2013.09.09.
鋪頭浪滔滔，齋噏冇得撈，月黑又風高，有乜嘢好... 造?
柯拿，大家好，
今早返工，開電閘，未開燈，如常走入黑Mun mun嘅舖頭，一腳踩落去⋯Splaaaaaaash⋯⋯。what the⋯⋯hell，開燈，睇下地下，工場嗰邊，浸咗兩吋水深。原來商場一條水管爆咗，連隔籬西太銀行都浸埋。即刻打電話叫所有人唔駛返工， cut damage 吖嘛。跟住有人嚟撿查電力，又有人嚟吸水、拖地等。攪攪震，攪咗成日。唔開得機器，乜都做唔到。揾唔到錢，唯有又寫篇嘢喇。
星期六大選，六點結束投票，九點鐘左右就有結果，一如所料，自由黨三個鐘就點到76票，過咗多數票，自由黨員坐定粒六，由工黨手中搶番失去六年嘅執政地位。星期日，票數升至八十幾。而工黨大失民心，只攞到五十二，係百年來工黨歷史最差嘅一次。
星期日，戴緊頭盔，預備踩車。電視訪問即將落任嘅工黨金融部長黃英賢 Penny Wong（一聽佢個名，各位就知佢係華裔，佢又係女性，而且，佢又係一個 lesbian 。三種"minority"，即民族、婦女、性傾向，集於一身，都算犀利)，佢話，社會聲音好明顯，人民覺得工黨唔值得（not deserve) 執政，嚟緊呢三年，佢哋會做好反對黨角色。言下之意，就好似大隻佬話：I will be back。民主政體，尊重人民選擇。諗起東方大國，同埋呢粒過氣名珠，，一方面唔畀你一人一票發聲，另一方面，又唔知醜，大大聲話代表你，咁無恥。
鏡頭一𨍭，大批記者喺侯任總理 Tony Abbott 嘅屋企外面等採訪。睇下佢屋企，唔特別光鮮，絕對講唔上豪華，一個尋常百姓家而已。今朝一早，佢約咗佢啲單車友，一早又去踩單車。Tony Abbott做咗6年反對黨領袖， 咁多年嚟，佢多數都係踩單車返工，記者成日跟住架單車造採訪，已成慣例。打開車房門，裏面立立亂，同我個車房差唔多咁亂。佢一個人舉起自己架單車，唔會話有跟班一擁而上爭擦鞋。佢自己搞掂自己嘅裝備，就同車友出發踩早車。我又諗起東方大國，一個九品芝麻官，會有幾大官威。好似周星馳審死官話：官喎!!!民主社會，政府唔係父母，唔係阿爺，係服務人民嘅公僕。佢哋做得好，人民畀佢繼續。做得唔好?對唔住，Next。而家騎住人民，作威作福嘅官，喂，分下庄閒好喎。
講下八卦嘢好過。2004年，當呢位新總重係何華德政府嘅衛生部長之時，忽然爆出花邊新聞：
話說，卅幾年前，20歳嘅Tony同佢初戀女友Kathy搞出人命。佢哋兩個都係基督徒，所以，墮胎絶對唔係選項。佢哋亦未準備好結婚，更加未準備好為人父母。兩條友諗出一條橋，就係柄埋十個月，生咗個B出嚟。重簽埋字，睇下邊個善心有緣人，去收養呢個幸運B。B 仔條命都算唔錯，冇耐就畀O'Connor先生太太收養咗，悉心撫養。取名丹尼。
Tony 自覺對唔住Kathy，呢段感情亦劃上句號，此後男婚女嫁，各不相干。
流水淙淙，日換星移，話咁快就過咗25年，黎小田亦長大成人變咗張活游。呢邊廂，少年搞搞震嘅Tony，搖身一變，成為聯邦政府部長。佢經常出席大場合，發表偉論 blah blah blah。經常跟出跟入嘅，唔係擦鞋仔，而係各大傳媒嘅記者、攝影隊。
澳洲廣播公司（ABC）攝影隊中，有個收音師，recordist （就係啲人，成鬼日好似舉重咁，舉起支鬼迷咁長嘅咪桿，伸個咪人群中，接收被訪者嘅聲音），有一日，O'Connor 夫婦同佢講：「Daniel，你都大個仔嘞，有啲嘢一定要話過你知。其實，你唔係我哋親生㗎，你親生阿媽係⋯⋯Kathy」。
Daniel 見番親生阿媽當然高興，而Kathy亦有自己嘅家庭。既然知道阿媽係乜水，都好想知道自己嘅另一半DNA來自何方，人之常情喇。
「阿媽，當年搞出人命嗰個男人係乜水。」
Kathy 亦唔隱瞞。各位看官，你哋都一定估到。
「佢就係當今自由黨政府部長，東尼，阿博。」
「⋯⋯⋯!」
世事果然奇妙，自從丹尼入咗ABC做收音師之後，就長駐國會新聞中心 news gallery。都唔知幾多N次收錄 Tony Abbott 嘅聲音，又喺埋同一座樓返工。估唔到，呢位日見夜見嘅政壇猛人，居然係自己生父。
相約見面，一對過去式戀人，加埋過去式愛情結晶，梗係好多嘢傾，Tony Abbott 自己知自己事，當然唔會否認。點似特區一眾領導人，做咗唔敢認，又或者用語言偽術掩飾。Tony 絕對唔會講：「喺我嘅記憶中，我冇講過我曾經否認呢件事冇曾經發生過」等等嘅垃圾說話。Tony Abbott 呢單嘢，震動澳洲，各大傳媒爭相報導，做咗好耐嘅頭條。連Kathy 同Daniel 個大頭都上報，又上電視新聞。
喺坊間，當然唔少人會咁講：
「我都話係喇，你睇，一個餅印咁呀。」
大團圓結局?
哈，梗係冇咁簡單，如果就係咁，有乜好寫。
喺三人相認後，Kathy 回帶，回味甜蜜記憶。諗下諗下，佢記起有幾日，Tony因事遠行，喺一個月黑風高之夜，Kathy 又飲咗啲酒，呢個時候，有件有錢仔，佢都係Tony嘅朋友。粵語長片都有得睇喇，月黑風高嘅夜晚有乜好做吖，一係殺人，一係造人。於是⋯⋯，咪就咁囉。
Tony 遠行返歸，Kathy梗係乜都冇講，當乜事都冇發生過。到知道有咗，Tony Abbott
就認為係自己一手搞出嚟嘅。
咁，究竟呢條人命係邊個搞出嚟嘅呢?係Tony吖，抑或係個有錢仔呢?點至知呢?
冇錯，就係DNA。而家咁齊人，男、女、細路，齊晒，驗DNA咪知囉。連嗰位有錢仔都有去驗DNA ，不過姓名就保密嘞。
結果⋯⋯登登登櫈⋯⋯
Tony Abbott搞咗咁耐都⋯⋯冇，畀有錢仔一舖搞掂咗。
雖然個乖仔阿丹尼唔係佢生嘅，但係少年輕狂嘅事，就唔可以抹甩，作為基督徒，喺Tony 眼中，呢啲始終係點點瑕疵。Tony冇將佢掩藏，呢件事，寫咗喺佢2009年，自己嗰本書Battlelines 裏面。
Tony Abbott 後來接受ABC訪問，講番呢件往事。佢話 truth is stranger than fiction.
Tony Abbott 婚後，生咗三件靚女。各位想睇佢哋點靚法，可睇番星期六晚 Tony Abbott 喺自己嘅競選辦公室舉行嘅致謝會就見到。
咦，外父相，冇仔噃，收番丹尼做契仔都好喎。
再噏造，
嚤囉
柯拿，大家好，
今早返工，開電閘，未開燈，如常走入黑Mun mun嘅舖頭，一腳踩落去⋯Splaaaaaaash⋯⋯。what the⋯⋯hell，開燈，睇下地下，工場嗰邊，浸咗兩吋水深。原來商場一條水管爆咗，連隔籬西太銀行都浸埋。即刻打電話叫所有人唔駛返工， cut damage 吖嘛。跟住有人嚟撿查電力，又有人嚟吸水、拖地等。攪攪震，攪咗成日。唔開得機器，乜都做唔到。揾唔到錢，唯有又寫篇嘢喇。
星期六大選，六點結束投票，九點鐘左右就有結果，一如所料，自由黨三個鐘就點到76票，過咗多數票，自由黨員坐定粒六，由工黨手中搶番失去六年嘅執政地位。星期日，票數升至八十幾。而工黨大失民心，只攞到五十二，係百年來工黨歷史最差嘅一次。
星期日，戴緊頭盔，預備踩車。電視訪問即將落任嘅工黨金融部長黃英賢 Penny Wong（一聽佢個名，各位就知佢係華裔，佢又係女性，而且，佢又係一個 lesbian 。三種"minority"，即民族、婦女、性傾向，集於一身，都算犀利)，佢話，社會聲音好明顯，人民覺得工黨唔值得（not deserve) 執政，嚟緊呢三年，佢哋會做好反對黨角色。言下之意，就好似大隻佬話：I will be back。民主政體，尊重人民選擇。諗起東方大國，同埋呢粒過氣名珠，，一方面唔畀你一人一票發聲，另一方面，又唔知醜，大大聲話代表你，咁無恥。
鏡頭一𨍭，大批記者喺侯任總理 Tony Abbott 嘅屋企外面等採訪。睇下佢屋企，唔特別光鮮，絕對講唔上豪華，一個尋常百姓家而已。今朝一早，佢約咗佢啲單車友，一早又去踩單車。Tony Abbott做咗6年反對黨領袖， 咁多年嚟，佢多數都係踩單車返工，記者成日跟住架單車造採訪，已成慣例。打開車房門，裏面立立亂，同我個車房差唔多咁亂。佢一個人舉起自己架單車，唔會話有跟班一擁而上爭擦鞋。佢自己搞掂自己嘅裝備，就同車友出發踩早車。我又諗起東方大國，一個九品芝麻官，會有幾大官威。好似周星馳審死官話：官喎!!!民主社會，政府唔係父母，唔係阿爺，係服務人民嘅公僕。佢哋做得好，人民畀佢繼續。做得唔好?對唔住，Next。而家騎住人民，作威作福嘅官，喂，分下庄閒好喎。
講下八卦嘢好過。2004年，當呢位新總重係何華德政府嘅衛生部長之時，忽然爆出花邊新聞：
話說，卅幾年前，20歳嘅Tony同佢初戀女友Kathy搞出人命。佢哋兩個都係基督徒，所以，墮胎絶對唔係選項。佢哋亦未準備好結婚，更加未準備好為人父母。兩條友諗出一條橋，就係柄埋十個月，生咗個B出嚟。重簽埋字，睇下邊個善心有緣人，去收養呢個幸運B。B 仔條命都算唔錯，冇耐就畀O'Connor先生太太收養咗，悉心撫養。取名丹尼。
Tony 自覺對唔住Kathy，呢段感情亦劃上句號，此後男婚女嫁，各不相干。
流水淙淙，日換星移，話咁快就過咗25年，黎小田亦長大成人變咗張活游。呢邊廂，少年搞搞震嘅Tony，搖身一變，成為聯邦政府部長。佢經常出席大場合，發表偉論 blah blah blah。經常跟出跟入嘅，唔係擦鞋仔，而係各大傳媒嘅記者、攝影隊。
澳洲廣播公司（ABC）攝影隊中，有個收音師，recordist （就係啲人，成鬼日好似舉重咁，舉起支鬼迷咁長嘅咪桿，伸個咪人群中，接收被訪者嘅聲音），有一日，O'Connor 夫婦同佢講：「Daniel，你都大個仔嘞，有啲嘢一定要話過你知。其實，你唔係我哋親生㗎，你親生阿媽係⋯⋯Kathy」。
Daniel 見番親生阿媽當然高興，而Kathy亦有自己嘅家庭。既然知道阿媽係乜水，都好想知道自己嘅另一半DNA來自何方，人之常情喇。
「阿媽，當年搞出人命嗰個男人係乜水。」
Kathy 亦唔隱瞞。各位看官，你哋都一定估到。
「佢就係當今自由黨政府部長，東尼，阿博。」
「⋯⋯⋯!」
世事果然奇妙，自從丹尼入咗ABC做收音師之後，就長駐國會新聞中心 news gallery。都唔知幾多N次收錄 Tony Abbott 嘅聲音，又喺埋同一座樓返工。估唔到，呢位日見夜見嘅政壇猛人，居然係自己生父。
相約見面，一對過去式戀人，加埋過去式愛情結晶，梗係好多嘢傾，Tony Abbott 自己知自己事，當然唔會否認。點似特區一眾領導人，做咗唔敢認，又或者用語言偽術掩飾。Tony 絕對唔會講：「喺我嘅記憶中，我冇講過我曾經否認呢件事冇曾經發生過」等等嘅垃圾說話。Tony Abbott 呢單嘢，震動澳洲，各大傳媒爭相報導，做咗好耐嘅頭條。連Kathy 同Daniel 個大頭都上報，又上電視新聞。
喺坊間，當然唔少人會咁講：
「我都話係喇，你睇，一個餅印咁呀。」
大團圓結局?
哈，梗係冇咁簡單，如果就係咁，有乜好寫。
喺三人相認後，Kathy 回帶，回味甜蜜記憶。諗下諗下，佢記起有幾日，Tony因事遠行，喺一個月黑風高之夜，Kathy 又飲咗啲酒，呢個時候，有件有錢仔，佢都係Tony嘅朋友。粵語長片都有得睇喇，月黑風高嘅夜晚有乜好做吖，一係殺人，一係造人。於是⋯⋯，咪就咁囉。
Tony 遠行返歸，Kathy梗係乜都冇講，當乜事都冇發生過。到知道有咗，Tony Abbott
就認為係自己一手搞出嚟嘅。
咁，究竟呢條人命係邊個搞出嚟嘅呢?係Tony吖，抑或係個有錢仔呢?點至知呢?
冇錯，就係DNA。而家咁齊人，男、女、細路，齊晒，驗DNA咪知囉。連嗰位有錢仔都有去驗DNA ，不過姓名就保密嘞。
結果⋯⋯登登登櫈⋯⋯
Tony Abbott搞咗咁耐都⋯⋯冇，畀有錢仔一舖搞掂咗。
雖然個乖仔阿丹尼唔係佢生嘅，但係少年輕狂嘅事，就唔可以抹甩，作為基督徒，喺Tony 眼中，呢啲始終係點點瑕疵。Tony冇將佢掩藏，呢件事，寫咗喺佢2009年，自己嗰本書Battlelines 裏面。
Tony Abbott 後來接受ABC訪問，講番呢件往事。佢話 truth is stranger than fiction.
Tony Abbott 婚後，生咗三件靚女。各位想睇佢哋點靚法，可睇番星期六晚 Tony Abbott 喺自己嘅競選辦公室舉行嘅致謝會就見到。
咦，外父相，冇仔噃，收番丹尼做契仔都好喎。
再噏造，
嚤囉
No comments:
Post a Comment