2011.07.03 周五行街勝facial，多噏英文咪say no。

2011.07.03

周五行街勝facial，多噏英文咪say no。

柯拿，大家好，

嘩，發達啦，聽到貓咪聲，long time no see，講聲hi！剩係聽到聲唔夠噃，比個貓樣我睇吓得唔得，放落我fb又如何？等住見你。

有日聽港台，楊鐵樑教英文，佢話如果你對鬼佬講long time no see，鬼佬會唔知你噏乜。我唔知佢指嘅係乜鬼，如果喺袋鼠國，我地人人鬼鬼都會講long time no see, long time no chat等等，絕無問題。芝貓、Dorothy喺楓葉國係唔係咁呢喂？ anyway，語言在變化嘅。

我覺得香港人有個非常唔好嘅觀念，就係要文法啱晒，用字啱晒先至敢講出嚟。再衰啲就係自己講唔到好英文，但係就pick up人哋講錯嘅嘢嚟取笑，佢自己驚人笑番佢，就更加唔敢講。又或者要喺自己個腦演習九萭幾次，萬無一失至敢講出嚟。大佬，對話係即時反應！dead air就尷尬啦。有冇發覺多數人對鬼講英文反而放膽，如有唐人在場就膽怯，就因為怕比唐人笑。

講吓我嘅講英文經驗，初嚟步到時，都好似上面所講，要諗真至敢講，驚人（鬼）聽唔明。講吓講吓，發覺就算講到亂晒籠，人哋都明喎，就更加放膽講。有句嘢，係我成日講嘅，就係 “put in this way” 。有時當我講完一輪，見到佢頭上好多問號，我就會講put in this way再用另一個方法再講過，講到佢明為止。

唔好怕講港式英文，總之盡量用你所知嘅最好英文講出。佢聽唔明，自然會問你。如果佢估你嘅意思，佢會問你Did you mean XYZ？咁你咪知道原來XYZ係咁講嘅。我嘅對答大多數係咁學返嚟。嚟我舖頭嘅客，九成九係英文人，我有好多機會講英文，係咁講咗20年，當然有進步。到而家，我啲英文仍然成日比我對仔女笑，但我最大進步係：我完全唔怕講，而家任何時候，對住乜鬼，任何議題，擘大口就噏，當然，嗰個題目你熟識啲，你就講得流暢啲。如果講到我嘅trade，啲鬼用嘅字唔夠我準确！

學語言，只有一個方法，就係講。錯誤，係再正常不過，全世界人都係從錯誤中學習。

啊蚊行咗兩粒鐘，發覺七一行居然有美容效果，咁要話比多啲人聽喇。實在，唐人「行街」呢單嘢，已經行咗成百年！想話行出Mr. 德，今時今日德’s family喺全世界好多地方已只係尋常百姓而已。點解，有唐山特色嗰件Mr.德，重係鬼五馬六。唔知重要行多幾多百年，個look先至搞得正常啲。

啊皮做過13樓派書員，有冇派過一輯學生叢書，係五四運動特輯，我對五四嘅啟蒙，由此而起。你派書之餘，有冇掀幾頁，睇吓當時學生係乜嘢訴求？有冇睇到當時北洋政府點樣對付呢啲遊行反廿一條嘅學生？有冇睇到當時各大學校長，點樣評價佢哋啲學生嘅行為，有冇鬧佢哋要注意社會和諧，唔好搞搞震。震壓學生嘅官員曹汝霖、章宗祥、陸宗輿等下場係點？講開又講，伯母當年瞞住你，帶咗你嚟咗香港，避過晒所有風風雨雨，你有冇一絲感激有個咁醒目嘅啊媽，帶咗你嚟香港？畢業後加盟港府服務市民，年年加薪，生活無憂。而家咬長糧安享晚年，有冇一絲慶幸，可以安靜和平咁生活喺米字旗下嘅香港？毋需將答案在此公開，憑良心話比自己聽足矣！我啊爺當年比縣政府通緝，着草避港，喺香港生咗我啊爸，touch wood我受到福蔭，我自己萬分感激。

容國團就冇啊皮你咁好彩，佢喺香港出世，唔知佢啊媽有冇伯母咁醒目，因為愛國，佢同你相反方向行。1959年，佢幫中國攞咗個世界冠軍，以後佢嘅命運係點？1968年，佢40歲又發生咗乜嘢事？又有幾多個容國團嘅故事發生咗？各位自己去揾答案啦！

想知多啲國情教育，推薦各位兩個節目，係我每周必聽。港台第一台「講東講西」，客藉主持馬鼎盛（粵劇名伶馬師曾個仔，紅綫女係佢後母），佢係history major，喺大陸長大，受教等，而家喺香港。大家可以參考。第二，係商台潘小濤嘅「串」。

再噏過

嚤囉