2012.10.15 春夏之交落起雪，單車翱遊噏喜悅

2012.10.15 

春夏之交落起雪，單車翱遊噏喜悅

柯拿，大家好，

袋鼠國踏入春天個幾月，天氣愈嚟愈暖，上個禮拜初重熱到成30度。我鍾意夏天，因為日照時間長，上星期開始轉夏令時間day light saving，每日放工重見到大陽，而家同香港快三粒鐘。

天有不測風雲，真係冇講錯，星期五朝早返工時，落起微雨，又吹起泠風。估唔到原來一股泠空氣由南面吹上嚟，雪梨氣溫大降至得10-15度，藍山區重落起大雪。10月份落雪，並唔多見，好多地區，好似維多利亞州、坎培拉、雪梨地區都錄得唔知幾多十年最冷嘅10月，我面書Shared咗啲落雪相，有興趣可以睇吓。

踏入十月，開始愈嚟愈緊張喇，再下個禮拜日就係出發日子，要預備嘅嘢都八八九九，旅店、民宿都聯絡好。噚日再作旅行前最後一個路面單車練習，今次用咗4粒鐘踩咗70km，學揚利偉話，自我感覺良好。跟住呢兩個禮拜，將運動量降低，只係朝早做gym時踩健身單車就足夠。養好身體，避免受傷，精精神神去旅行。

因為要練車嘅關係，呢幾個月踩住單車四圍去，親身感覺到，雪梨，真係單車者天堂。地大人少，造就咗寬敞空間，尤其係星期日或者假期日子，路上根本少車，而且好多地方都喺馬路邊劃上單車綫，再加上，多數駕車者都十分尊重單車者使用馬路嘅權利，喺呢度踩單車，都可以話幾安全。

我係細膽嘅人，我只踩單車綫，一遇上同車shared嘅路，橫街小路還可以，如果喺大路，我就會踩上行人路。理論上，成年人唔可以踩上行人路，除非帶住細路仔一齊踩就例外。不過呢度住宅區（suburb）啲行人路，根本冇乜人行，我經常連續喺行人路踩十幾分鐘，可以見唔到一個人。就算有人，只需慢車，大家各行各路，唔會有乜麻煩也。再者，揸車嘅人都樂見單車走上行人路。喺呢度揸車，你見到前面有人踩單車，你唔可以就咁貼住駛過去，一定打燈轉綫爬頭，否則只好跟住單車尾慢慢等機會，咁樣做法，係呢度嘅揸車嘅態度。樹大有枯枝，當然都有粗魯駕駛者，好彩係少數，所以，幾時都要好小心。

要由我住嘅山區踩出雪梨down town，視乎選擇唔同路綫，要踩30幾至50km不等，途經好多個suburbs, 我唔需要預先設計行程，只需有一個大概嘅方向，踩到邊再睇路牌，我嘅經驗係，路邊指示非常清楚。而且雪梨好少高樓大夏，通常離好遠，就睇到地標，例如，出雪梨down town，好遠就睇到雪梨塔（Centre Point）或者雪梨海港大橋，跟住地標去，唔會盪失路。

雖然話幾安全，間唔中都有意外。最記得十幾年前，喺屋企附近一條大路，某個星期日，有一個十幾人嘅單車隊練緊車，對面行車綫有一架車，居然越線炒入單車群，車群好似打保齡，撞到散晒，好多人受傷，有一個女車手最後不治，魂歸天國。呢個烏琢琢嘅女司機，原來係華裔，啱啱至喺星架坡移民雪梨冇耐，當然即時被控危險駕駛引至死亡。又唔知點樣請到好律師，辯解話佢有病，當時忽然咳到七葷八素，控制唔到架車，先至發生慘劇，係意外嚟嘅！信不信由你，居然畀佢打甩，無罪釋放。據傳，事後，呢個烏琢琢司機再無心留喺雪梨，走返星架坡。信佛嘅，咁重唔係孽緣，本來互不相識，千里迢迢嚟攞人一命，真恐佈。

唔好畀我嚇親，小小心心，基本上係好安全嘅，邊個幾時嚟雪梨，我會建議佢試吓喺呢度踩單車。

呢首係我踩單車，時時會唱嘅歌:

  大家跟住唱 

     曲︰許冠傑

     詞︰黎彼得

     大眾踩單車郊野上　良朋共享身心舒暢

     互愛坦率相向　何必多嘢想

     大眾野火會山嶺上　油油綠草天生天養

     漫舞輕歌　可以大家跟住唱

     時時要玩番下　駛乜心都傷

     日日要喜洋洋　無謂咁緊張

     時時要輕鬆下　將清福享

     日日笑口如常　就更加會命長

     就算有心想搵對像　何妨互相走入情場

     共你一雙一對　攜手映吓相

     瀑布水花高飛百丈　潺潺自晌音韻悠揚

     綠野青山嚮遍　大家跟住唱

     啦啦啦啦啦啦　啦啦啦啦啦啦

     啦啦啦啦啦啦　啦啦啦啦啦啦

     日日笑口如常　就更加會命長

再噏過，

嚤囉