2014.05.02
出路遇貴人，唔駛震騰騰；噏下廿年轉眼間，世事常變是等閒
Alan Brown 同佢阿嫂 Lona Brown 绝對係我嘅貴人
柯拿，大家好
大小姐 Share 咗我面書嘅帖，又加上佢嘅說話。裏面咁樣嘅有一句：there is a new
season for everything ⋯⋯。咁熟口面，即刻查一查，原來出自聖經，傳導書，原文係：For everything there is a season, and a time for
every purpose under heaven。Ecclesiastes 3:1 第二節就更加出名：生有時，死有時；栽種有時，拔出所栽種的也有時。3：2。
星期一朝早，開開下工，收到商場管理處嘅消息。傾咗好耐嘅續約問題，終於有個了結：談判破裂。我哋要求減租續約，佢唔肯，五月廿九日 租約期滿，就各行各路。喺呢個商場工作咗二十年，卒之告一段落。知否世時常變，變幻原是永恆。果然係真珠冇咁真嘅真理。
1994年，移居袋鼠國第二年。誤打誤撞入咗補鞋呢一行，當時喺一分鐘先生公司打工，我專揀四圍做替假，希望多啲了解唔同區域嘅行情，揾足資料，以作將來可以開一個補鞋檔做好準備。冇耐，公司派我長駐
Carlingford Court 商場。呢個商場細細，居然有兩間補鞋鋪，除咗我哋呢間一分鐘先生外，另一間個名叫做
Cobblers 。當時，都唔知呢個英文字係乜意思，只見到鋪面有個細細粒鬼婆，裏面工場就有個肥躉躉鬼佬。同行如敵國，嗰時，同呢個補鞋佬，都冇乜兩句。
一日，呢間 Cobblers 門口，貼咗一張紙：Junior shoe repairer wanted。我諗，喺一分鐘先生公司打工，訓練又唔夠。只係做咗幾個月，就派間鋪頭畀我，我一個人就要獨當一面，自己有幾多料，自己最清楚。如果將來要自己開鋪，可能唔多夠料噃。而家正係好機會，可以長啲時間跟個呢件鬼佬學藝。睇個樣，佢年紀都唔細，都應該退休啩。咁我咪有機會可以接手佢呢間鋪！
行入去，對佢講：「我想喺度打工，不過，我想買你間鋪」。佢話：「買唔買鋪，遲啲至講。而家嚟幫手做住先喇」
。
係咁，就開始咗我喺呢間鋪頭嘅生崖，邊個估到，一做，就做咗成二十年。
招牌 Cobblers 呢個字，原來係一個古舊嘅英國字，就係補鞋佬咁解。舊時，冇補鞋佬，只有鞋匠，個個都識造鞋。成對鞋都造得出，梗係識修補，所以叫
boot maker。叫 shoe maker 都得，不過習慣多數叫
boot maker。到後來，真係造鞋嘅，就愈嚟少，補鞋佬都統稱 boot makers，就好似修錶嘅都叫 watch makers 一樣。而自稱 Cobbler，就有一分古意，所以我鍾意呢個名。
十幾年前，一日，有個客，佢望住個招牌，唸咗一首兒歌畀我聽，係一首英國童謡：
Cobbler cobbler mend my shoe
Get it done by half past two
My little toe is peeping through
Cobbler cobbler mend my shoe
Check out this video on YouTube:
最近，見到啲客帶埋細路埋嚟，我問佢哋識唔識呢首童謠。Hah，冇人識！要我呢個黃口黃面嘅教返佢哋。
1995年，正式喺 Cobblers shop 打工，慢慢就知呢間鋪頭嘅詳細故事。肥躉䠢嘅補鞋佬就係老闆 Allan Brown, 佢同阿哥
Gordon 一齊打理呢間鋪。兩兄弟曾經中過六合彩頭獎。可惜哥頓染病早逝。而阿倫太太亦於94年病逝。就留番阿嫂 Lona，同阿倫打理鋪頭。
阿倫係風流嘅人，成日有女朋友嚟鋪頭揾佢。Lona 曾經同我講。He went out
with girl friends. Poor Jenny， 阿倫妻, her body was still
warm. 原來鬼佬都講屍骨未寒。試過有一次，兩個女朋友，一個現任，一個前度，咁啱一齊嚟揾佢。佢哋鬼咁大方，仲三人行，一齊去飲咖啡。
有咗我幫手，阿倫可以每個星期四去打高球，又唔駛返星期六，佢當然好高興。而我又學咗好多技術，而且又學會操作一間鋪頭嘅每個細節。正是，各取所需，相得益彰。
九個月過後，佢實踐承諾，將鋪頭賣畀我。阿倫同 Lona 亦繼續幫手，舖頭平隱過渡。呢一區屬中產，啲客人又好，咁多年來，托賴，生意穩定。鋪頭嘅收入，距離大富大貴，有十萬八千里。但要養活一家人，衣食無憂，就真係問題唔大。
回過頭來，我哋移民澳洲，無人無物。初嚟步到，仔細老婆嫰，又冇積蓄，都唔知可以靠乜嘢為生。忽然去咗呢個商場，忽然又遇到 Lona,、阿倫。佢哋兩個喺嗰時出現，正正解決咗我生活嘅問題。為此後十幾年，蔣家、大少爺、大小姐，打下安居袋鼠國嘅基礎。佢哋絶對係上天派嚟照顧我哋嘅天使。能不感恩！
1999年，Allan 跟帆船去環遊世界，順便退休。而 Lona 一直都繼續有出鋪頭。當然只係每周一兩 日。直至2012年，近八十歲高齡，先至再冇出鋪頭。到而家，咁上下，佢兩位老人家都會嚟行下商場，都會嚟鋪頭傾幾句。
呢個區，Carlingford ，最近兩、三年變化好大，好多來自大陸嘅新移民住咗入嚟。我哋呢行，專做鬼佬鬼婆生意。太多亞洲人口，不利我鋪頭。兼且鋪租又愈嚟貴。此消彼長，邊有數為？
世事，邊有嘢可以永遠不變。睇嚟，我哋都要改變一下心態，迎接新嘅生活。好彩，咁大嘅轉變，喺而家先至出現。大少爺已經自立，大小姐亦唔駛點理佢。負擔輕咗，風險大減，亦算萬辛矣。
將鋪頭機器、工具，材料，全部搬返屋企。將車房改成工場，用電話、面書、區報等方法聯絡客人、親自上門收鞋送鞋。⋯⋯，總之乜都試下。據講，上帝閂咗道門，一定開番個窗。而家係時候揾番個窗喇。咦？個窗喺邊度呢？
再噏過
蔣
No comments:
Post a Comment