2013.02.03 冇奶粉，港媽發tee騰; 中囯恨，噏起王昭君

2013.02.03 

冇奶粉，港媽發tee騰; 中囯恨，噏起王昭君，

哈，我都話你唔夠個天玩，再上個禮拜，曬你一輪，熱到你七葷八素，四圍火燭。第二日即刻落雨，雪梨氣温即跌廿幾度，非常舒服。昆士蘭就冇咁好彩，唔單止落雨落到停唔到，重有龍捲風。東邊海岸又吹大風，又大浪。，capital city 布理斯本係一個河邊城巿，布理斯本河一漲就好麻煩，洪水唔止浸屋，重冲晒啲蛇呀、鱷魚呀出嚟，居民又要避洪水，重要好小心唔好畀蛇咬，唔好畀鱷魚食咗，十分忙碌!

上星期六，一月廿六日係 Australia Day，全國都有各種活動慶祝，升旗、唱國歌、政要演講、等等，就梗嘅嘞!重有一樣一定有嘅活動，就係入藉典禮。每年都有唔少由全世界各地嚟嘅人，加入袋鼠國大家庭。18年前，蔣家四口就喺呢一日入藉，身分由英國國民（海外),變成袋鼠仔、袋鼠女。對我哋嚟講，呢日都係好有紀念意義嘅一日。

記得讀師範時，上過一個青少年輔導課程，講述青少年時，會遇到嘅問題，其中一個就係身分認同問題。我自問，我嘅青少年時期，從來冇呢個問題，因為我認為，我根本就係一個黃口黃面嘅中國人，咁重駛講?!估唔到幾十年後，先至要重新思考呢個身分問題。

我鋪頭以前請咗個泰國師奶幫手做counter，佢一啲中文都唔識。試過有個大陸人嚟鋪頭，居然投訴泰師奶，做乜唔同佢講中文。佢哋一見黃口黃面，，就以為可以講中文，重要係普通嗰隻。從外表睇，泰師奶同一般「中國人」根本分辨唔到。

咁又係唔係血統呢?你阿爸阿媽係中國人，你咪係中國人囉。泰國前總統他信，佢阿爸係潮州冷，阿媽係客家賢，咁，呢個泰國總統係唔係中國人呢?再唔講歐洲、美洲，國家分分合合，國界畫完再畫，人口流動，男男女女撈到亂七八糟，係乜嘢國家嘅人，點分?

我話我係中國人，都可能係一廂情願，又冇任何官方文件，話我係中國人。我亦從來冇喺仼何表格國藉呢一欄，填上中國。以前填BDTC, BNO, 而家就填袋鼠。

我去旅行時，人哋問我，我會話，I am Australian, born in Hongkong。

迂迴曲折講咁多複雜嘢，無非想避開講「我係中國人」呢句咁直接嘅說話。維園阿伯聽到呢啲說話，一定媽媽聲，大嗌漢奸賣國賊。sorly 囉，我哋一介草民，無權無勇，唔係好似江主席，有權將北方國土拱手畀咗北極熊。又唔係大小貪官，可以將民脂民膏轉晒去英美加澳紐。咁點算奸?邊有國畀我賣?學司徒華話，賣咗幾多錢?

胡主席叫港人分亨做中國人嘅榮譽，如果真係講一句「 我係中國人」就有榮譽，點解咁難䦕口?好簡單，對唔住，而家呢個中囯，離開榮譽好遠好遠。

好好笑，舊時窮到濃，發夢都希望成為世界強國。而家有囯家有錢嘞，又上天又下海，重有航空母艦。誰不知「強囯」、「 強囯人」，呢兩個名詞竟然成為笑柄!荒謬之事，莫過於此。

強囯有好多錢，打造先進飛機大炮、金牌運動員等等，偏偏就生產唔到令人有信心嘅奶粉，豉油、食油...，全囯上下，大規模嘅造毒造假，古今中外，揾多個類似嘅地方都難。

今次奶粉事件，追到尾，咪又係強囯無良生產商，加埋官商勾結、上上下下大貪特貪嘅結果。呢次唔止搞到啲港B鷄毛鴨血，全世界嘅奶粉都畀強囯B掃青。其實一早我哋就知，如果邊種生物畀強囯人睇中，認為食咗會強身、壯陽，又或者係身分象徵，唔駛幾耐，嗰種生物就會絕種，老虎、犀牛、冬蟲草，無一幸免。咁，中囯，喺世人眼中，又點榮譽呢?

人哋點睇你，唔係因為你有冇錢，呢個小兒皆知嘅道理，偏偏係富起來嘅強囯人嘅盲點。佢哋成日㥽憤憤不平咁話，「我窮，你睇我唔起，我明白。而家我成身人仔，去埋你祖家，掃晒你啲地產LV，我咁富貴，你都話我cheap，我唔明」。

習近平有一次外訪，遇到示威，當晚喺宴請華人嘅會埸上咁講：「有些吃飽了沒事幹的外國人，對我們的事情指手劃腳．中國一不輸出革命，二不輸出飢餓和貧困，三不去折騰你們，還有什麼好說的」。佢唔知，原來輸出富貴，尤其係無品𠴱隻富貴，更乞人憎!

上星期同大小姐食晩飯，都講起，鬼妹鬼仔點睇而家嘅中囯人。我同佢講王安石嘅明妃曲，漢恩自淺胡自深，人生樂在相知心。係咪叫做中國人? Who F cares? 𣎴過如果叫做中囯人，就咪搞嘞! 喺我心目中，中國、中囯，有好大分別。

再噏過

嚤囉