我又噏，雪梨七日鮮；話之佢，世上已千年。
坎培拉國會留影
柯拿，大家好
天氣反常，唔知係 El Niño 抑或係 La Niña ，總之亂晒大籠。由舊年夏天開始，山火季節變成水浸，雪梨常見嘅藍天白雲，要好好彩至見得到。經常都係陰陰天，日日晴雨不定。呢個星期日開始，仲連續橫風橫雨冇停過，星期一星期二，仲打風咁嘅天氣。原來有個低氣壓，由海面形成，抽取大量水氣，移入陸地，變成狂風大雨，仲死在幾個人。雪梨咁嘅天氣，真係少見，唔通預示尐乜嘢？
天氣係咁，人又係咁。四個月來，我都寫唔出一篇嘢。五年來，未之有也。原來懶人，真係好多藉口。而且尐藉口，真係可以說服自己繼續懶惰。死唔死！
難以預測嘅，何止係天氣，人生無常，佛家都咁講喇。我由一個考親試都肥佬嘅懶學生，烏啄啄做咗十幾年人之患；廿幾年前飛越重洋，嚟咗南半球，不知如何，拎起鎚仔做補鞋佬，一做，就做咗廿幾年；一年前，半推半就，無端端，到達咗一個神秘境地，我真係唔知，我而家實在係退休吖，抑或半退休？失業吖，抑或半失業？忽然間，又唔知點解，竟然會揸起旅遊小巴，做起導遊嚟？⋯⋯，經歷半個世紀嘅人生，古靈精怪，有邊樣嘢係自己一早安排？命運，點到你估？
學莊先生話齋：依乎天理，因其故然，點到你強求？
講起世事難料，三月份，一行十一人，相識咗半世紀嘅老友，組團到訪，仲唔嫌屈質，住晒喺蔣家茅蘆。講過好多次，袋鼠國，地處世界邊緣，邊度嚟都咁鬼遠，水腳又貴，好難有人嚟探望。哈，一係冇人嚟，一嚟就成棚人，咁仲唔係估佢唔到咁難得咩？
朋自遠方來，焉可求求其？拍晒心口，將茅蘆打扮起嚟。先執好三間客房，再將樓上 rumpus area ，用貯物架間成一間臨時房。咁，四個家庭，各有自己小天地，係咁意多些少 privacy 咁話嘞。當然要多謝袋鼠國好友相助，唔係，邊得嚟咁多牀鋪枕頭呢，又？
接機記
五月三日，租咗莫老細架十四座，直踩雪梨機場。故人相逢南國，個個開心到手舞足蹈，差尐冇哭成淚人。互相端詳一番，隨即登車，開展第一日行程。話時話，一班人，一齊坐晒一架大車去玩，梗係過癮好多。成架車嘈到拆天，咁就預咗㗎喇。
La Perouse ，離機場十幾公里，係我哋雪梨遊嘅第一個景點。 1788 年1月26日，菲臘船長率領第一艦隊 the First
Fleet 共11艘船，帶領官兵、自由移民及放逐囚犯，共千幾人，登陸雪梨植物灣，昇起第一面英國旗，打開歐洲人移居澳洲嘅新的一頁。原來咁啱，當時亦有一隊法國艦隊，駛入植物灣，可惜天氣關係，法國佬損兵折將，雖然勉強登陸，見到英國佬人多勢眾，並已昇旗宣示主權。盜亦有道，法國佬就退出植物灣，開船歸國也。當時艦隊指揮，就係 Lapérouse 船長。識英雄，重英雄，呢一個地區，亦因以為名。哈，如果法國佬早嚟幾日，澳洲就可能係法國殖民地！歷史邊有如果，不過就係充滿偶然。
除咗歷史之外， La Perouse 梗係靚，企喺岸邊，睇晒成個植物灣，沿古老木橋行過 Bare Island 土著保留地，涼風海浪侵蝕岩，風光如畫，成班友忘記搭機之疲，四圍影相，不在話下。
跟住車去 South Head 自殺崖，睇埋 邦大海灘。呢一日，係耶穌受難日星期五，邊度都唔使去，返歸食其海鮮餐可也。
好彩蔣家茅舍雖然家徒四壁，地方都唔算太細，住多四家人，大家張張就就，都算過得去。夜晚閂埋門，張家打鼻鼾，李家都唔係幾聽到，係咁上下喇。
一棚人出外旅行，紀律好緊要，話幾點起身，就唔可以「但願長醉不願醒」。一早醒來，各家人已經自己郁手整早餐，都係簡單嘢，咪就係：「牛油麪麭烘多士、煎蛋火腿咖啡茶」。食完梗有嘢跟尾，就係⋯⋯人生緊急事。雖然得嗰三個洗手間，朝早洗漱，每日大小事，一一要喺呢粒鐘搞掂。大家好合作，快手快腳，出發時間一到，已經裝好晒身，企喺茅屋前集合，一聲令下，撻匙開車走人。
首都遊
嚟澳洲，冇到過首都，始終係未夠圓滿。好多人搞錯，以為雪梨係首都，其實，首都係坎陪拉。
1901 年，澳洲六個自治英屬殖民地協議成立聯邦，自此，澳洲嘅正式名稱係 the
Commonwealth of Australia，（但仍然奉英皇為君主，到 1978年為止，英國國歌天祐我皇仍然係澳洲國歌。）咁首都喺邊度呢？我哋雪梨同南面墨爾本就爭餐懵，正所謂：「鷸蚌相爭，大家冇份」。咁呀，兩個都冇，就喺兩個城市之間，搵笪地建都，而且聲明：新首都至少離開雪梨同墨爾本100 英里。1908坎陪拉就橫空出世。今日，我要揸三個幾鐘車，行三百公里，至去到首都，原因就係咁。
一早出車，去到坎陪拉已經係午餐時間，好在有尐旅行社背景，沿途已經打電話訂餐，一入城就有得食，慳返唔少時間。食罷拍拍籮柚，起程去國會山，參觀聯邦議會大樓 Federal
Parliament House。參觀聯邦議會係免費嘅，如果湊啱時間，仲有免費導遊。不過泊車就要錢，都係三蚊一粒鐘。泊兩粒鐘車，乜都睇晒喇。
澳洲議會 the Parliament of Australia 係英式西敏寺兩院制，由上議會 the Senate，及下議會 House of Representatives
組成。上下議會議員都係百份百，一人一票產生，每次聯邦大選，所有選民都知道勝出大選嘅黨魁，將會成為總理。如果選民唔鍾意呢個人做總理，選民根本唔會投票畀呢個黨。而家有人話畀你知：澳洲嘅總理都唔係一人一票民主選出啫，你認為佢真唔知，抑或想搵你老襯呢？！
一入大樓，就係大宴會廳。樓上亦有展覽空間，都係值得行下嘅。當然最重要，就係兩個議會開會嘅地方。上議會閂咗門睇唔到，下議會入口牆上，掛咗英女皇，同埋歷任總理嘅油畫。我當然盡地主之誼，介紹一下，我所知嘅歷任總理嘅尐尐逸事。穿過走廊，走入會議㕔上層旁聽席，成個會議廳一覽無遺。繼承英式西敏寺政治，下議院議事㕔用綠色座椅（上議會紅色），有一個說法，話以前染成綠色比較平，係平民嘅顏料，因此用綠色嚟比喻平民代議士。每次開會嘅情形，除咗親身入嚟會議廳嘅人睇到外，電視亦即時傳送，一眾議員嘅一舉一動，就喺全世界眼皮監視下。人民手中握有選票，議員嘅政治生命，就操控喺一人一票之下，議員有乜閃失，佢阿爺都幫佢唔到，況且，呢度亦冇「阿爺」呢個角色
行出大樓，外面就係廣場同水池，回望大樓，頂部就係全城都睇到嘅四柱旗桿，唔講唔知，呢支國旗廿四七，只昇不降，如果吹爛，就直接換過支新嘅，永遠不設下旗，果真日不落國也。國旗下就係國?ﾼﾌ國?ﾛﾾ兩邊，左面係袋鼠，右邊係鴯鶓，點解用呢兩件動物嚟代表澳洲？當然因為佢哋係澳洲原生動物 native
animals，更重要嘅，一般人認為呢兩件嘢淨係識向前行，而唔識褪後，即係代表一往無前，咁解嘅。而澳洲國歌 Advance
Australia Fair, 亦顯示向前邁進嘅精神。
由國會山呢邊，向前跨過
Burley Griffin 人工湖（佢就係坎陪拉嘅設計師）， 再極目前望，就係對面山 Mt. Ainsile，山腳就係我哋下一站：澳洲戰爭紀念館。時間有限，各人擒擒青乜都影一餐，跳上十四座，又趕下一場。
過橋穿越澳紐軍團大道，盡頭就係
Australian War memorial museum。以為復活節假期會休館，好彩照常開放，已經成四點鐘，時不宜遲，速速入去參觀。
澳洲殖民地時代，打仗都係英國軍隊，咁樣唔算數。直到1901年成立聯邦，至有自己嘅澳洲人身分。澳洲又地處世界邊皮，咁鬼遠，邊有人得閒嚟打仗？所以當全世界打到七彩之時，澳洲本土仍然非常安全。最巴閉就已經係第二次世界大戰，太平洋戰爭之時，日本仔派飛機轟炸過最北端嘅達爾文港，又派過兩艘偵察潛艇，潛入雪梨海港，最終畀人發現，葬身雪梨外港，殘骸至今仍然留喺原地。澳洲境內「戰爭」，就僅此而已。
澳洲參戰歷史，第一次，亦係最重要嘅戰役，當數歐戰：1914年，第一次世界大戰爆發，澳洲離歐洲冇雷公咁遠，真係關卿底事。袋鼠國啱啱立國十幾年，好似而家支國歌話齋： ⋯⋯ for
we are young and free⋯⋯。而家英國大佬開到聲，作為英聯邦嘅一員，就趁機顯示一下，以澳洲名義，參與世界事務，喺1914年11月，同紐西蘭聯合組成一個軍團，就叫澳紐軍團，Australian and New Zealand Army corps 簡稱 ANZAC。
1915年，澳紐軍團接到任務，要打通土耳其接連歐亞大陸兩個海峽，目的要放俄國戰艦出黑海。當時澳洲仔烏啄啄，對戰爭嘅殘酷一無所知，仲以為好快打完仗，可以返屋企過聖誕。好多年青人都踴躍參軍。當時參軍嘅年齡係18歳，有不少唔夠秤嘅，報大數去參軍，後來得知，細到十二歲都有。又因為係第一次以澳洲名義出戰，政府都揀晒尐高大靚仔，唔好失禮國家。
澳洲初立國，邊識打仗？澳紐軍團接受英國將領指揮，1915年4月25日凌晨，澳紐軍團登陸土耳其加利波里半島西岸，點知英國將軍烏啄啄，當時又冇GPS，原來揀錯海灘。澳紐軍團上咗岸至知大鑊，海灘三面都係高山，又攻唔上，又無險可守，唯有掘戰壕捱打。如是者打咗8個月，無功而退，後來有軍事家認為，此一戰伇對大戰勝負毫無關係，咁即係話呢二萬六千個澳洲傷亡，真係夠晒寃枉。話雖如此，澳紐軍團，加利波里之役，係建立澳洲人身分嘅碑石，每年4月25日澳紐軍團日，定為公眾假期，全國各地都高規格舉行紀念活動，所有商場上午閂門，方便市民參與有關活動。今年係100週年，儀式更加隆重，就喺預期之中喇。
一定要拉開講一筆：而家由中國大陸嚟嘅人、華文傳媒，提到ANZAC day，一定叫澳「新」軍團日，咁係大錯特錯！其實，1911年前， 同清國建交，及之後同民國建交，New Zealand 係繹成「紐」絲綸、「紐」西蘭。到1972年同中共建交，中共有鋪改人名嘅癮，將紐西蘭改成新西蘭。不過，無論之後點改都好，喺1914年，「新」西蘭並未出現，咁，何來澳「新」軍團呢，唔該尊重歷史。再講，我住喺雪梨，呢個名已經叫咗成百年，無端端變咗「悉尼」，真係非常勞氣。可惜呢件嘢，財大氣粗，佢可以叫你「弗吉尼亞」，仲指揮、教育十三億人一齊叫，你點夠佢大聲？好無奈。（知嗎？「弗吉」，就係不吉。唔吉利？邊個會鍾意咁嘅名！）
喺戰爭紀念館，得嗰唔夠一粒鐘時間，點睇得晒？四點45分收館，正在離開，只見人群聚集喺露天紀念廣場，原來4點55分，有個Last Post Ceremony，我哋果真榮幸，可以參與其中。首先五組遺属致送花圈，唱國歌，退伍軍人致辭，風笛儀式，最後號角手吹奏安息號以慰軍魂。儀式簡單而莊嚴，好感動。
誤打誤撞，睇到好嘢，我哋認真夠運。離開紀念館，仲有些少時間，開車去 Lake Burley Griffin 遊一遊，嗰度有個 Captain
Cook Memorial Jet，平時下午兩點至四點噴水，水柱可高達147公尺，最近水泵維修，冇得睇。喺湖邊食薯片，亂噏廿四，快樂得很。
趁天未黑，車去坎陪拉唐餐館，食個唐人晚餐，個餐都唔錯噃。食到天黑，馬上驅車返雪梨，交通順暢，黑夜飛車三百公里，十二點前返到屋企，咁又一日。
雪梨市
噚晚雖然好夜瞓，各位仍然保持旺盛鬥志，一早起身，遊覽雪梨市去也。雪梨，點計都係澳洲第一大都會。1788 年菲臘船長登陸後冇耐，就睇中雪梨港灣，呢邊居住環境，比植物灣優勝。所以，好多澳洲重要嘅早期歷史建築，喺雪梨市中心區都搵得到。
雪梨必到景點，當然喺皇家植物公園裏面嘅麥覺理總督夫人座椅 Lady Macquarie's Chair。麥覺理係第五任總督，在任11年（1810 - 1821），佢為澳洲由一個放逐囚犯嘅地方，逐步發展成一個自立嘅國家打好基礎。據說，麥覺理夫人 - 阿麥太，佢好鍾意由總督府步行到呢個小半島，坐喺沙岩上，對住雪梨港口，望住由英倫駛嚟嘅船，以解鄉愁。麥督知道後，就命囚犯由總督府修築一條路，直達半島，並且將一塊向海嘅大沙岩，雕鑿成一張大座椅⋯⋯有咁嘅老公，都算係咁喇啩。
呢度係旅客嘅必遊，並唔係完全因為麥生麥太嘅恩愛故事。由座椅位置行去西面海邊，雪梨大橋同雪梨歌劇院就喺眼前，而且角度，大細比例適中。個個都喺呢度影返張相，以誌曾到袋鼠國一遊。再擰頭向左面抬頭一望，雪梨塔就喺商業中心高樓群中矗立半空。用廣角全景相機一掃，雪梨三大地標：雪梨塔、歌劇院、雪梨大橋，一次過搞掂晒。呢度望向西面，睇日落絕對一流。
如果時間許何，由麥太座椅穿過皇家植物園再行去歌劇院，係一條好輕鬆嘅步行路線。不過，我地冇時間咁做。跳上車，停喺聖瑪利大教堂，九秒九遊埋海德公園，就開車去達令港。今日係復活節星期日，仲驚死搵唔到嘢食。一睇，人山人海，乜鋪頭都開晒，食乜都有。即刻搵間 Aussie 燒烤吧，炸魚薯條、沙律、 potato
wedges、 pizza⋯⋯，擺滿枱，一二三，一齊擦咯喂。
好多大陸人將達令港叫做情人港，大佬，Darling 係第六任總督嘅姓氏，唔係情人喎。達令港好早已經係重要海港，以前有鐵路連接，岸邊全部都係碼頭同倉庫。到而家，好多碼頭、倉庫仍然喺度，不過已經變身成為食肆同酒店。咁有特色嘅地方，我叫大家到處睇睇。點知，吓？走人？去邊？出到雪梨城，點可以唔去鳩嗚？於是，先約好回頭集合時間，再兵分兩路：一隊人殺入唐人街，一隊人攻入QVB商場，血拼去也。
血拼時光，只恨太短暫。唔怕，即刻驅車前往岩石區，再拼江湖。岩石區係雪梨開埠最早期嘅居民聚落，以前起屋，就地取材，就用當地嘅沙岩建屋，遠睇，到處就係一嚿二嚿石頭，所以就叫做 the Rocks 。岩石區旁邊就係海港，同埋環型碼頭 Circular
Quay，亦係運輸重地，所以岩石區到處都係倉庫。而家，好似達令港一樣，倉庫都變成頗有品味嘅食肆、酒吧。一到入夜，呢一帶，衣香鬢影，呢度係雪梨嘅不夜天。以前係貧民區嘅岩石區，其實有另一個譯名：樂士區！及時行樂之士，我鍾意呢個名。
岩石區每逢星期六、日，會封閉部份馬路做臨時市場，賣嘅都係非常有特色的嘅手工藝品，貨品限量製作、獨一無二，所以吸引好多有品味嘅遊人。
岩石區亦著名於佢嘅特色食肆，冇錯嘞，今晚一行十四人，就訂咗路雲堡德國餐廳，嘆其德國大餐。好彩一個月前已經訂咗位。你睇今晚，門口排咗條長隊，冇訂枱 walk in 嘅，梗係要慢慢等咯。我哋大搖大擺行入去，惹嚟幾多羨慕眼光！坐落，飲杯德國啤酒就係指定動作喇，叫咗兩客大拼盤，已經包括有醎豬手，豬牛羊及各式香腸等等一大盤肉，再叫尐蒜茸麭、沙律等，已經係好豐嘅晚餐。台上有現場音樂，食客一邊擦，一邊啤，一邊唱⋯⋯ Edelweiss,
Edelweiss, Every morning you greet me⋯⋯ 。氣氛熱鬧，不枉此行。
飲飽食醉，仲未想歸家。由岩石區穿過環型馬頭，慢慢踱步去到雪梨歌劇院。烏雲蓋月，天氣唔算好，尚幸無風無雨，行得幾舒服。歌劇院、大鐵橋嘅夜晚，又真係別有風味。除咗除夕睇煙花外，我住喺雪梨咁多年，真係好似未試過，咁夜仲喺呢度行街噃。
意猶未盡，車過橋，去到對岸
Milson Point 大橋底，再嚟一個遠眺歌劇院，另一個角度嘅雪梨港夜景，咁咪再影多幾張相喇。好似小學作文：⋯⋯月兒高掛，原來已是萬家燈火的時候了⋯⋯。
藍山遊
雪梨西部三十幾公里處，有一組南北走向嘅山脈，就係藍山 Blue Mountains。留意， MountainS，係眾數，唔係一個山。藍山，其實係成個澳洲東部沿海，北起 最北尖端 Cape York，南達維多利亞最南端，長達3500公里嘅大分水嶺 the Great Dividing Range 嘅一小部分。因為離市區唔遠，絕對係雪梨嘅後花園。嚟呢度行山遠足，更加係冇得頂嘅活動。藍山環境優美，四季風光，各具特色；花開花落，大異其趣。因此吸引不少雪梨人，退休後選擇喺藍山終老。如果有人話：I live in the mountains，就係指藍山嘞。
屋企揸車去藍山主要城鎮
Katoomba , 由連接西部主要幹線 the Great
Western Highway 西行，粒半鐘，乜都到。公路途中，一定見到前面藍山冚住一層層薄薄藍色煙霞，藍山亦因此名之。咁，你又會問，點解係藍色？原來藍山最多就係尤加利樹，樹脂會擴散喺空氣中，因為光線折射，遠睇就見到藍色⋯⋯。如果係專業導遊，就隨即介紹尤加利樹油脂嘅神奇好處，陣間就帶你去買！
一般遊客景點都近住
Katoomba 鎮，三姊妹石離鎮好近，亦係必遊嘅地方，因為遊人眾多，所以約十多年前，起咗一個好大嘅觀景台。而主要嘅旅遊設施、資訊中心、咖啡食肆，都喺觀景台步行之遙。三姊妹石其實係三座相連嘅小石峯，梗係要畀個故事佢：以前兩個部族打仗，為怕三個靚公主畀敵人搶咗，巫師將佢哋變成三個山峯，問你點搶？可惜巫師戰死沙場，咒語失傳，冇人識將石變返做人，咁咪好似而家咁囉⋯⋯。如果有時間，由觀景台行去三姊妹石，來回只需一粒鐘，係幾好嘅短行路線。
我哋企喺觀景台，把握時間，狂影三姊妹，因為，仲睇住一大幅雨由對面山谷掃緊過嚟，半粒鐘之後，橫風橫雨打到嚟，大雨大風大霧，三姊妹石？乜都睇唔到。全隊人安全徹退十四座，本來諗住再去搭吊車，一來，又雨又霧，二來，乜要買套票？玩晒三種車，冇得只玩一樣。咁呀⋯⋯，第日先喇。離開 Scenic Railways，繼續西行，食晏去也。
藍山冇乜現代化發展，保留咗好多百幾年嘅建築物，我哋食晏嘅地方，本來就係一個渦爐工廠，裝修成餐廳時，亦盡量保留原有痕跡，連餐枱都係用以前鐡鑄工作枱造成，好有特色。餐廳後園草地前面就係山坡，極目望，起伏山巒，幽谷叢林，一眼睇晒。咦，而家正係一片青綠，嘩！如果：「秋涼紅葉紅當當、冬寒白雪白矇矇」，加埋「春暖花開花碌碌，夏㷫綠茵綠轟轟」，一年四季，呢度睇景，冇得頂！餐廳隔籬係著名百年酒店 the Hydro
Majsetic，本來想去食個 high tea，一入去，環境太高級，太拘謹，當然亦唔平。等我搵日着埋踢死兔至嚟過。
離開藍山路上，原來都有好多嘢玩。公路同火車路幾乎平行，沿途都見到百年古老火車站。影相佬有興趣影下古董。車停喺路邊，大家走入車站四圍影。喺月台，有尐企，有尐坐，總之扮晒嘢。路軌都唔放過，企喺路軌中間有之，鐡軌上行平衡木又有，忽然 ⋯⋯，叮叮叮，乜嘢聲？閃埋紅燈，吓，兩邊閘徐徐落下。而家知乜事喇，個個9秒 9搶閘而出，咦，有一個搶閘不成，耍跨閘而出，認真狠狽。好彩鐵路局有足夠時間，畀尐百厭星離開路軌，分幾兩分鐘後，一架火車徐徐駛過月台，百厭星嘻嘻哈哈，又上車喇。
回程路過 Laura 小鎮，鎮中心路中間種咗長長一行櫻花樹，賞櫻季節，不能錯過。鎮上亦有好多特色小店，自家製工藝品，家傳古老小玩意，亦有小小家廚、咖啡室，感覺非常地道，花上一個鐘行吓，非常值得。
古怪天氣，一路上又晴又雨。夕陽西下，西邊忽然放晴，果真係東邊落雨西邊晴，一束陽光射向充滿水氣嘅天空，結果就係生成一彎艷麗無比、完好無缺乏嘅彩虹橋，太陽越光亮，彩虹顏色就越鮮艷。好多人都將車停喺路肩，落車影低美麗一刻。我哋梗唔執輸，影埋一份。有幾何，見到咁靚嘅彩虹？
睇完彩虹，問題嚟嘞，咁，跟住去邊？有人想入城血拼，當然冇可能，出到城都閂晒門喇。不如去魚市場。魚市場收得仲早，三點幾都開始洗嘢收檔。不過，睇下一個收咗檔嘅魚市場喇，好過冇。雪梨魚市場，除咗買魚，同埋食之外，其實冇乜好睇。只不過畀尐旅行社吹大，成為必到景點。喺魚市場飲食消費；帶遊客嚟食嘢，好多導遊亦搵唔少，利益所在先至係原因。
由魚市場直接去唐餐館晚飯，都係龍蝦餐尐咁嘅嘢，冇乜特別。餐館飯後有幸運曲奇，香港嚟嘅朋友比較少見，大家睇吓曲奇字條，互相調笑，咁又玩一餐。上甜品，上生果，忽然有蛋糕，仲有煙花一支，原來同我預祝生日，咁有心，多謝晒。趁煙花礔礰拍嘞咁燒，許個願：祈求世界和平！⋯⋯ 係咪玩嘢先？係！梗係喇，心願擺喺心裏面，唔見得光嘅。
中海岸
雪梨係新南威爾斯第一大城，
New South Wales 老華僑叫紐修威。以雪梨為中心，以南嘅海邊區叫南海岸 South coast。以北嘅叫北海岸，只距離雪梨北些少嘅中間一小段，就叫中海岸 Central
Coast。呢兩日，我哋就遊一遊中海岸。並且租咗一晚蓬車假日公園 Caravan Park，渡宿一宵。
中海岸最大重鎮，當數紐卡素，佢係澳洲重要重工業區，亦係澳洲第一大煤輸出港口。我哋無乜興趣睇工業城，不過紐卡素有個公園，養咗不少澳洲原生動物。我成日講，好多人嚟澳洲之前，以為通街袋鼠跳嚟跳去，笑得我吖。但係嚟咗之後，又連一隻袋鼠都未睇過喎，咁又真係有尐遺憾嘅。
Black Butt Reserve 係一個普通嘅免費公園，不過就養咗尐動物畀人參觀，情況就好似香港兵頭花園咁上下。公園由市政府打理，資源有限，日常操作好靠義工幫手。
佢哋有尐收費嘅導賞節目，今日，我就訂咗個「樹熊接觸」Koala Encounter, 按人頭計，每位多謝六蚊。
我哋入去一個有樹熊標誌做背景嘅空間，前面戙咗支人咁高嘅Y字形樹枒。管理員抱咗隻樹熊出嚟，放佢坐喺樹枒中間。隻嘢一坐低，執起身邊樹枝，就一塊一塊樹葉咁食，鬼咁茲味。原來樹熊好鍾意咁樣開工，原因係，為咗獎勵樹熊開工，每次畀人參觀，管理員都會精選尐超靚嘅尤加利樹葉，樹熊非常揀飲擇食，開工有正嘢食，梗制喇。唔好笑佢！人類咪一樣，唔係做乜嘢要返工喎。
除咗介紹樹熊嘅小常識，並且解答提問，最重要梗係同合照。各人排隊逐個出嚟，同樹熊太太勾肩搭膊，影張親密相，嘩，樹熊太太，佢直頭係大明星。話時話，根據本州法例，抱樹熊係犯法嘅，工作人員當然例外。不過樹熊坐喺樹枒，你搭佢膊，咁當然唔算抱。
樹熊每日只接一個 job ，佢收工，我哋繼續睇其他動物。終於，香港朋友都睇到袋鼠，鴯鶓，仲有其他原生飛鳥蜥蜴等，都算有所交代喇。
今晚住 Caravan Park，都要買尐食物做晚餐及早餐，順手買埋麪麭、火腿。十四座，就係流動餐廳喇。
中海岸沿岸到處都係內陸湖，河水流入湖跟住出海；朝漲時，海水又倒灌入湖中，所以湖水係醎嘅，但河口又係淡水。醎淡水交界，最啱就係養?￥ﾘﾞ。嚟到中海岸，嗜?￨ﾀﾁ饕就發達喇。呢度到處都有?￥ﾠﾴ，即開即食，新鮮到不得了。即刻驅車前往，坐喺海邊帳篷下，預備啤酒汽水，一盤一盤生?￦ﾋﾎ出嚟，啜又一隻，啜又一隻，如是者就食咗十幾打?￣ﾀﾂ大家食得興高采烈，不過亦好有節制，今次就此打住。
呢度所屬區叫史提芬港，東面向塔斯曼海有個32公里長嘅沙灘 Stockton
Beach ，由南邊紐卡素，一直伸向北邊
Anna Bay。而家就係要嚟 Anna Bay，因為 Stockton
Beach 岸上就係一個南半球最大嘅沙丘地帶，沙丘最高達到30公尺。要入沙丘就要由Anna Bay 搭四驅車入去。
今日好大風，睇個樣冇乜生意，四驅車司機見到我地成班人，即刻四萬咁嘅面口，仲自動減價。今日入沙丘嘅主要活動，就係滑沙 Sandboarding。四驅車喺沙上顛簸一輪，就停喺一個沙丘大斜坡山腳，工作人員解釋一輪，大家執起滑沙板行上沙丘頂，我唔係第一次玩，仍然覺得好過癮。滑沙好玩在於喺好高好斜跣落嚟，速度都幾快，不過又好安全。最辛苦就係拎住塊板行返上沙丘頂，當然仲有就係成頭成面都係沙。
其實，Stockton Beach 仲有好多嘢玩，沙丘上，四驅車仲可以去好遠，例如探訪大蕭條時代嘅鐵皮屋村莊，又可以行沙灘尋找沉船遺址，Anna Bay 可以掘沙蜆，可以衝浪，游水，曬太陽，呢度玩一兩日，絕對唔會悶。
帶住成身沙，入住 Caravan Park。分工合作，預備晚餐，不在話下。今日晚餐：Aussie Barbecue ，袋鼠佬燒烤，絶唔係每人拎支燒义，义住塊雞翼豬扒，放喺明火上燒。咁係港式燒烤，香江獨有。澳式嘅就係燒住塊大鐵扳，乜鬼都放晒上去，邊塊熟就食邊塊，非常原始。食乜嘢有乜所謂，老友記一邊食一邊大噏兒時趣事，豈不快哉！
臨瞓前，居然有人用個床單墊住飯抬，攻打四方城。我冇咁好氣，上牀大昏迷，一覺瞓到天光。鼻鼾？我聽唔到喎。
大家果然好有紀律，食過簡單早餐，一早出發，開始雪梨之遊最後一日嘅活動。今日回頭向南走。
呢一區除咗海產豐富，亦盛產葡萄。同附近獵人谷一樣，呢度亦有不少酒莊，全部都歡迎入內試酒。我車入一間路經過嘅酒莊。工作人員擺出四支酒，每人用小杯逐一品嚐，唔急嘅，試啱就買，食白果亦冇所謂。不過，通常嚟講，酒莊多多少少都有尐斬獲嘅。好似今次咁，我哋班人都幫趁咗幾支酒㗎。
車繼續向南，中午嘅目的地係中海岸着名地標
The Entrance。進入 the
Entrance 前，我哋遊一遊 Norah Head Light House，燈塔唔係十分持別，前面嘅火山岩平台先至壯觀，地質學家話，呢個平台，係二億年前火山活動所形成，而家平坦坦擺喺海邊，走上去行一匝，都幾過癮也。
中午去到 the Entrance 鎮中心，悠悠閒，食份炸魚薯條，坐喺海邊圓形表演台邊，就等三點半嘅餵塘鵝表演。
點解會有尐咁嘅表演？以前，唔係好耐，只係十零年前，呢度嘅魚店喺收鋪前，會收集劏魚剩低嘅頭頭尾尾，魚皮魚骨魚腸等等，放入幾個藍色方型扁箱，用手推車運嚟海邊呢度，反轉藍色箱，就咁將魚頭魚尾倒喺地下，我哋認為係冇用嘅嘢，尐水鳥就爭住嚟食。最多嘅就係海鷗同塘鵝，隻隻飛嚟爭食，非常壯觀。一輪衝鋒，全部食清。之後，魚店職員亦會用水清潔地方。久而久之，雀仔就定時定刻等魚食，遊客亦專誠嚟睇，因此，亦成為本區每日嘅表演項目。多尐遊客，生意又多咗，正是雙贏之局。
不過，而家嘅表演，已經完至唔同舊時。到時到候，好似喺課室咁，塘鵝企喺阿伯前面，阿伯張枱上有個有蓋膠桶，佢喺個桶攞出一條六吋長嘅魚，拋向塘鵝群，塘鵝張口食，全靠彩數，唔使乜嘢競爭。再者，咁長嘅魚，海鷗根本食唔到，唔怪得之一隻海鷗都冇！太正規，太有紀律，完全唔好睇。
不過，改成咁，唔知係咪唔係有苦衷，例如衛生問題。又唔知劏咗嘅魚骨，會唔會拮親尐塘鵝？不過，總之就唔好睇喇。
離開
The Entrance ，入返雪梨。應要求，晚餐前都要車去附近商場，作最後雪梨血拼。
今晚晚餐，訂咗喺鴨仔池邊意大利餐廳。雪梨真係福地，世界各地方嘅名菜，呢度都食得到，而且都係正宗地道嘅。呢間餐廳認真唔錯，價錢又唔貴，大家都食得好開心。
一宿無話，雪梨七日，咁又過去。今日，十四座坐滿，要拉個 trailer 載行李。一早去到機場，佢地飛去墨爾本繼續玩，我就趕返屋企，又要開工。
