2014.10.28 燒山火掟雪球，古怪天氣冇佢修；講普選噏自由，以假亂真恰你流

 2014.10.28 

燒山火掟雪球，古怪天氣冇佢修；講普選噏自由，以假亂真恰你流。

柯拿，大家好，

一到香港嘅中秋，袋鼠國就踏入春天，今年九月、十月，雪梨天氣古古怪怪，陰晴不定，搞到減少戶外活動。加上工作愈做愈他條，家廚美食照例源源不絶，正是此消彼長，最近照鏡一睇，個腩愈睇愈唔對路，真係要認認真真整個計劃搞搞佢至得。

雪梨四季分明，平時一踏入春天，都未使話去到夏天，又乾又熱嘅天氣，就係主旋律。記得舊年 10 月，雪梨西邊藍山地區，乾熱天氣加上大風，引起大火，百幾個火頭一齊燒，搞到郷郊消防隊 Bushfire Brigade 疲於奔命，四圍撲火。但係今年十月，一尐都唔熱。對上個星期二，離雪梨約100公里處，藍山腳下一個叫 Blackheath  嘅小鎭 ；我哋經常喺嗰度左近行山遠足飲咖啡嘅地方，氣溫居突然跌到零下三度，濕氣加埋大風，居然落起大風雪。袋鼠佬樂天知命，非常有童真，男女老幼走出屋外，嚟一場掟雪球大戰。

成個大雪梨市區亦橫風橫雨，最高陣風去到 160 公里，打風咁嘅款。到處水浸，又吹冧樹、吹冧電線桿，NSW State Emergency Services 紐省緊急救援服務，四圍出動救人，忙個不亦樂乎。正是：舊年走山火，今年掟雪球。個天會點樣，真係估佢唔到。雪梨天文台後來話，呢次反常天氣，係百年一遇 once in a century 咁講喎。好彩，咁大鑊嘢都冇嚴重傷亡，飲得杯落咯。

當日橫風橫雨之際，我正在同大小姐撐抬腳，喺唐餐館食緊燒鴨做晚餐。大小姐九個月大就嚟咗澳洲，佢自己身分認同，清清楚楚係一個澳洲人。不過話晒，都係香港製造，血管又流住華人嘅血，佢都注意到近排香港嘅風風雨雨，趁住兩支公食晚飯，兩父女喺澳洲風雨中，講吓香江風雨，又幾應景。咦！真係「故鄉的雨」噃。

匹布咁長，真個是，不知從何說起嘞。就由 1979 年講起，呢一年係我畢業出嚟打工嘅第一年，我點會忘記？1979年3月，阿督麥理浩靜雞雞上京，收到小平聖旨：「冇得傾，約滿搬走」。老鄧仲叫麥督話畀有錢佬知：「請投資者放心」。即係話，唔好走資，繼續有錢搵。仲講多句：「馬照跑，舞照跳」（我最憎呢句說話，跑馬？唔通係花式馬術咩？跳舞？唔通係快三慢四土風舞咩？呢班上大人，睇嘢以小人之心，喺佢哋嘅腦中，香港人，咪就係睹，咪就係嫖囉）。記得個時喺教員室，同事間都經常講香港前途問題。有句說話係成日攞嚟講笑嘅：「一國兩制，你制佢唔制」。35 年，彈指一揮，回頭睇返轉頭，原來仲有一句冇講出口：「點到你唔制？！」

麥督接旨後，好多事陸續發生：英廷戴太上京，喺人民大會堂跌一交；大 sir 率領俊團上京，畀老鄧訓咗一餐：「主權換治權，諗都唔使諗！」⋯⋯⋯⋯。總之，跟住嗰十年，出入京港兩地，各方豪傑，人馬踏踏，你又噏，佢又噏，好不熱鬧。不過無論點都好，都得出一個印象：香港係福地，係會生金蛋嘅鵝。殺鵝取卵？邊個會咁蠢？嗰時，香港一般人都對大陸冇乜好感，但係大石壓死蟹，又可以做尐乜？佢阿爺，又唔畀三腳櫈，香港人邊有置喙餘地？港人樂天知命，況且仲有排至97，使乜咁擔心，煮到嚟就食喇。

一般人係咁諗啫，嚤囉仔成長喺火紅年代，自細相信「只有共產黨才能救中國」呢句豪言壯語，雖然經歷71年9.13 林彪事件、76年 4.5 天安門事件、76 年10月，打倒四人幫事件。老鄧三上三落⋯⋯等等。不過，我天真爛漫，又懶惰，不看書，不看報，雖然內心都有尐衝激，有尐懷疑，但係，自細相信呢個嘅信念仍未完全破滅。加上胡、趙上場，一文一武，好比老鄧左右兩手，史稱「三駕馬車」，1978年，11屆三中全會推出改革開放政策，自此，五星旗下嘅中國，由市場擐境、言論平台，以至平民衣飾，都展現一片新氣象。咦，黨內果然出現健康進步力量，咁樣，香港回歸祖國，對我嚟講，十分自然，一尐問題都冇。

呢十年，經歷麥理浩、尤德、衛奕信三督，尤督仲以身殉職，取道京城，魂歸主內。

呢十年，中英港三地吵吵鬧鬧，一啖砂糖一啖屎。不過東方呢粒明珠，我自巋然不動，樓股勁升，百業興旺、人工勁加。

就係呢十年，嚤囉仔由學生變成先生；再贏得美人歸，跟住，小兩口買屋、生仔；進修、轉工、升職，忙忙碌碌，非常充實。而家回頭一睇⋯⋯

原來呢十年，正正係人生最璀璨嘅十年。

嗰時中英雙方，經常就住唔同工作範疇，開枱講數。有一次，趙紫陽喺散會後畀記者追問，佢主動回頭停低反問記者：「我真不明白，你们香港人到底怕什么 ？」佢又講得啱，嗰時中方放晒風：一國兩制，港人治港，高度自治，原來生活方式不變⋯⋯。總之就係換支旗，換個督，其他一切照舊。有我趙紫陽一日，你乜都唔使怕。佢拍晒心口，我雖然十五十六，都只好坐定定，𥄫實個勢，等候「民主回歸」。

充實璀璨時光果然好快過去，十年之期將屆。

點估到，老鄧先自斷左臂。1987年，胡耀邦畀人話佢反資產階級自由化不力，即刻炒魷。眨為庶民。兩年後，喺正我牛一嗰日，老胡榮昇革命先烈。同日，遠在英倫，發生希斯堡球場踩死人事件，最大鑊唔係引起民建聯老譚講英文： You'll never walk alone，而係引發起後果極其 ⋯⋯ 極其⋯⋯極其深遠嘅六四天安門事件。

點估到，會有咁嘅一日：全校師生唔使上堂，一齊由葵涌走到灣仔，我帶住班學生坐晒喺皇后大道東馬路中間，一齊唱國際歌！（一生人，有冇第二次可以咁做？）

點估到，初夏之夜，目定口呆，望住公仔箱，上演一幕：京城坦克大戰。

點估到，老鄧先斷左臂，再自斷右臂。老趙執包袱，趕出中南海。以後，佢大把時間打哥乎喇。

世事，點到你估。所謂福兮禍所倚，都好嘅，唔使估吓估吓。我仲點會信乜嘢一國兩制，港人治港，高度自治！⋯⋯就係咁，而家咪同大小姐喺袋鼠國食緊燒鴨晚餐囉。

白頭宮女話當年，而家噏兩噏，吓，乜原來已經係四分一世紀之前嘅陳年舊事！

記得當年老譚、嫻姐等人，成日將「愛國愛港」掛喺口，唔知係佢口快快，抑或人哋聽錯，以為佢講「愛國愛黨」。每次佢哋都即刻否認，當然再補多句：港人毋須愛黨。其實，呢尐說話，梗係廢話。先唔講「愛」係乜嘢，以中国羅輯，呢個地球只有一個中国，就係中中华人民共和国，中共係唯一執政黨，而且講明係永不搞政黨輪替，即係千秋萬世，壽與天齊。咁樣，子民愛國，就係愛黨，咁都係好起碼嘅要求啫。舊時講到唔清唔楚，係為你哋好，正如白髪詩婆婆話齋，初相識就客客氣氣，咁唔算講大話，喎。⋯⋯ 咁都得！

吾生也有崖，莊先生果然冇呃我。呢幾年發生嘅事，在在挑戰我嘅普通常識。乜嘢係民主？乜嘢係自由？乜嘢係法治？佢阿爺會畀個全新演繹過你。你要一人一票？冇問題，我㨂幾個治港精英過你揀，一人兩票又點話！咁夠晒民主嘞啩。你哋唔好要求多多，中共就係最大嘅民主黨派，而家香港嘅自由，多過英國佬嗰時 ⋯⋯。死未！

二十五年前，學生喺人民英雄紀念碑紮營，係要反官倒，反腐敗，要求政治民主化，新聞言論自由等。廿五年後，中国貪官勁唔勁？政治民唔民主？又有冇自由呢？死咗咁多人，搞咗咁多嘢。唔通真係白搞一場？不過，就算係白搞，我都唔會怪責呢尐學生，佢哋只不過係不平則嗚啫。我當然會怪責政府，佢係手握大權嘅一方。但係我又明白嘅，有權有勢就係利益所在，點會妥協？加上而家強国崛起，大把銀両，飛機大炮乜都有。放棄特權？放棄利益？開玩笑！

 隱藏郵件記錄

今日，紮營地方搬咗去香港，學生嘅要求好清楚，就係要政府找數。政府有人民警察，仲有噴霧警棍摧淚彈。學生都唔輸蝕，有眼罩口罩縮骨遮，仲有自己個頭、心口同埋背脊，都係擋警棍嘅最佳武器！我好悲觀，香港人唔係同特區政府鬥，佢阿爺有咁大利益喺香港，邊有得妥協？好明顯，學生係打緊一場冇得贏嘅仗⋯⋯，點收科？

⋯⋯⋯⋯。

講講吓，不和不覺，碟燒鴨都食咗一大半。大小姐又上咗一堂香港史嘅歷史課，佢好有興趣知道多尐我哋嘅過去。我望住佢，心諗，如果佢喺香港生活，而家佢會喺邊度呢？

（一）戴住示威三寶同警察對峙緊？咁，我會好擔心。

（二）坐喺會議室，商量緊點樣打擊呢班反中亂港嘅漢奸？咁，我會好傷心。

（三）吓，六四？普選？乜東東嚟㗎？關我乜事？咁，我會好激心。

呢個年紀，應該發展興趣，四圍去玩，打波又好，跳舞又好。點解要瞓街、又要喺馬路中間做功課。仲要畀爛鬼、南來僱傭兵打、閙、騷擾！

一個公道嘅制度，令社會和諧。從來冇人話過民主制度可以解決所有問題，但係，起碼唔使下下要出街晒冷。議會由人民自由選出，冇個阿爺叫你一定要揀邊個。社會上有分歧？好閒啫，開會四四六六拆掂佢。邊個黨，邊個政府做得唔好，三、四年後，人民用自己嘅一票，掟佢落台。朋友間唔同政見？唔使嗌交，亦唔使 unfriend，大選時，按自己睇法投票，開票後就知輸蠃。

當屆政府亦唔好以為冇王管，有敵對媒體，以及各類民間團體𥄫住。當然仲有反對黨嘅影子內閣，分分秒秒捉緊痛腳，隨時推翻政府，取而代之。

政黨、政府有咁多看門狗 watch dogs 𥄫住，人民就懶得就懶，大安旨意去瞓覺，去玩喇。

兩支公食唔晒咁多餸，要個盒包起佢，咁又可以食多餐。返到屋企，大小姐即刻換運動衫，又出街去 gym 喇。我睇吓我個肚腩 ⋯⋯，唔，都係要的起心肝喇。

再噏過，

嚤囉