2012.01.23 皇叔得簽文，難分鬼與神，話之你點噏，恭喜發財呢句真

2012.01.23 

皇叔得簽文，難分鬼與神，話之你點噏，恭喜發財呢句真。

柯拿，大家好，

恭喜發財！……點解學得咁市儈呀你？有問。

我係將新曆新年同舊曆年分開。公元嗰隻，我會話合皮扭耳，唐曆就講發財。After all，發財都唔係乜嘢市儈嘅嘢，各位正正當當揾銀，又或者行正大運，中咗六合彩，咁樣發財，受之無愧。所以我再三，大聲講：

恭喜發財！

新年流流，講吓發財都好。當今之世，乜水最發財？唔駛用腦，個個都知道，梗係當今大唐盛世。環顧藍色小行星，鬼子佬要幾多年、幾多代，至可累積銀両成為巨富。又或者網絡時代，有人聰名透頂，早著先機，可以喺短時間內致富。但唔理點樣，好似盛唐咁樣，喺咁短時間、發得咁犀利者，真係絕無僅有。諗吓，又唔難理解者，專權政府，絕無反對派，當權者可為所欲為。先「國有化」，民間財產，化私為公（邊個係啊公？）。搞掂後，再「私有化」，將啊公產業賤買番比公眾（呢個公眾，又喺邊個？）。再用公權力，將民間漏網之魚，一網打盡。獨家生意，乜嘢石化，乜嘢能源。銀両滾滾來之勢，可預期矣！

有咗銀両，就可以去全世界掃貨。温州大款，去到杜拜，揾間最貴餐廳。「

小二！」一面講，一面攞出美金一叠，「有乜嘢最貴嘅，攞晒出嚟。」意氣風發，你估，周圍嘅人點睇佢哋。

中央太子，移居袋鼠國，豪花千萬，買咗歷史大屋，預備成座推冧，再起豪宅。當地居民不忿歷史地標毁於一旦，紛紛反對，市議會受選民委託，唔批起屋。太子果然有米，聘請最佳大狀，同市議會對簿公堂（同政府作對，喺唐山得唔得呢？）。大狀果然不負所託，公堂上，將市議會打得落花流水。咁，呢個歷史建築物，就消失於無形。你估，當地居民點睇佢哋。

越過羅湖橋，係點樣嘅景況，大家清楚過我。今次，東方之珠島民點睇佢哋，到你話番比我聽。

喺迪士尼便便，或者喺地鐵食麵麵，雖然唔係幾好，都唔係乜嘢大不了，我最唔順嘅係佢地嘅心態。強國百姓，有錢就得，駛乜守你規矩！佢大聲過你，再嘈，孔教授話，冇菜食，冇水飲，睇你點死！

要用強大嘅政治、經濟壓力，逼你改變，逼你就範。

好多傳统嘅嘢，喺皇天后土，解放後消失得乾乾淨淨，後悔已太遲，但有幸地，喺殖民地香港得以保留。我哋講廣東話、寫正體字…，重有好多有別於強國子民嘅核心價值，都係我哋要保衛嘅嘢。承先啟後，歷史向邊個方向走，就睇大家嘞！

想起梅艷芳呢首歌，

喜多郎曲，鄭國江詞

望著海一片，滿懷倦，無淚也無言。

望著天一片，只感到，情懷亂。

我的心又似小木船，遠景不見，但仍向著前。

誰在命裡主宰我，每天掙扎，人海裡面。

心中感嘆，似水流年，不可以留住昨天。

留下只有思念，一串串，永願纏。

浩瀚煙波裡，我懷念，懷念往年。

外貌早改變，處景都變，情懷未變。

鄭老師三十年前寫嘅歌詞，點解可以中得咁犀利？！

btw，下周可見到大羅，豈不快哉！

再噏過，

嚤囉

Ps. 美儀質疑豬狼屬性之真偽。我就話猪又好，狼又好，都係啊爺鬥獸棋上嘅兩粒棋子。喺棋局上扮演乜嘢角式，盤棋點捉，幾時要氹雞，幾將要搏棋，幾時扮猪食老虎，幾時……？等等。唔到棋子話事！