2013.06.30 明日呢支歌，該做唔好拖，無謂要噏sorly 囉。

2013.06.30 

明日呢支歌，該做唔好拖，無謂要噏sorly 囉。

柯拿，大家好，

六月份係袋鼠國嘅冬天，雪梨地區，呢幾個禮拜都keep住喺3度至17、8度之間。泠，唔係大問題，最衰就係落雨，幾個禮拜都唔停咁落，又濕又凍又大風，實在好唔舒服，呢種天氣，睇嚟重會持續好一陣。見唔到太陽，令人耷頭耷腦，冇晒mood。

五月甶台灣返嚟，唔知點解，成個人跌晒watt，除咗返工之外，又懶寫嘢，又懶去 gym ，連肚腩仔都....，總之冇晒動力。本來習慣去完旅行都補寫旅記，到今日都未郁過。又成日畀自己藉口，話今日太忙，噚日唔夠瞓，等等，總之...... 聽日先喇。無無聊聊走去照下鏡，諗起明日歌。

錢鶴灘 (?) (1461 - 1504）

明日復明日，

明日何其多。

我生待明日，

萬事成蹉跎。

世人苦被明日累，

春去秋來老將至。

朝看水東流，

暮看日西墜。

百年明日能幾何？

請君聽我《明日歌》。

唔得唔得，咁懶，點對得住咁多默默支持我嘅人（哈哈，我好鍾意＂默默＂呢兩個字，沉默大多數，畀人利用，就梗嘅啦，我點會執輸）。各位一直默默愛戴我嘅人請放心，我會審時度勢，喺適當時間，優化我啲 watt數，作出適度有為嘅舉措，努力!奮鬥!

我又話跌watt啫，袋鼠國聯邦工黨就真係大劑喇。自公報大選日期（9•14）之後，民調顯示執政工黨危危乎，有機會大量失議席而倒台。呢位澳洲首位女總理Julia 吉拉迪，根本束手無策，民意支持度江河日下，工黨繼續畀佢做黨魁，一定冇運行。一直唔順佢嘅，前總理 Kevin 陸克文（識講國語嗰件），自從三年前畀 Julia 奪位之後，三次喺工黨黨團 ，the caucus ，挑Julia 機，希望重奪總理寶座。每次失敗之後，都大大聲話以後唔再挑機嘞（語言偽術?阿狼並不孤獨）。陸克文唔止識中文，可能重識些少中史，受到曾文正公打太平軍事蹟嘅感染，屢敗屢戰，上星期四，喺工黨黨團會議，以Caucus ballot 12票之微，以其人之道，還自其人之身，終於可以重奪黨魁寶座。第二日，隨即覲見女皇陛下駐袋鼠國代表，the Governor General of kangaroo ，再次冊封為總理。不過呢個總理位坐唔耐，原因係兩個月後就係大選之期，當任總理又要見總督一次，宣佈解散國會，先至可以進行大選。

聽到香港電台報呢段新聞，報導員話：「 澳洲政局有變......」。唔知嘅，畀佢嚇死。政局有變?係唔係好似土耳其、巴西咁，出晒防暴隊，又燃燒彈、又摧涙氣咁呢?實情係得工黨呢102人，喺黨團一邊飮住咖啡，一邊舉手，咁就完成政變。政變後 Julia 又去握手恭喜陸克文，大家嘻嘻哈哈摸酒杯底，雖然內心媽媽聲，表面都必定彬彬有禮。冇嘢嘅，文明嘅遊戲就係咁玩嘅啦，輸咗嘅，唔駛被人一世軟禁至死，浄係畀打golf，又或者要合家富貴，墜機溫都爾汗，更加唔駛被打成叛徒、內奸、工賊，死時髪長及腰咁暴戾嘅。喂，公道啲，有golf打，都算係咁喇，有進步喎。慢慢嚟，畀多百幾二百年我，一定進步過你而家。大家慢慢等。

澳洲政變，閒過立秋，電視當然有播，袋鼠國民當然鍾意睇 rugby 多個睇你班政客做戲。冇嘢嘅，無論而家你工黨選出乜嘢人做總理，到9月，人民自然會一人一票話過你知，我哋鍾意𠴱個係乜水。

政府，管治團隊（最憎講"班子") 、政治領袖嘅上上落落，好簡單，最後就係人民嘅意願。睇下袋鼠國，再向北望，唉，不勝唏噓。中國人嘅榮譽，絕對唔係火箭升天，蛟龍潛水、澳運金牌，飛機大炮，更加唔係大款陸客，狂掃地產、LV。習阿總，你嘅夢同我嘅夢，真係好唔同。

袋鼠政變風波，根本就係喺茶杯裡面而已，真係濕濕碎，香港就真係打緊風，係貨真價實嘅風暴 - 颱風。聽日出嚟行街，根本就係一種挑戰，一係就熱到溶，一係就行雷閃電落大雨。學阿孟子話齋，天將降大任於斯人也，必先畀啲考驗過你嘆。你去阿棠哥嗰檔慶回歸又得，行出街話畀阿狼聽，呢個管治團隊唔掂亦得，總之唔好沉默。我哋唔講嘢?嗰啲有權有勢，有飛機大炮嘅，就會話代表我哋。都幾十勾嘞，我哋唔係為自己，為嘅，係阿仔阿女，同埋阿仔個仔，阿女個女......。

有一日，好似袋鼠國咁，香港人個個寧願睇踢波，都唔駛睇啲政客臺戲，因為人民有最後話事權嘅話，咁樣嘅國家，我會覺得榮譽。不過........睇嚟，呢個真係一個夢。

明日歌又令我記起明日之歌。

明日之歌，

作詞：沈華

作曲：顧嘉輝

我要你為明天歌唱　我帶著淚珠切切盼望

我去了　我去了　明天的花兒一樣香

我去了　我去了　明天的太陽一樣光

我要你為明天歌唱　我帶著淚珠切切盼望

分別了　分別了　明天的美酒你獨嚐

分別了　分別了　明天的歌曲你獨唱

為了我們明天難相見　此恨綿綿問蒼天

把枕邊細語　一句句記在心田

對明天陽光　一聲聲引吭向前

明天　明天　我們在夢中再相見

啊 啊 啊 啊

我要你為明天歌唱　我含笑留下這篇詞章

忘了吧　忘了吧　明天不再是哀傷

記住了　記住了　明天是充滿了希望

再噏過

嚤囉