2011.08.21
高呼U hoo！齋噏唔駛do
柯拿，大家好，
發達喇，呢個星期五晚上機，一個月唔駛返工喎，笑到合唔埋嘴。
我哋有廿幾人，主要係澳洲中大校友。啊珊同我會喺27號早上到香港，當晚，即28號凌晨搭小巴直上廣州，趕搭早機，由廣州直飛西寧，匯合大隊。西寧係青海省會，我哋會留五日。跟住搭著名嘅青藏鐵路，由西寧轟隆隆咁直上拉薩。喺西藏會逗留八、九日，其中一個重點，係登上珠峰……嘅Base Camp（搭四驅車，唔係行），海拔5000m！西藏之後飛九寨溝，呢次係我嘅重訪。上次只係遊一日，今次留三日，用腳，仔細行多次。跟住經成都飛張家界，係最後一站，留四日再飛廣州，旅行團於此解散。團友亦田雞過河，各有各撑。我哋會喺17號晚（18號凌晨）返到香港。到時飲茶，食飯，吹水不在話下。
18號係星期日，唔知可以幾早啲起身，馬仔，請代我約班九樓老友，中午去飲茶，好似上次咁，利舞台某酒樓？意下如何？到時再詳細傾下關於三儍四月行山事宜。
我逗留香港5日，22號，星期四晚搭夜機返雪梨。
超仔，有冇可能約一晚，國術組及國術組之友食餐飯，請代安排。
有邊個，咁啱喺呢５日有特別活動，又唔介意受埋我玩，請聯絡我。
旅途中會保持電郵聯絡。
又可以見面喇！
再噏過，
嚤囉
No comments:
Post a Comment