2012.07.31
袋鼠先生噏歷史，點會唱好咪心痴。
柯拿，大家好，
七月係袋鼠國最凍嘅月份，南半球，聖誕節喺夏天，袋鼠佬冇冷天聖誕，好唔過癮，所以到七月，就搞Christmas in July，各大商店都大減價，借啲意促銷貨品。不過，呢啲都係以前嘅事，近幾年，都見唔到有商場再攪Christmas in July。一個「節日」，就咁消亡。
再上個星期日，又同中大友行山，呢段17km路徑，我行過一次，今次再行，感覺自己fit過上一次，可能係經過尼泊爾訓練，fit咗。井少，重有冇繼續經常鍛鍊，保持最佳狀態？
一日，如常一路開工，一路聽大班台，忽然聽到阿珊把聲。原來佢烽烟去電台，講嘅就係鬧得熱辣辣嘅國民教育。咁多人講，我都趁吓熱鬧。
啲人話，「國民教育，有乜出奇，全世界都有嘅喇！」第二啲地方我唔知，袋鼠國就冇啲咁嘅科目。但係學生可以從地理、經濟、歷史等科目，學到有關袋鼠國嘅知識。
又有人話，教育梗會「正面」評價國家。袋鼠國又唔係咁喎。學校只會平鋪直敍澳洲歷史、政府、社會架構。絕對唔會讚揚政府，更加唔會吹捧政黨。啱啱相反，教師經常批評政府，又成日罷課，例如要求加人工，咁點會對政府有好說話講！更甚者，有啲被稱為white guilt嘅教師，佢哋上堂會咁話：1770年captain James Cook INVADED Australia，之後，如何殘酷對待土著，又偷走佢哋嘅細佬（即所謂stolen generation），用西方思想去煙滅土著文化…etc。教育部亦規定，要話畀所有小學生知，有人會將澳洲國慶日Australia Day 叫成Invasion Day！咁樣夠唔夠「正面」！
呢度，都有patriotic「愛國」嘅觀念，例如，土著跑手Cathy Freeman喺2000年雪梨奥運，羸得400m金牌，披住袋鼠國旗繞場一周，可以稱為patriotic。但係就冇「唔愛國」嘅觀念。你可以，作為一個澳洲人而自豪，但冇人會逼你去「愛」。例如報業大享梅鐸就係由澳洲人變成美國人，冇人會標纖佢唔愛國。
「愛」，出自內心，逼唔到，亦教唔到。袋鼠國，冇人逼你「愛」佢。記得我入藉時，有一個面試，就問作為袋鼠佬，有乜權利及義務。講到底，就要求你做一個守法嘅公民，至於作為澳洲人，係唔係一定要「愛」澳洲？who F cares！
其實，而家乜嘢世紀！重拘泥國民身分？今日係中國人，聽日就變成袋鼠國民，又如何？阿鳴係乜嘢身分？大羅、世恩、忠仔、阿Jo、嚤囉…etc，又係乜嘢身分？身分一啲都唔重要，最緊要，呢班人全部係好人J！即係話，不如用心機教導培養下一代，做一個好人，一個去到全世界每個角落都挺起腰骨，行得正，企得正嘅好人。為自己擁有攸長燦爛嘅歷史文化背景而自豪，亦尊重並融入居留地嘅歷史文化。咁樣，去到邊，身分認同都唔係大問題。
實在，「中國入身分認同」與及「愛國」，只係見仁見智。最大劑就係個解釋權永遠喺阿爺手上：
佢話：「中國人梗係愛中國，唔通愛印度咩？」--- 小學雞照鏡，見自己黄口黄面，就話中國人愛中國。
佢又話：「中國只有一個，全世界都承認嘅，重係安理會五常之一，叫中華人民共和國！」--- 小學雞計吓：中國人愛中國，中國人愛中華人民共和國。
佢再話：「中國共產黨係中華人民共和國政府執政黨，而且永不搞多黨輪替！」--- 小學雞即刻運算：愛國 à愛政府à愛執政黨
小學雞得出結論：香港人愛國愛黨，天公地道。
小學雞羅輯，係咁上下喇。
咁嘅國民教育，你想唔想你啲仔仔孫孫試吓呢？
講過好多次，我對香港民主化嘅前景十分悲觀。星期日，爹啲媽咪喺烈日下推住BB車，又或者抱住曬到面仔紅紅嘅金波蘿，走出維園表示訴求，我好感動。一時真係畀咗我一線陽光，但係……
9萬人？算乜？阿狼會笑吟吟咁話，你哋小數人嘅意見我聽到，不過，重有6百10萬人唔同意你。國民洗腦計劃將如期推行。多啲人遊行？罷課？又如何，等你遊完行，罷完課，再洗過。……！你點夠佢鬥。
有人話，香港仔，醒目見稱。國民教育課，為攞分數，考試評核自會講一套連自己都唔信嘅嘢。殊不知，咁就係道德敗壞之始。講大話唔斬眼成為習慣，哈維爾話，係謊言制度下，人人都要講連自己都唔信嘅說話，就成為謊言國家。
聽到電台引述一句話，願以此共勉：
All it takes for the triumph of evil is
that good men do nothing.
--- by Edmond
唔好以為唔関你事就繑埋雙手，壞事發生而不聞不問，等於為虎作倀，起碼幫口噏多兩句。
再噏過
嚤囉
No comments:
Post a Comment