2013.04.04 噏啲假噏啲真，真真假假咁易分

2013.04.04 

噏啲假噏啲真，真真假假咁易分?

秋天又過一個月，袋鼠國踏入中秋，一早一晚都較涼爽，日照時間愈嚟愈短

可活動時間亦少咗，所以我鍾意夏天多啲。希望可以繼續保持活力，㩒住個肚腩，唔好畀佢過大。

上次登咗大小姐嘅唱歌短片，我梗係覺得好至介紹畀大家，反應正面，多謝鼓勵。

近期袋鼠國就紅爆喇，有喺袋鼠國讀唔成書嘅「人」（冇人性嘅人，喺生物學分類下，都可算係人啩），殘殺雙親，咁恐佈嘅嘢，我冇興趣講。又有喺袋鼠國讀法律嘅，回流香港，喺議事堂上嗌爆咪，對住直播，大叫 bloody, freaking, fxxking Chinese。佢爆粗，咁我又講下粗口，實在 bloody 唔算係乜嘢粗口，我初嚟步到時，就成日聽袋鼠佬、袋鼠婆講 bloody hell，意思係：乜嘢話?咁都得?弊傢伙!等等。今次去中美洲，同班英國佬相處咗十幾日，都成日聽佢哋講 呢句嘢，袋鼠老鬼講bloody hell，正正係承襲自佢哋嘅宗主國。

後生嘅澳洲仔，澳洲妹，好少講呢句嘢，呢啲係英式老餅嘢。後生多數美式，佢哋一出口就 F 嘅嘞，當然都要睇埸合，正經埸合，或者對住長輩、陌生人，絕唔會出 F，同輩嘻嘻哈哈講，一啲問題都冇。你睇佢哋嘅面書，成日見到 WTF，就係 what the fxxk， 嘅簡寫，同bloody hell 意思差唔多。𣎴過話時話，袋鼠國，移民國家，多元文化，每去到種族議題，都會好小心。除非想打架，F 後面加上種族名稱，絕對出唔到口。

粗口大狀衰咗之後，即刻潛咗水。不過我認為，以佢咁好鬥嘅性格，唔會咁順攤，今次濳水，好可能係譚主席為咗止蝕，命令佢收聲。話口未完，佢喺大公報寫咗篇嘢，話袋鼠國大選，選舉前，人民都唔知邊個做總理，只係估估下，咁講喎。

既然講到袋鼠國，我又要出句聲。實情係咁嘅。每次聯邦大選，都有兩個任務，其一，係全國一人一票，比例代表制，，選出上議員 senators ，代表自己個省或領地，組成上議院 senate。其二，係分選區，一人一票，單議席單票制，選出眾議員 members of  parliament ，組成 眾議院 house of representative。

大選唔會選出邊個係乜嘢乜嘢部長，當然亦唔會直接選出總理。政府係由眾議院多數黨(執政黨）籌組而成，黨團（ 袋鼠文叫caucus 或 parliamentary party ，就係執政黨全部當選黨員組成）開會後，就組成內閣，公佈邊個係總理、邊個邊個係財長、係部長等等。 

咦，你會話，粗口大狀都冇講大話噃。佢都話喺大選前，邊個係總理，袋鼠佬都係估估下。特區選舉就唔同嘞，北大爺預選咗幾隻狼呀，豬呀、貓呀、狗呀等等，畀你特區老伯姓揀，邊隻嘢跑出，都走唔出呢幾件，咁，咪重透明過號稱民主嘅袋鼠國哩?!

粗口大狀冇講嘅，就係，喺大選前，所有人（係!所有人，當然係心智成熟嗰隻）都知道，總理，就係執政黨嘅黨魁。個黨可唔可以當選，黨魁嘅民意係決定因素，所以經常有民意調査，就係問袋鼠民眾：喺工黨、自由黨，呢兩個黨魁中，你鍾意邊個做總理?即係話，黨魁正正係帶領個黨取勝嘅関鍵人物。我好難想象會有咁㨾嘅情形出現，就係，黨魁帶領個黨羸咗大選，但係，籌組政府時，佢居然唔係總理???

當然政黨內部會有黨爭，上屆聯邦工黨政府總理陸克文，即係識講國語嗰件，做咗一年多啲，就畀自己黨團內嘅黨友吉拉迪 Julia Gillard 推冧，(係偉大祖國，咁樣叫政變，係你死我活嘅階級鬥爭，唔講得笑，係會血流成河嘅。不過喺袋鼠國，就閒過立秋嘞）。Gillard 成為袋鼠國首個女總理，寫下澳洲史新的一頁。咁樣換總理，唔駛經過大選，只需經過黨團投票贊成。

無論啲政黨點換黨𣁽，目的只有一個，就係要喺下次大選之前，推出一個得到多數民眾選票嘅人。after all ，要邊個做總理，要點樣嘅政府，只有人民有得 say。逆民意嘅政府，下次大選，人民就會用選票話過佢知。

袋鼠國今年九月14日就係聯邦大選喇，自由黨就多數會由 Tony Abbott 帶領。至於工黨，Julia Gillard 口碑唔多好，排碳稅一役，令佢變成大話總理. 名嘴改佢名叫 Ju-liar Gillard（原因係上次大選前，佢承諾永不推行排碳稅，最後食言。咁，同阿狼話N年唔選又去選，有得揮），佢失晒民望。而家工黨面臨嘅選擇，一係，用番 Gillard 爭取連任，不過會好險，一係，叫番陸克文出嚟。究竟結果會係點，今年九月自有分䁱。

公道啲講，粗口大狀，冇講大話，佢只不過係講啲唔講啲。政治謊言，唔需掰大眼全部講假，梗係有真有假至呃到人。白髪詩姐，佢講特首愛囯係必要條件；舊電池譚珠姐，佢講普選唔包提名權；健康用品 sales，佢 賣遠紅外線底褲，呃阿婆話醫經痛，等等，全部都係有真有假，咁至呃到人。  

橫掂都係揾老襯，不如做盡啲。我畀啲子彈粗口大狀:

聯邦大選過後，勝出政黨嘅黨團組成候任政府，咪開心住，重要過一関。候任總理率領候任內閣 cabinet ，一齊覲見女皇陛下•••••• 派駐澳洲嘅代表，即係澳洲總督 the Governor - General。一一介紹內閣成員過阿督，阿督發一輪噏風，就代表英皇簽字委任，至此，新政府先至正式成立。

粗口大狀大可以話: 唓!你袋鼠國咪又係咁衰，咪又係殖民地一個，連組成自己嘅政府，最後都要封建女皇批準，講乜嘢民主?!

咪以為我講笑，粗口大狀有一日真係咁噏，我唔會覺得出奇囉。

再噏過

嚤囉