2011.08.08 邊個至係孖士打，啊爺未噏咪自誇

 2011.08.08  

邊個至係孖士打，啊爺未噏咪自誇。

柯拿，大家好，

上周話7月係雪梨嘅嚴冬，實在有說明嘅必須。雪梨實在四季都好舒服，冷熱都唔會好極端。我鍾意夏天，好大原因係日照時間長，早上五點已日出，到晚上8點，個天重好光。日光日白，個人靈舍開朗。但因為太陽太猛，又乾到飛起，對皮膚唔係幾好，所以好多女人唔鍾意。anyway各花各眼喇。

煲呔替補老董後，佢曾經上電視話喺回歸前，每日都收到由倫敦發到香港嘅指令，而回歸後，北京從來冇發指令比佢。意思係話，佢有好大自由度去get佢個job done。唔知而家佢重會唔會咁講。

啊光…王主任喺京城會見香港學生時，批評香港公務員淨係識跟柯打做嘢，而唔識做波士、唔識做 孖士打。

我唔怪啊光王主任咁講嘢。神洲大地，千百年來，官！就係父母官。黃伯鳴話，要考敬嘅。你睇，胡主席、温總…等國家領導人到訪時，各級大小芝麻官、子民百姓，個個喺佢面前排好隊，耷頭耷腦，恭恭敬敬聽家長父母官訓話。喺佢哋心目中，邊度會有，人民係老闆，而佢哋係為人民服務嘅公僕，呢啲咁嘅觀念？

喺我認識中，公務員從來都係take 柯打做嘢嘅人。米字旗香港如是，袋鼠國亦如是。係全體市民出糧比佢哋嘅政府工。邊個係波士、邊個係孖士打就好清楚喇！

喺袋鼠國，大選後，人民投票授權某黨派籌組政府，執政黨就會派出閣員出任部長，例如外交部長、國防部長，財政部長…等等。呢啲係政治任命位置，如果該黨喺下一次大選落敗，呢啲部長全部冇得撈，要執包袱。

但政府有另一批人，佢哋長期喺各部門工作，無論乜黨上台，佢哋都喺部門內做嘢。佢哋執行由執政黨定出嘅政策，工作期間，政治上保持中立。例如工黨上台做政府，要保障本地工人工作機會，工黨政府可能會限制勞工輸入，公務員就會訂出限制移民政策。但係，如自由黨上台，要保障有足夠勞力，自由黨政府就會增加勞工輸入，公務員就會訂出增加勞工移民政策。…。同一批公務員，唔同嘅政府，唔同嘅政策，做嘢嘅方向完全唔同！

啊光王主任噏完呢番話後，個個幫佢解話。有人話佢鬧晒所有公務員，有人話淨係篤煲呔，有人話……。點解唔正正經經講得一清二楚，成日講啲唔講啲，我認為咁樣非常唔負責任。

李鵬飛喺城市論壇話，港人治港實行成點，港人心裡有數。鄭棠棠開到口叫中央快啲拍板，決定邊個做特首，唔駛咁多紛爭喎。咁，邊個至係香港嘅波士？你唔會又天真，又儍，以為係香港人自己呢？

再噏過

嚤囉