2012.02.11 超人噏中我過関，等食賴子嗰一餐，枱腳猛撑錢咪慳。哈哈！盞！

2012.02.11

超人噏中我過関，等食賴子嗰一餐，枱腳猛撑錢咪慳。哈哈！盞！

柯拿，大家好，

天有不測之風雲，上周雪梨居然出現龍捲風。喺一個離市中心以南十幾公里，叫Randwick嘅suburb，出現咗一次幾分鐘嘅龍捲風，吹爛咗幾間屋。天文台話，雪梨地區出現龍捲風，並不尋常。以前，啊Ling喺澳洲，就住喺Randwick。

又講吓古先，以前上體操堂，我打個手翻俾啲學生睇。嘩，又高又直又利落。以為好巴閉，昂首挺胸，顧盼自豪望吓啲學生。咦！乜唔係拍晒手掌嘅？

「啊Sir，」佢話，「你做個湯馬斯全旋嚟睇吓」。又有一條友仔話，「不如做個童非轉體吖」。又一個話，「手翻咁雞？月久空翻又如何」。我「……」。香港學生，連前滾翻都唔掂，但對高難度動作則如數家珍。冇嘢嘅，睇得多。資訊發達，電視體育新聞日播夜播。又請大學體育系教授，運動員，國家隊教練等猛人，即場評述。因此，香港人，唔理打唔打得，都非常噏得，技術jargons瑯瑯上口。所以，要呃香港人，唔係話唔得，都要周張一下。

就例如...... 民意。

Ha，「民意」？究竟係乜東東？係咪即係話：

好多「民」，「意」會到今次只係鬧劇一場？

又或者，好多「民」，「意」想不到，有咁多嘢爆？

又或者……？

可知，如果大家唔係講緊相同嘅嘢，討論亦無意義。仁類提出：可否解釋吓點解民意會傾向支持振英呢？仁類有此一問，想必基於最近嘅民調結果。由一開頭，個個都知道，特首係selected唔係elected。各位唔係以為嗰千二人（少數「民主」花瓶除外）有自由意志，可以想選邊位就邊位，呀嘛？

蟻民百姓，更加無從置喙，最衰係港人雖然連前滾翻都打唔到，側手翻內轉90度接直體後空翻兩周半加轉體540，就司空見慣。「民主」係乜？點樣流血、連命仔都冇埋咁去爭取、保衞？雖然完全無經歷，但通訊發達，日日喺電視都見得到。雖然冇民主，都略略噏到啲民主jargons，啊爺做好做醜，喺炮製小圈子selection呢碟小菜上，都要加啲「民主」雞精。咁港人焗吞落肚，都唔會太過反胃。

「民意調查」呢單嘢，都係數一數二嘅民主雞精極品。火候容易掌握，可大可細，我要問邊個就邊個，極容易操縱結果。就算結果同預設有偏差，大把如陳夢吉、方唐鏡之流，幫你將紅染黃，將曲抝直。

好多人已經不斷咁問：選委嘅組成，佢推乜人侯選，最後選邊件做？除咗發噏風外，港人都冇得參與。做民調時，監硬要人喺三個人中揀一個，又有乜意思呢？

於是又有人話：嗱！係得三個爛橙，你揀個冇咁爛嘅啦！

港人於是就揀個least evil option。你諗，鐵頭？盞嘥氣啦！唐糖？條條fing，saam look ling，重有好多黑材（邊個放？），好丟架喎！振英？背心短褲，sporty喎，口才應對OK喎。知道都係啊爺欽點。你要我三楝一，就佢喇！

結果，民調分析：全港市民，有一半人支持（？！）梁振英成為特首。

明明話揀個冇咁衰嘅，變咗支持。

好嘞，將「民調」變成「民意」，梁辦大把口舌便給嘅師爺，即刻開工，話俾啊爺聽，唐糖雖然係第一男主角，不過醜樣喎，嗱，振英又根正苗紅，又受港人愛戴。啊爺爺，改吓劇本啦。揀CY，至夠high。

二羅話咁嘅一場戲，一次都嫌多，我就話點到你嫌三嫌四，三水佬睇走馬燈，陸續有來至真，至於你有幾多人上街，啊爺話：who cares！喂！幾時下台邊個知？趁在位，刮得幾多得幾多。安排晒老婆仔女喺外國，入理藉。邊個知，幾時變咗第二個王立軍？

賴子下戰書，我梗應戰，聽者有份，唔係講輸羸，有機會坐埋一齊食餐飯，賞心樂事也。殺你！

我講李超人，究竟佢可唔可以影響中南海，我唔知。我信佢，係信佢嘅網絡，佢消息一定非常靈通，李氏力場，直達天庭，意思就係，佢應該最清楚啊爺（s）點諗。你買馬，都問吓馬主、練馬師、騎師啦。如果開古揭盅，連李超人都估輸咗，我都服啦！

話時話，如果超人轉體180度轉買啊狼，我又會照跟，到時CY變CE，我咁唔算輸啫！不過，飯就照食，AA喇，好冇？

賴子亦提到寧生敗家仔，莫生蠢鈍兒。呢個係個人喜好，冇話邊個啱邊個錯。但我唔係咁諗，敗家仔可以令你臨老過唔到世，蠢鈍兒（當然要乖嗰隻）又唔識害人，好多時重可以陪你一世，成世人好似細路仔咁，OK噃！係驚佢自立唔到，不過，好在而家社會福利都算係咁喇，都放心嘅！天才著勞碌一生，憂國憂民。無知者對世事不痛不癢，開心快樂每一天。

After all，邊個係天才，邊個係白痴，安有能辨者乎？

詞：許冠傑/薛志雄　     曲：許冠傑

呢個世界上，有精仔、有懵仔、有叻仔、散仔、賭仔、重有戇居仔，
有衰仔、有好仔、反骨仔、癲仔、蠢仔重弊過敗家仔，
細蚊仔、臭飛仔、招積仔、靚仔、打仔亂咁出刀仔，問你點敢亂生仔。

邊個係天才（天才），邊個係白痴（白痴），
扮懵定蠢才，冇咁易會知（阿茂至知），
天才與白痴，你黐定我黐，天才與白痴，冇咁易會知，天才與白……痴。

呢個世界上，有冤鬼、有嘩鬼、有奸鬼、賭鬼、盞鬼、重有咸濕鬼，
有衰鬼、有煙鬼、攝青鬼、生鬼、撞鬼撞著個冒失鬼，
醉酒鬼、吊靴鬼、醜死鬼、假鬼、真鬼、亂咁鬼打鬼，問你究竟攪乜鬼。


乜鬼係天才，乜鬼係白痴，扮懵定蠢才，冇咁易會知，
天才與白痴，你黐定我黐，天才與白痴，冇咁易會知，天才與白……痴。

呢個世界上，有堅嘢、有流嘢、有精嘢、喎嘢、喳嘢、重有大鑊嘢，
有衰嘢、有好嘢、有筍嘢、貴嘢、賤嘢、最棹忌就賴嘢，
醒胃嘢 、林嬸嘢、正斗嘢、靚嘢、杰嘢、最爽就撈粗嘢，確係認真唔少嘢。

乜嘢係天才，乜嘢係白痴，扮懵定蠢才，冇咁易會知，
天才與白痴，你黐定我黐，天才與白痴，冇咁易會知，

   天才與白痴，天才與白痴，天才與白痴。

再噏過，

嚤囉