2012.07.11 港茶噏天地，嗒糖甜到痺

2012.07.11 

港茶噏天地，嗒糖甜到痺。

柯拿，大家好，

七月份係雪梨最凍嘅月份，每朝起身日出前，屋前草地到結咗一層白霜，太陽一出就溶哂嘞。我全年出街、返工，都只著Tee，一來，駛乜講，當然因為我祗得冷。二來，出街就跳上車，落車就入室內，好少喺條街行，咁就唔駛着太多衫嘞。但係，我喺屋企，返而要著番件褸。原因喺，屋企好少開暖氣，而我喺屋企多數係坐，無乜點郁，愈坐就愈凍。加上阿珊唔喺屋企，冇人開伙串，間屋就更凍喇。所以我喺屋企著衫多過出街。

多謝世恩提供大班台個節目重温網址，一早都知大班開台，試過就咁聽現場，窒得好犀利，喺youtube聽又唔方便。而家好正，我用FM插電腦播出，袋住MP3收音機仔，喺舖頭四圍走，一路開工一路聽，爽！

七月初，雪梨學生放緊term break，雖然話放假，蔣家大小姐都忙住工作，又要教唱歌，又要幫人補習。我好欣賞佢自食其力，入咗大學後就盡力揾錢養自己，最近連星期日都幫music school搞埋樂隊，佢個目標係今年年尾去美國，花晒啲銀両，返嚟又揾過。啱！銀係揾嚟使嘅！work hard play hard係蔣家座右銘。

今日晏晝，大小姐約我食lunch。原來佢朝早補完習，下午再要返music shool教唱歌，中午空檔食飯就叫埋我，我即刻lur飯應喇。两父女坐喺著名嘅香港茶餐廳，一路食滑蛋牛河，一路閒話家常，都好温馨喎！講吓佢大學啲生活、講吓佢工作嘅開心與唔開心……等等。大小姐繼承咗蔣家傳统，十分talk得，同佢講嘢包冇冷場。唔夠一個鐘，佢要趕返工，我叫佢走先。臨走，佢放低50蚊，「Dad，今餐我畀錢喇！」然後怱怱忙忙走人。我攞住呢50蚊都反應唔到，不過，嗒晒糖就梗嘅嘞！

呢個禮拜日，又去咗踩單車，都係踩出雪梨down town，不過係唔同路綫，今次只踩咗45km，但膝頭已經感覺痛。睇嚟，單車旅行方式，我唔多掂。每日50km左右，可能都OK嘅！單車相已登fb。

記起單車旅行，由大埔墟沿汀角路經大美篤、新娘潭踩到鹿頸。每次踩單車時，我心裡面就唱緊呢支歌，佢喺我攰時，畀我力量。

乘風破浪

顧家輝作曲,

盧國沾填詞,

原唱楊詩蒂。

　
時時望前莫後退
人人莫愁無伴侶
迢迢萬里也未覺疲累
條條遠路莫怕他
重重障礙莫怕他
人人勵行勵志不掉眼淚

帆盡高張　破浪乘風去
無限旅程　聯群和結隊
帆盡高張　破浪乘風去
無限困難　終須消失去

再噏過

嚤囉