2914.08.20 七月盂蘭噏燒衣，一晃半世童年事

2914.08.20 

七月盂蘭噏燒衣，一晃半世童年事。

柯拿，大家好，

橫風橫雨，真係好討厭。雖然話，雪梨冷天係雨季，住得喺度，就預咗有咁嘅天氣，但係落起長命雨，呻兩句，都係人之常情嘅。尤其是我而家鋪頭對住條街，風風雨雨，真係有另一番感受。呢幾日，又咁啱，有一班香港嚟雪梨嘅毅行者，要參加呢度嘅宣明會毅行活動，而家喺雪梨做緊訓練。真係大整蠱，佢哋嚟咁多日，就落足咁多日雨，又咁講，毅行者喎，當然要接受毅力嘅考驗，祝佢哋好運喇。

喺鋪頭，每次同客人講嘢，好多時都由天氣開始。遇着落雨，當然係最佳嘅開場白，客人多數囬應： but we need that rain。我就會跟住講： me too, because customers will find holes on soles.，然後就給給大笑。

其實，晴空萬里先至係雪梨天氣嘅常態。想當初考慮移民時，未定落腳地點，就喺雪梨、布里斯本兩處選擇。住過幾日布里斯本，亞熱帶地區，同香港差唔多，又濕又熱，唔多鍾意。又聽講墨爾本天氣一日四季，都費事去試。雪梨乾爽，氣溫宜人。而家諗番起，當年嘅選擇，果然正確。

Take the good and take the bad ，真係冇得避嘅，唯有欣然接受。呢幾個禮拜又風又雨，陰陰沉沉，其實又幾應景，唔係咩，七月十四吖嘛。唔係要講鬼古，係講童年回憶。

我出世後就住喺灣仔登龍十七號三樓，係一幢四層高，木樓梯嘅戰前舊樓。舊時，樓下可以係鋪頭，又可以係住宅，當然又可以前鋪後居。呢度一梯兩伙，就正正喺十七號地下係一個紙倉，隔籬十九號係民居。每逢盂蘭節前，我住呢幢樓就搭棚，掛起一個兩層樓高嘅大花牌，上面用電綫串起一排排燈膽，花牌正中用棉花砌出四個大字：盂蘭勝會，我好細個就認得呢四個字。我阿爸成日講笑，話有啲人唔識字，將呢四個字讀成：孟簡籐曾。我又因此連呢四個字都識埋。

掛起大花牌後，樓下行人路邊就擺咗個祭壇，正中擺咗個插滿大大小小香燭嘅大香爐。周圍就係紙符、生果等祭品。馬路坑渠邊，擺咗個金字頂，四四方高過人生晒銹，用嚟燒紙紮祭品、金銀衣紙嘅鐵屋仔。呢啲鐵屋仔，我哋見到就驚。

拉開講一筆。舊時香港人做白事，會喺屋企樓下做祭祀，路邊擺祭壇，門口掛住長圓形藍燈籠（其實白色），燈籠由上而下寫住：「某府治喪」，又寫住享壽若干： 「X十有X」。路邊又擺滿紙紥祭品：金橋銀橋、兩層別墅、白馬、轎連轎夫⋯⋯（紙紥飛機遊艇係之後嘅事，我細時，冇啲咁嘅嘢），總之豪華設備，應有盡有。當然最難忘嘅就係嗰對紙紥丫環，佢哋嘅眼神，面珠嘅粉紅胭脂，包你睇完，發夢又會見番佢哋。鐡屋仔係必備道具，離遠就見佢。一到夜晚，喃嚒佬帶住一眾遺屬四圍騰，打住鈴鈴查查做法事，跟住就將紙紥祭品放入鐡屋仔火化。烈焰衝天，掩映嘅火光，照落周圍嘅人嘅面上，有時紅，有時白，又有時黑漆一片，真係好恐怖。  

講返呢個登龍街盂蘭節鐡屋仔，佢當然恐佈，佢恐佈之處就係喺正紙倉前面。嗰時的人真係冇乜危機意識，若果燒衣紙有乜閃失，惹著紙倉，木樓着火，咁就真係一鑊熟喇。好彩好心有好報，恐佈事，從來冇發生過。只係試過有一年，花牌可能電綫短路，或者燈膽過熱，發生小火，好彩都可以及時救熄，不過已經嚇到全樓住客鼻哥窿冇肉喇。

盂蘭節講嘅就係布施，據說，佛祖一個徒弟目蓮，佢阿媽因罪打落餓鬼道，講明係餓鬼，梗係要餓到你攤攤腰，所有食物擺到埋口，都變成灰燼，正正係旦家雞見水，有得睇，冇得飲。目蓮用天眼見到阿媽受饑餓之苦，請求玉帝。玉帝話如果佈施畀其他餓鬼，所積福氣可能減除佢阿媽嘅罪孽⋯⋯。呢個就喺盂蘭節向陌生餓鬼布施嘅傳說。呢種布施嘅精神亦得以廣傳，而惠及弱小需要幫助嘅眾生。

我細路仔嘅時候，盂蘭節前，紙紥鋪已經好忙碌，各式包衣就掛喺鋪前騎樓底方便客人選購。包衣其實就係紙製嘅包袱，裏面就係個人嘅衣物：紙製嘅衫褲鞋襪，又有帽、手錶、金鍊、介指等飾物。因為係衣物，所以，包衣又分男女。人人都知，無錢不行，陰界亦冇例外。除佐包衣、衣紙（即係各色布匹）外，金銀，溪錢、陰司紙、冥通銀行現鈔，梗係唔少得。此外，各式大小香燭，當然係不可或缺。

由紙紥鋪買返嚟嘅只係原材料，夜晚食完飯洗晒碗，執好飯枱。一眾阿媽就會組識全家大細，一齊做手工。原來金、銀元寶買返嚟嘅時候，只係一疊疊約五、六吋丁方嘅玉扣紙，每張中間黐咗一小片四方形金色或銀色錫箔。喺一家之煮指揮下，兄弟姊妹一齊將二度空間，幻化成三度空間嘅立體元寶。首先將紙捲成圓筒形，將兩端底部推入，使圓筒形變成密封同時露出兩個尖角，再用兩手食指中指，同時夾住兩邊尖角向上一擰，尖角上翻，一個元寶就誕生喇。飯後一家人坐埋一齊，一邊摺元寶，一邊嘻嘻哈哈，梗係家庭樂合家歡活動喇。

七月十四當日，大姑少奶靚小姐去街市買餸，唔使四圍騰去搵盂蘭節用嚟祭祀嘅食物，因為一眾小販大哥大姐已經準備妥當，將拜神所需嘅嘢都擺喺當眼處，大聲叫買，靚姑們又點會唔記得？雖然餓鬼每年只可以食一次，話晒係布拖，而且大家多數都唔係乜嘢有錢人，窮人佈施畀窮鬼，邊可以豪華，總之盡吓人事，食得飽，著得暖，再醒些少冥通使費。陰陽兩界，大家都心安理得喇。加上餓鬼唔可以食熱食，祭祀食物非常簡單，多數係白飯、豆腐、芽菜、各式生果，連頸燒鴨頭等寒食。咦，燒鴨頭？梗係喇，唔通成隻鴨咩，邊有錢買？唔同喺屋企做節，拜完神可以做餸，而家街邊祭祀，就算買得起隻燒鴨都唔會咁做。幫人都係盡餘力啫，首先搞掂自己，然後再顧及他人，都係人之常情。

呢一晚，早的搞掂餐飯，一家大細，執齊家生，落街去也。每逢七月十四，咁樣喺街邊祭祀，我哋香港人叫佢做：燒街衣。

其實，我哋屋企從來都冇燒過街衣，我細路仔嗰陣見人哋燒得咁過癮，問阿媽點解我哋唔做。阿媽話：燒街衣一係唔做，燒開咗做要年年燒，如果邊年唔燒，就有啲由下面上嚟嘅自遊行朋友對住你唱歌：「 why why tell me why⋯⋯」，問你怕未？我當時細個，對呢個答案都好滿意。而家回想，我哋屋企跟本樣樣求求其其，又點會化精神搞的咁嘢，有個咁嘅藉口，當然就順住上，搞少一樣得一樣喇。

屋企大人唔搞啫，我呢個百厭仔自然會搵節目。喺街市檔口搞掂晚飯後，即刻過隔籬，叫埋豬肉榮個仔、賣魚勝個女⋯⋯，一齊出發咯。

鵝頸橋街市，隔咗條大水坑就係堅拿道東。七月十四呢一晚，羅素街口呢段堅拿近東，行人路坑渠邊、馬路對面大水坑石壆前面，同埋成條登龍街，企滿燒街衣嘅人。多數都係一家大細，一早霸定好位，人就企上行人路，香燭衣紙就擺喺馬路邊坑渠。先點着香燭，人哋阿媽口中唸唸有詞，一輪稟神之後，戲肉嚟喇，劃著火柴，開始燒衣，御准玩火，邊個細路唔鍾意？我哋呢班街童冇份燒，圍住睇都開心。怕唔怕鬼？嗰陣成街都係人，都唔知邊隻係鬼，總之就好玩，乜鬼都唔理喇！

金銀元寶、衣紙包衣，一一於烈焰之中，化成灰燼，希望遠道而來嘅朋友，多多少少都執到啲。趁火焰未熄，再將冷飯、豆腐、芽菜，生果都埞埋入火堆，各位飢餓嘅朋友，好好飽餐一頓，食過呢餐，出年至有第二餐喇。

高潮嚟喇，你估我哋真係咁神心，剰係企喺度睇燒街衣？企咁耐，就係等呢一刻。火焰熄與未熄之間，大人喺銀包攞出散紙，斗零、一毫，噼嚦啪嘞，掟入火堆。仲等乜嘢，我哋即刻走入火堆。相傳有隻貓火中取粟，最後一無所得，我哋就灰中取銀，唔執就笨喇。大家鬥眼利，森林定律：手快有，手慢冇，死黨都冇情講。一輪搜索之後，大家攤大黑孖孖嘅手板，展示戰利品，爭鬥過後，大家又嘻嘻哈哈，攬頭攬頸，一齊趕下一場咯。一路行，見到燒過衣嘅地方，都會行埋去，用腳踢開灰燼，尋找漏網之銀。

「燒衣唔撒錢，今晚畀鬼鍊」，呢句嘢，我哋個個都識，不過，我從來冇見過，有人夠膽兜口兜面對住燒衣嘅人大嗌，可能個個都撒錢啩？更有可能嘅係我哋呢班友，剩係得把口，咁樣講？肯定畀人追九條街打餐懵。我咁醒目，點會做的咁嘅嘢。

講開撒銭，有啲民俗學 Folklore Studies 硏究話，現兜兜掟錢，梗係向現世人布施。為咗最弱者可以攞到呢啲錢，就作古仔話的錢係畀鬼嘅，令到唔係真係搵個錢刮沙都冇嘅人，都唔會去執呢啲錢。咁，掟出去嘅錢，就落喺有需要嘅人嘅手中。又係喎，如果你知道捐錢畀中國紅十字會，就會入咗郭美美個戶口，你仲捐唔捐？

真犀利，一講，就係半個世紀前嘅往事。講開又講，當時燒衣，當人哋拋出金銀元寶、張張面額百萬嘅冥通銀紙嘅時候，點解我哋唔去攞，而到掟啲斗零一毫，就出去搶呢？好明顯，冥通紙幣，講到幾多百萬咁巴閉，都係假錢，陽間買唔到嘢。但係斗零可以買到一塊威化餅。咁簡單嘅道理，五十年前幾歳既細路仔都識。而家特區政府日日質問香港人：「有票你都唔要？」喂，呢啲係乜嘢票先，如果係冥通鈔票，一把火燒咗佢算罷喇。

再噏過，

嚤囉