顧，我好放心。
今日係大日子，噚日史密夫醫生嚟巡房，決定今日可以拆除兩條喉：鼻喉同埋尿喉。所有喉管都係喺麻醉後揷入身體，而家拆除，只須企喺度就得嘞。拆呢兩條喉，嗰種痛嘅感覺都好難受，當然拆咗之後嗰種舒暢，亦係不可言寓喇。噓⋯⋯舒服晒。
冇咗鼻喉，靚仔返晒，仲可以大力洗面、擤鼻。冇咗尿喉，咁就要去廁所喇，䕶士叫我記住，當有第一篤尿，即刻向佢報告。冇咗尿袋，個架都輕尐，推起上嚟又輕鬆尐。
下晝，凱莉䕶士嚟探訪我。記否？佢係我哋第一次見史密夫醫生同時出現嘅人物。凱莉䕶士係一個聯絡人，係以獨立身份介入呢件事，唔會偏側於任何一方，佢聯絡所有有關專業：手術、麻醉、醫院⋯⋯等，並且監察服務質素，確保病者得到合理水平嘅服務。澳洲醫療，我又要感恩一番喇。
下午四點十分，望穿秋水嘅嘢終於到嚟，買細開細， 1st pee 終於出現，即係話拆尿喉之後一切正常。咦，望穿「秋水」，而家就係秋天，真係應景。
如常，佢返屋企之前，又幫我搞好個竇先。七點鐘，又剩返我一個人，面對漫漫長夜。黑夜，係思想跳躍嘅地方，愈係孤獨，思想跳躍得愈快、愈古怪。
我個人冇秘密，我將我全真嘅經驗擺出嚟，唔覺得係乜嘢一回事。好多人話我樂觀、正面，其實我只係面對現實，事件會走向邊度，人力焉能控制？唔係你好樂觀咁想中六合彩，你就會中，你悲觀你樂觀都冇用，完全唔影響結果，因為仲有好多，我哋不能控制嘅因素影響緊件事。周潤發〈我愛扭紋柴〉開場就講：「既然笑又要騎，喊又要騎，咁梗係笑騎騎着數喇。」生命一日一日咁流逝，一日嘅悲傷，就減咗一日嘅快樂，何苦？不過，我只係普通人一個，針拮，我會痛；醫生話我有尐咁嘢，唔通我會笑咩？周潤發阿媽已經入咗三毫子落木馬氹氹轉，機器已開動，亦唔可以暫停，痛楚過後，悲傷過後，就要快尐騎上木馬，仲要笑住咁騎，「笑騎騎，至着數」，唔係，好快氹氹轉又夠鐘，想再騎都冇得騎。木馬，再入三毫子可以玩過，人生呢個氹氹轉，入幾錢可以再玩？周潤發話呢尐係三毫子哲學，我信到十足。
識我嘅人，都知道我毫不隱藏，我從來唔係努力用功讀書個隻款，因為咁最舒服，之所以哎唷都順順利利，要大大力捽木，運氣係最大元素。歷史上好多鬥士都好大劑：秋瑾、陸皓東，你想做邊個？仲有，嗰尐傑出乜乜，傑出物物，全部都要慘過梁天來至可以入選。1991年，羅富國師範生斌仔跳彈牀導致全身癱瘓，二十二年被困輪椅，全城叫佢做生命鬥士。我諗（估吓咋）如果有得揀，佢會寧願一世做CM仔，都唔會揀做鬥士囉。
蘇軾話：「人皆養子望聰明，我被聰明誤一生。 惟願生兒愚且魯，無災無難到公卿。」一千年前嘅說話，到而家，仍然有效。
睇咗一篇文，教徒唔啱睇。佢話碳元素，唔會出現喺原生形成嘅星體表面，而會壓係地心。不過星體爆炸後，釋放碳元素，太空中，碎片再次聚合，第二次（or 第n次）再次形成星球，表面就可能會有碳元素。地球所有生物組成都含碳，即係話，我哋身體所有元素，曾經都係星塵 star dust，我呢個身體，就係星塵既聚合物。唔理真假，咁已經好浪漫。「鬥士」就冇我份嘞，有機會就喺呢個二手星球四圍遊，回復星塵本色，於願足矣。
夜晚瞓唔着，思路果然活躍。
三月二十三日。手術後第五日，少咗兩條喉，真係輕鬆得多，今日推住個架，一粒鐘行咗2k半，似乎愈行愈順，連肚腩都冇乜痛。行行下見到史密夫醫生，咁就順便喺走廊當巡埋房，佢見我行得走得，睇埋䕶理報告，即刻決定再進一步，聽日會幫我做個 Blue Dye Test。
病房習慣早上沖涼然後換過新袍、新牀單等。記得喺病房第二日，已經畀人摷起身沖涼。因為成身都係喉管，冲一個涼，實在非常論盡，不過，佢唔會「幫你」冲 shower you，佢會「幫你忙 」assists you。嗰日，我揸住個花洒都唔知淋邊度，「尐傷口濕唔濕得水？」我問。䕶士話，邊度都得！卒之，我攞住花酒，由頭淋到落腳，各位，第一個沖涼，只係離手術唔夠48小時。
今日呢個涼，我已經可以自己搞掂，毋須幫忙。活力好咗，精神亦好好多，傷口嘅痛用 PCA 完全可以控制。我諗，而可都可以見人喇。前幾日，我拒人千里，非常唔好意思，而家有人想傾下偈，無任歡迎喇。
晚上就收到越洋電話，真開心。
三月二十四日。又一個大日子，Blue dye test。係乜嚟？而家我個上消化道有三個傷口，傷口用線連住，就等肌肉自己埋口，喺佢埋口前食嘢，食物就會滲入腹腔，引致發炎，好大劑哩！咁我哋點知佢埋晒口？今日一早，靚護士攞咗支染料嚟，原來只不過係用嚟染啫喱嘅食用顏色，藍色最易睇，所以用佢。用一杯水開，成杯嗗晒落肚。我腹腔仲有條管，如果系統有滲漏，腹腔呢條管就會見到藍色液體。
飲咗染料就只有等，我邊等邊行，今日喺病房走廊又行咗三公里。每次我經過靚䕶士身邊，佢都望下條腹腔管。冇耐，我行完，又冲晒涼，就坐定定睇住條管。咦，我忽然見到管裏面有陣陣幽幽嘅淺藍色！吓，唔通漏水？我叫靚獲士嚟睇，佢話如果係漏水，顏色會好深色 ⋯⋯ hang on ，原來條管有條綠色綫，就喺管內透出幽幽藍色，並唔係滲漏，佢話，測試合格。即係話，個系統預備開工。開乜嘢工？飲食囉！
跟住就係將最後嗰兩條管拆埋：鎖骨上嘅管，所以再唔使吊營養液，拆埋 PCA ，就唔使揩嗎啡，如果痛就食必理痛喇。呵，我而家係個釋放出嚟嘅自由人， Kin Freeman！靚䕶士真醒目，即刻攞盒蘋果汁過我嘆，整乜鬼咁好飲。
又咁啱，有營意師來訪，佢好似好忙咁，畀咗疊紙我，再略作解釋就走咗喇，無非都係小食多餐嘅道理，常識嚟啫。我星期二會再見佢一次。
䕶士已經通知廚房，晚餐預埋我嗰份。我個胃細咗咁多，又啱啱至瞓醒開工，有幾日嘅餐都係 clear fluid meal。呢一餐:
Beef Consommé
Apple juice
Orange juice
Jelly
Mango sorbet
Coffee or/ and tea
西餐寫到好巴閉，其實除咗牛肉湯外，其他都係一盒盒嘅預製食物。不過冇食咁多日嘢，乜嘢都好食喇。總之甩晒尐管，唔使推住個架，享受自由再臨嘅感受喇。此後幾日嘅三餐都係大同小異。如果醫院食物都只係咁，我嘅三餐應該唔難服侍。
三月二十五日 Good Friday。因為門口個 NBM 牌已經冇咗，每朝六點零就有人敲門，問你咖啡或茶，我其實多數一般飲品都係冇問題嘅，不過都飲清尐，我會要杯清茶。
冇晒喉管，梗係瞓得舒服尐，又瞓唔瞓得着呢？又真係一樣：唔係幾好瞓。
早餐過後，第一日唔使推住個架。今日假期，成層樓都好靜，窗外望落多層停車場，都係小貓三四隻。真奇怪，假期唔使病嘅咩？
今次靚護士又有要求，如果開到大便，就通知佢，「you want to see it？」我問 ，「No, just tell me 」。又到英文題，買大，南丁格爾會點講？叫 open bowels。果然開大，第一個 poo 就係中午開出，個系統走上軌道喇。
今日喺走廊一粒鐘行咗 3.78 km，唔使推住架，梗係零捨自由自在。慣晒嘞，行完就沖涼、換牀單，跟住就 hea 住等阿珊嚟陪我。
三月二十六日。
噚日輕裝行路，好過癮，今日行行吓，唔覺意行咗過隔籬醫生 suits，原來由病房穿過電梯大堂就係醫生房。丫型走廊兩邊就係各個專科醫生嘅房間，會議室、接見室，走廊頭尾就有兩個大客廳。今日假期一個人都冇，嘩，呢度好行得多，我一粒鐘行咗5.78 Km，好舒服。
今日下晝，要移除最後一樣釘喺我身上嘅嘢。三月十八日，手術過後，醫生要將劏開咗嘅肚皮縫合，醫生由肚腩底部縫起，外面見唔到綫，再喺開口處加上黏貼劑（萬能膠？）為左加固表皮埋口，就再加上類似釘書釘嘅 clips ，我肚腩就有21粒 clips, 再冚上防水 dressing ，就可以推出手術室。
而家瞓喺牀，打開個肚皮。靚䕶士一手執剪鉗，一手執夾，開工嘞。先將釘書釘由中間剪斷，再逐一掹出兩頭，咁又唔係好痛嘅，畀針拮咁喇，不過要連拮四五十下，有時仲要搖下至出得嚟。噚日耶穌受難日，我無意同上主相比，當然亦係蚊髀恐龍髀，冇得比。少少苦楚等於激勵喇。
好嘞，靚護士終於還我一個清白之軀，只剩下一道永不磨滅嘅傷痕，長留肚腩，作為歷史印記。
呢度處理傷口嘅方法，同我固有觀念好唔同。我哋一定要將傷口冚實，以防污染。喺呢度則盡量打開，等佢快尐乾乾爽爽。就算我最大嘅傷口，第二日，已經將防水膠貼撕出，沖涼時仲可以直接用花洒沖洗傷口，抹乾之後，冇遮冇掩，着上袍就算數，有時有傷囗滲些少血，亦只係用膠貼仔求其貼住就算數。個道理就係傷口打開、乾爽，就快尐好返。我諗，如果污染得緊要嘅地方，細菌亂飛，冚唔冚傷口呢？
三月二十七日。今日一早換班，䕶士阿拉臣嚟嚟照顧我，房個白板仔 your plan of care 一欄寫住： Monitor Wound，即係已經冇乜好做喇。阿拉臣對我講，你好似渡緊假喎，咁嘅假期，邊個想要？
早餐有些少驚喜，居然有隻復活蛋。叫做食咗三日 fluid meals ，又奶又朱古力又啫喱，夜晚仲有些微肚瀉，不過係OK嘅。洗面時照下鏡，真係瘦咗。
天氣好差，大小姐去教會前嚟陪咗我成粒鐘，兩父女都係噏得嘅人，佢講佢教會、工作、學校、男朋友。我就講葉繼歡、張子強⋯⋯ 。我發覺佢都好鐘意聽香港掌故。講古仔，我得喎。我地天南也北，非常暢快，本來想同大小姐行出醫院散下步行，點知落起大雨，行唔郁。咁啱，史密夫醫生嚟巡房，佢見我咁嘅款，就決定趕我出院，我梗係想往耐尐，起碼傷口都有人睇住吖嘛。再者，營養師要星期二至返工，希望出院前再見一見佢。好嘞：二月二十九日星期二出院。
今日以為有街行，點知大雨滂沱，行不得也哥哥。
三月二十八日。今日居然改 meal plan , 我升呢改食 soft meal，今早有炒蛋，粗麥皮。可惜胃口唔多好。行完走廊仲唔停咁打開思噎，要食粒丸仔至搞返掂。午餐時，胃口返返嚟，居然成個餐搞掂晒。又係嗰句，慢慢嚟，點到你急。
最後一日留宿醫阮，聽日就返屋企喇。十八號入院做手術，十九號喺 ICU，二十號上病房，二十九號返屋企，總共頭尾十二日。你睇我飛時卜，部落，寫得輕鬆，其實，一個月嚟，心情跌宕，七上八落；夜闌人靜，思潮起伏，其中心緒，如人飲水，冷暖自知。
當我需要支持，至愛就千里迢迢飛返嚟，夙夜憂嘆，無微照顧，佢仲唔係上天派嚟照顧我嘅天使？新抱仔、一對仔女，佢哋都周身唔得閒，一有時間，即刻嚟陪我，慌死我悶親。雖然憂心忡忡，但係經常掛住笑面，喺佢地身上，我強烈感受到一代一代延續落去嘅巨大動力。
當然大大力多謝咁關心我嘅各方好友，飛時卜、電郵、whatsapp⋯⋯ 不時慰問，感激不盡。親移玉步，大駕光臨既老友，天南地北嘅閒談，正正係心緒鬱悶嘅靈丹妙藥，助我紓愁解困，再三頓首喇。
借程思華詩一首：
鳥鳴林茂碧雲天
牀畔花妍艷色鮮
摯友盈門頻訊問
守䕶有神勿藥沾
到我嘞。原來今年係「問我」四十周年，黃霑已經作古，我借佢嘅歌詞表心聲：「面對世界一切，那怕會如何，全心保存真的我」。乜嘢係真我？大家知喇，「訪名山，渡大川，尋幽徑，探古城。」簡單尐就係：有得玩就玩，食得幾多得幾多。咦，下個 trip 幾時出發呢？
Anyway 我真真確確相信我係到達人生另一階段，咁就揀左 The Byrds 呢首歌：
"Turn! Turn! Turn!" ---- The Byrds
（ to everything there is a season）
**** To everything - turn, turn, turn
There is a season - turn, turn, turn
And a time to every purpose under heaven
A time to be born, a time to die
A time to plant, a time to reap
A time to kill, a time to heal
A time to laugh, a time to weep
**** To everything........
A time to build up, a time to break down
A time to dance, a time to mourn
A time to cast away stones
A time to gather stones together
**** To everything........
A time of love, a time of hate
A time of war, a time of peace
A time you may embrace
A time to refrain from embracing
**** To everything........
A time to gain, a time to lose
A time to rend, a time to sew
A time for love, a time for hate
A time for peace, I swear it's not too late!
**** To everything........
再噏過
嚤囉
PS
當然要多謝史密夫醫生仁心仁術，程思華又一詩：
鬼佬華佗史密夫
外科手術成日do
醫術仁心口碑重
金刀一亮除病汙
