2016.01.27 登陸之年咁又過，回顧前瞻噏嘢多。鍛鍊肌骨定計策，更有心力渡山河

2016.01.27

登陸之年咁又過，回顧前瞻噏嘢多。鍛鍊肌骨定計策，更有心力渡山河

自造新 carport ，創造GDP

柯拿，

大家好

2015 ，我嘅登陸之年，「雀」一聲，又成歷史。呢一年，真係打破常規，做咗好多從未做過嘅嘢，其中所遇嘅事同人，畀我一個全新嘅角度去體會人生。

2014 年6月，放棄做咗二十年嘅鋪頭，個感覺好奇怪。嗰時，我問自己：咁樣嘅狀態，究竟係失業吖，抑或係退休呢？問下問下，個答案就自己浦頭喇。卻原來，其實又使乜問？呢個只係心態嘅問題，失業同退休咪係一樣，都係：唔使做嘢，又搵唔到錢咁解。搵錢維持生計，梗係重要，好彩都算係仔大女大，就算唔搵，都未死得住，咁又使乜去諗。不過，返而畀多咗時間同空間我去試下新嘢嘞。

之後，用咗千幾蚊，考咗個小型巴士牌，嘗試吓做旅遊巴司機導遊。而家「飛時卜」有個回望功能，每日都提醒你當年今日所發生嘅事。佢提醒我 2014年聖誕日，我原來帶緊班客遊緊雪梨市，原來晉身旅遊業，已經係一年前嘅事。

「事非經過不知難」。呢句嘢聽過九萬幾次，以為一字咁淺，點知果然字面已經解䆁晒。好多嘢，我做人做到登陸，先至親身體會得到。

睇返轉頭，我雖然生於窮等家庭，好彩喺街市長大，當然唔會華衣美食，但係笠記牛記，蔬菜肉食，從來不缺。記憶中，肚餓冇嘢食，天冷冇衫著，呢尐慘情，從未喺我嘅經歷出現過。及至烏啄啄做埋教師，更加係薪高糧準，永不炒魷，幾時擔心過生活？就算後來移居袋鼠國，轉變夠大嘞啩，亦托賴一切順順利利，生活無憂。就係因為咁，過咗半個世紀，從未體會過搵錢艱難！

直至有機會畀我試過做司機，至知道要喺老闆個袋度攞一百蚊，原來一尐都唔容易，先至體會，搵食原來真係艱難。好彩我而家，唔搵食都餓唔死！

2015 呢一年，可以講，係尋覓轉變嘅一年，乜咁啱又係一個甲子，又返返去乙未年，我出世嘅羊年。果真冥冥中已有啓示：咪就係重新再開始囉。

登陸之年咁又過，回顧前瞻噏嘢多。鍛鍊肌骨定計策，更有心力渡山河。

2015 呢一年，除咗旅遊司機導遊外，我做過老人痴呆病者小組義工，做過 meal on wheels 送餐義工，做過婚禮場地佈置，做過遊船河活動燒烤廚師。做過 handyman 幫人修理電燈水喉、修理花園設備 ⋯⋯ ，總之有得做都試下，咁又真係試咗好多嘢噃。

2016 年頭，隠隠約約都見到條路，睇嚟，如果順利，呢條路都有排行㗎，但望如此。我呢條路，唔似習總嘅「一帶一路」咁虚無。咁究竟係乜頭乜路？且聽我一路道來。

離開商場已經年半，用屋企車房開鋪，雖然生意唔多，但係都 Keep 住有客，又冇乜燈油火蠟，搵返尐幫補都係OK嘅。而家定工，逢星期三、四、五，朝九晚五，打開車房門做生意。冇乜生意時，咪做下屋企維修、基建等工程，咁都係維持緊屋企 GDP，有益有建設性！最近我喺屋邊 side yard 造咗個 carport pergola ，就係表表者喇。

而家，每個禮拜梗有一日去商場幫印度差仔開鋪，做返本行，手板眼見工夫，十分輕鬆。差仔間鋪尐 Kui Lo （差仔咁叫佢哋）， 件件都有呢樣嗰樣嘅問題，成日又唔返工，咁我又成日有機會炒多兩日。差仔畀人工都算手鬆，計起上嚟，收入都過得去喇。再加埋阿仔 Ivy 檔生意，咁上下都有尐古古怪怪嘅散工做，一年落嚟，絕對唔會話無所事事咁無聊者。

袋鼠國民，一到六十，就榮升高級國民。前排，我喺網上註冊，冇耐就出咗一張 Senior Card 過我。呢張咭，記得廿幾年前，尐客嚟我舖頭出示此咭，就有優惠價。就算到而家，去麥記，仍然可以免費飲咖啡。嗰時，我叫呢張嘢做「老人咭」！流水行雲，今日，我個銀包就有一張！呢張咭最大嘅優惠就係可以搭平車：省內所有政府交通工具，包括火車、渡輪、巴士，無論搭幾多次，去幾遠都好，每日唔多過袋鼠幣兩個半（A$ 2.50）。咁係要鼓勵高級國民多多郁動，唔好匿喺屋企做宅男宅女，確係一片苦心嘅。話返轉頭，高級國民，同退休食糧係兩回事，我仲有四年至達到呢個食糧境界，到時再噏呢件嘢。

2015年，因為改變咗角色，我發現，唔同嘅遭遇，唔同嘅心態，原來會帶嚟全新嘅人生體會。

鬼子佬話齋： we learn something new everyday ；香港人，開講又話：鑊鑊新鮮，鑊鑊甘。又有云：一百歲唔死都有新聞聼⋯⋯，果然真珠都冇咁真。原來，一尐「阿媽係女人」嘅道理，本來講都無謂，就係過去呢一年，畀我認識到，「知道」同「體會」到，原來差異係咁大。

以前，話晒都係老細，雖然係醎脆花生檔，喺呢度，我最大！我話一就一，二就二。邊個客腌尖腥悶，串串貢，又話要乜又話要物，我就唔做佢生意，叫佢過主。當然而家我都串得起，就算得失尐刁客，我都唔會畀嚿屎 （I don't give a shit）。不過，為咗照顧差仔檔生意，見到嗰尐麻煩客，都會收口，窒少佢哋兩句，無謂去到咁盡。再者，工作過程中，亦要照顧其他同事嘅不同工作方法，唔係自己想點就點。原來，而家嚟同人打下工，個感覺，就已經好似窒住窒住，唔多暢快！我心諗，如果而家，仲係仔細老婆嫩，等錢開飯供屋；又或者要貯定多尐錢，驚死臨老唔過得世⋯⋯，我咪要揸到條頸，好似燈芯咁細，乜嘢都要「嗗」聲吞咗去⋯⋯，咁咪好悲！

有對比，先至知（體會）幸福。回顧一九七九年開始打工，爾來，三十有七年矣。我嘅工作歷史，從未（起碼係絶少）受老闆氣、受同事氣、受客人氣（學生都係客，係 clients ）⋯⋯。工作冇壓力，職場氣氛和諧，仲好好玩𠻹。薪高糧準，從未驚過冇工做⋯⋯。每日開開心心返工，開開心心放工。既然工作冇怨氣，又何來會將怨氣帶回家呢？經濟穩定，又冇怨氣，屋企就和諧喇。今日，做個登陸小結：計埋我不覊嘅童年及青少年時光，而家真係可以大大聲咁講，過去大半個世紀，touch wood 乘以 n，I am spoiled。

「幸福唔係必然」，呢句「阿媽係女人」嘅頭號精句，今日，我又深深體會到。我哋呢尐戰後嬰兒，都有幸經過，只要有工返，肯做下嘢（有時仲唔使好努力。唔好意思話自己，就睇下旁邊幾多扶轆「成功」人士，有尐仲係你老闆𠻹），就一定得到唔錯嘅報酬嘅 good old days。比較一下而家八九十後，千禧嬰兒，任你朝七晚十一，都只係夠錢食A餐同埋租劏房。而家仲可以憑自己人工可以買樓？係咪開玩笑呢？呢一代，個個都知，始終有工做都好過冇，咁你仲敢唔敢 gee gee gut gut ，又話為公義，又話搞社會活動？仲夠唔夠瞻向建制 say no 呢？我諗，設身處地，如果我仲喺香港教緊書，任教XYZ商會金銀銅紀念中學，嗰尐校監校董，唔係人大政協，就係同偉大祖囯做緊生意，你估份國民教育會係乜嘢內容？企喺學生面前，可以講尐乜？冇自由時間，冇自由意志，實在可悲。上天憐憫，好彩，我唔使面對呢尐難題。

所以，每當有尐嬰兒潮寵兒，喺指責當世青年人唔努力之餘，更加不忘指住自己個鼻，話自己之所以咁成功，就靠自己巴閉及努力。我一定同佢抝：其實，一個人嘅際遇，又點可以單靠自己努力，其中上天畀你嘅「彩數」，我講得保守尐，八九成，走唔甩。「幸福知所感恩」，雖然又係阿媽係女人。不過，今年，我體會好深。

阿媽係女人，咁係常識。不過當今之世，真吊詭，常識，原來未必係常識。我一向以為民主、自由、法治，公平選舉，一人一票，以至港人治港，高度自治等概念，應該係常識啩。行行下，至知，我以為係常識嘅嘢，佢畀個全新演繹過你，嚇到你跌咗個下巴落嚟。仲慌死你唔信佢，好多大學校長、醫生教授、唐人鬼佬，商政猛人、鄉紳巨賈，一齊幫口，佢哋粒粒皆星，各有專精，唔係的士佬，唔係街市婆。佢哋解過你聽，點到你唔服。我即刻又諗起考古學家、大詩人郭沫若嘅兩個太陽。又諗起美國學成回囯嘅物理學家、中國火箭之父錢學森，佢論證畝產萬斤糧食嘅可能性。原來兜兜轉轉咗大半個世紀，中土讀書人嘅骨骼依然精奇，依然柔軟輕巧。我活到今日，好彩仲未死，有幸畀我有機會聽到，不少讀咁多書、咁有學問嘅人，可以講出尐咁嘅嘢。

2015年尾，常識又有新突破。救市可以暴力、出境可以用自己方式、可以拍專輯話自己非常自由，教徒又可以喺天堂 book 咗位 ⋯⋯ 等等⋯⋯等等⋯⋯。一百歳唔死，真係有好多新聞聽，哈！而家先至係開始。

常識，始終係常識。堅守常識呢個信念，我仲未放棄。一時扭曲咗嘅嘢，只係歷史砂石，我信人類會自我修正，只希望時間唔好太長，犧牲唔好太過慘酷就好嘞。不過，時間太長，我都冇眼睇喇。如果有咁嘅一日，當常識變返常識，學陸游話齋：家祭毋忘告乃翁喇。我悲觀。

我好自私。好彩，我走遠咗些少，我尐細路得以喺簡單、和諧、講道理嘅國度成長。大家嘅意見、理念儘管各異，但係，堅持常識，擁抱現代價值，就植根心中。呢種感覺，今年更甚。我慶幸。

講完回望，係咁意都前瞻一下。2016，蔣家都應該會有尐新突破，打破常規，冇咁悶，梗係好事喇。又希望身體各個関節，聽聽話話，發揮活動本能。肌肉肚腩，各安其份，應大則大，應細則細。行得走得，食得放得 ⋯⋯ 諸如此類。有咗呢尐動物本能，先至可以四圍走，昇華大腦皮層質素。我期望。

我係見步行步嘅人，不過，旅行就要提早計劃，驛馬星將會喺本年六月出動，維時竟月。而家希望個膊頭生生性性，快尐好返，等我可以按計劃馳騁沙場。我出發！

再噏過

嚤囉