2011.12.21 淨係得佢噏，咁點得！獨裁者，快執笠！

2011.12.21  

淨係得佢噏，咁點得！獨裁者，快執笠！

柯拿，大家好，

星期日就聖誕喇，記得前幾年，而家就係山火季節，坎培拉黑色boxing day，幾個小鎮，斬吓眼一片火海，瞬即燒成灰燼。今日落雨落到飛起，多處地方河流泛濫。雪梨亦夠晒雨水，過一個濕濕凍凍嘅聖誕喇。

周日去咗踩單車，搭火車落咗雪梨以南200公里臥龍崗，沿海岸踩咗38公里，風光秀麗，感覺良好，Donna，可以諗吓喎。

又outing又飯局，搞到遲交周記。

星期一晚，網上聽港台「開心日報」，聽到話金正日去咗見馬克思！你知，林超人，何Ｂ，喺節目成日講笑。疑真疑假。開電視睇新聞。三八線以北舉國哀悼，電視新聞主播喊到震咁報導偉大统帥遠行嘅清息，畫面見到大街小巷，朝人又跪又拜，嚎啕大哭，淚流披面嘅震撼場面。正想開聲講啲啊媽係女人嘅「評論」，咦！睇真啲，乜咁熟口面，上世紀七十年代，我都喺中銀門口打過蛇餅，做過啲相似嘅嘢。「嗗」聲，將說話吞番落肚。我就冇嘢講嘞，點樣對待呢件金家第三代肥仔，將佢奉為上帝，繼續做金家奴隸，抑或踩佢成地底泥…，咁，只有朝人有權選擇。又或者我異想天開，金肥孫佢有小蔣晚年胸襟，開放黨禁，啟民主之路？發夢冇咁早！

同一晚新聞，歐洲又有一人遠行，佢就係捷克，哈維爾。並無跪地叩頭，喊苦喊忽。只有一大片一大片點點燭光，紀念呢位帶領布拉格之春，並帶領天鵝絨革命，導至東歐極權统治結束，圍牆倒下，兩德统一….。

話時話，蘇東波都係由8964所引發，廿多年過去（嘩！咁又四分一世紀！），到處都反獨裁。有麪包革命，茉莉花革命，鬱金香革命，天鵝絨革命。獨裁者一個一個倒下，北菲、中東…。唯獨大唐斯人獨憔悴。我又諗起趙紫揚當政時，拍咗「河殤」，講述中華民族，自明朝以來，錯過海洋，與世界進步潮流失諸交臂。Not again！

Ｋ仔問攞貼士。原來，米田共嘅形狀直接受結腸colon嘅形狀所影响，人嘅係圓筒形，而兔仔嘅結腸喺∞∞∞∞∞∞咁嘅，所以出品就係一粒粒喇。講開又講，有冇邊位有養兔仔，知唔知兔仔嘅出品有硬有軟。軟嘅，營養價值甚高，食得唔好嘥，佢自己會食番。Mmm…唔知乜嘢味？

再噏過，

嚤囉