2012.02.25 公事忙，晚黑返歸入大堂；發青光，看更亂噏問盛行

2012.02.25 

公事忙，晚黑返歸入大堂；發青光，看更亂噏問盛行？

柯拿，大家好，

上周啱啱噏起退休，噏起白駒過隙，又聽到淑姐榮休嘅消息。我鍾意講古，即刻撳回帶掣，搜索同淑姐生活交义點嘅片段。

淑姐喺我心目中，永遠係大姐姐嘅身份，至今不變。至於係幾時最初相認，真係冇印象。相信係同酸梅姐姐同台出現，即係七一年左右。當時，我喺摩工讀緊三行學師，摩工校舍未起好，借用當時嘅紅磡紅磚屋，香港工業學院（HKTC，理工前身）。我返學時，經常見到高佬（淑姐啊哥），佢讀TC嘅電機工程。

諗起淑姐，就係笑聲。開心時，爽朗大笑，毫不掩飾。相反，有時講起工作辛苦到痺，忙到冇得瞓，佢都哈哈大笑，雖然係苦笑。

葉劉話過「局長冇呃你」，你唔駛信佢。但我話淑姐唔會呃你，你一定要信。喜怒哀樂，所愛所恨，內心所感，無遮無掩，全部擺晒上塊面，Bee lee bah lah講晒出嚟，冇半句係大話！

有佢喺度，絕無冷場，淑姐講嘢又快，天南地北，乜都有得講。就算嚤囉仔口水多過茶，同佢傾偈，都要使出好多技術，先至搭得到嗲。同佢講嘢，絕對係樂事，不知時間之飛逝。

各位知我哎唷咁識彈結他。咁你又知唔知，我用嘅第一個彈他，就係淑姐嘅。係一個綱線弦嘅木結他。當時佢學緊彈（btw，淑姐，我有一張你彈緊結他嘅相），我一個唔該就借咗嚟彈。咦！講起嚟，淑姐，你喺啟發我彈結他嘅第一人。綱線弦，左手手指撳到一條條線痕，右手掃chords，掃到皮都甩理。淑姐，你重識唔識彈結他？嗰個木結他又去咗邊？我第二個結他，係啊珊1973年送俾我，一直陪到我而家。因為工作関係，而家手指愈來愈僵硬、本來已經短嘅手指，更加打唔開，更加唔靈活，彈起嚟，係有難度。幾時，睇吓睇時，我會重拾結他！

我第一次會考（我考過三次），放榜日，國術組正在大嶼山（長洲？）露緊營（集訓？），我喺離島打電話返香港雞問成續。接電話嘅係Miss Chan，佢話我知，有兩個F，就係英文同數學。一早知係咁喇，已經比頂期好喇。

渡輪上，我一個人行去船尾，倚欄遠望海港。陽光映照雪白的浪花，海風輕拂著我……（哈，夠詩意！）。此時，啊送走過嚟，問我，有乜打算？…我唔記得我答咗啲乜，但渡輪上呢一幕，我記得一清二楚。啊送，你有冇印象？

我嘅打算，就係重讀中五，嗰時嘅淑姐已經係Miss Ko，我可以入文理，都係因為淑姐嘅関係。一日，Miss Ko喺教員室改緊簿，生物Sir（唔記得名）大聲話：「Ha！咁交功課都得？！睇吓係邊個先，….，蔣--健--輝…..！」，淑姐繼續改簿，當聽唔到，實在尷尬。都係我累人累物，要同淑姐講聲對唔住。

講完sorry，講 thankyou。我讀書有幾叻，有幾勤力，大家心裡有數。大羅曾對我講，如果，我會考合格，就證明香港教育制度有幾失敗。為咗要證明港英奴化教育嘅失敗，我係咁意都温吓書。繼數學外（係死症！自小學一年班開始，我從未合格過），英文科係我每次考試都一定肥佬嘅科目。環顧九樓，當時邊嗰英文最叻。冇錯，梗係淑姐，佢同我補習，我每次都寫一篇文俾佢改。記得我成日都鍾意用一個字---indispensable，淑姐你對我話，「呢個字for you，is indispensable。」

喂！咪講住，重考乜嘢成績？

英文考到D，full cert，重有個cred。開心到我吖！

Mat屎又如何？

F…！

我今時今日，啲英文咁鬼叻（哈哈），淑姐居功至偉！重有，唔可以唔提，啊送都幫我睇過英文作文。小生今番謝過兩位啊姐喇。咦！好似未交過斗零補習費，兩位啊姐，點樣補償，你哋話事！

我同啊珊拍拖，淑姐係其中一個最早知道嘅人。唔似有啲道德情操置於巔峯嘅人，佢從未對我哋持相反態度。反之，有時我倆有啲乜嘢唔妥，佢都會俾到好好嘅意見。年青人嘛，鬧吓彆扭，閒過立秋。咪講細時，而家我間唔中都返老還童，鬧吓情緒。記得有一次，唔妥之事，又發生咗。我同淑姐講起，佢當然講咗好多嘢開解，但有一句說話，我受用至今。而且，呢句話，我亦話俾我乖仔乖女知，等佢哋知所進退。呢句說話係乜？……淑姐，中英談判、土委、千億土地儲備，一定塞到腦都爆炸，重邊有位置裝載少男少女濕碎無聊瑣事，你一定唔記得，下次見面，親口同你講番。

離開文理，師範畢業，到出嚟教書，有四五年冇乜見面。1985年，搬入柴灣康翠台。真有緣，居然同淑姐做咗隣居。嗰時係乜嘢環境？中英於94年簽訂聯合聲明，之後成立多個工作小組作籌備回歸之用。大家知香港土地幾值錢，淑姐喺土地委員會工作，住呢大筆財產，當時有幾忙，工作壓力有幾大，凡夫俗子如我，焉知其皮毛。各有各忙，都唔係多好時間見面。好彩畢竟住喺隔籬，有時食完飯，咁啱大家又得閒，就踢對拖鞋，踩上淑姐屋企嗲幾句，都係常有嘅。

打開話匣，收唔到聲。記得佢話，每次開完土委會，大批記者圍住影相。佢成日要左避右避，唔想入鏡。但避無可避就梗嘅啦，所以成日喺無線新聞見到淑姐芳容。我係狡滑嘅人，想套吓料。但當時嘅淑姐，已經再唔係英文教師Miss Ko，而係中華人民共和國外交人員，工作需要，說話當然有所保留。但爽朗笑聲依舊。話時話，淑姐，你曾經同咁多大人物同枱開會，中方有，周南、姬鵬飛、魯平；英方有，柯利達、尤德、衛亦信。重有，流香港血，飲香港水，當時嘅首任殖民他華人財政司曾蔭權。呢班政治家喺閂埋門後，點講嘢？儀態如何？你最有資格講，唔好俾歷史灰飛煙沒，幾時出回憶錄？

1986年，淑姐夫婿買咗架新Camcorder，李鷹當時三歲，幫細路留低影像，人之常情喇，我當時用緊super8。一日，我帶住唔夠一歲嘅蔣世翀去淑姐屋企，就影低世翀第一次用Camcorder嘅錄影，又喺我哋屋企影，跟住嘅周末，重去維園外影。國樑兄重配理音樂，又dup咗一餅帶俾我哋，呢餅帶我keep到而家，25年喇，重睇得，真犀利。之後，我自己都買咗Camcorder，放棄Super8此是後話。

移民袋鼠國後，見面機會當然更少。當時淑姐已服務特區金管局，忙碌更甚，工時長，重成日要開夜。每次返港，都打電話約見面，佢太忙，我留港時間短，唔係每次都見到。有一次約到，佢要十點後鐘至返屋企。我去到，菲傭姐姐煮麵俾佢食，我睇住佢草草食過晚餐，就坐喺飯枱同我話家常，如常，又係笑聲，又係bee lee bah lah，急速嘅說話。天南地北，乜都講到。講到工作忙不過來之處，都哈哈大笑，真佩服佢嘅樂天性格。記得佢話，因為經常夜返，樓下看更居然問佢做邊行？佢講完，又係哈哈大笑。犀利！呢次，唔可以講咁夜，第二日一早，佢又要去機場開工。

有一次返香港，我同個女著晒運動裝，由康翠台跑去杏花邨。跑落康民街轉去地鐵站。赫然見到淑姐企喺路邊，又唔係假期，唔駛返工咩？靜雞雞走埋去，嚇佢一跳都好。大家寒喧一番，原來佢扭親腳，而家放緊病假，出嚟行吓。原來悠閒，有時都要靠啲小意外。

舍下地處南半球，偏僻邊遠，18年來，不遠千里，踏足寒舍嘅老友，計有：鄭少、大羅、侯珠、侯寶、光仔、簡珠，小生謝過喇！八年前（？），淑姐都嚟過舍下。鷹仔喺澳洲留學，淑姐來探乖仔，當然不忘見吓老友。帶來金管局出品嘅禮物，而家重擺喺書架上。淑姐，你幾時再嚟？

如今，淑姐退下火線，祝福你可以用真正屬於自己嘅時間，過一啲自己揀嘅生活。節奏、速度快慢冇乜所謂，最緊要係為自己，為家庭而做。憂國憂民？等在位者去bother啦！

收嗲之前，揭吓密。淑姐叫高妹，當然因為佢姓高，就好似佢啊哥叫高佬，馬偉健叫馬仔，雷家潤叫雷公……等。但高妹唔係我叫嘅，因我識佢個陣，佢已經係啊姐級。就好似酸梅姐姐、玲姐、豐姐、貞姐、群姐…等。反之，佢唔會叫我嚤囉，會叫我嚤囉仔，就好似超仔、安仔、光仔…等。喺有輩份嘅。我又叫佢Miss Ko，當然因為佢係教師，就好似學生叫我蔣Sir一樣。

咁，點解係「淑姐」，而唔叫「順姐」，唔叫「卿姐」（呢個名……！）呢？我問得，梗知答案。各位想嚤囉解密，抑或你自己到時問佢，話過我知！

再噏過，

嚤囉