2014.07.18 獅子猛回頭，五字噏出口；迷暈兼照鏡，方知單嘢堅定流

2014.07.18 

獅子猛回頭，五字噏出口；迷暈兼照鏡，方知單嘢堅定流。

預備進入迷暈陣

柯拿，大家好

一個平常過平常嘅朝早， iPhone 鬧鐘響起，肚仔如常咁咕咕輕叫，呢個已經係我維持咗好耐好耐嘅生理時鐘。我自詡飲食正常，蔬菜生果之類嘅食物纖維，必不可少。經常運動，保持活躍生活方式，已經習以為常。心境平和，樣樣處之泰然(甚至泰過份)。據說，咁樣有助腸胃蠕動，入乜嘢，出乜嘢，每朝一坐一輕鬆，從未難倒過我。

呢朝坐起身回頭一望（呢個亦係我嘅習慣，獅子回頭，呢招係已故陳存仁中醫博士所提倡），但見浮金旁水中，泛起淡淡一抹嫣紅。心一沉，腦仔浮出五個字：WTH is that！手上嗰張紙，都有一條紅印。⋯⋯！定一定神，將部份證物留住，若無其事返工去也。

開鋪前打尖睇醫生，攞咗一個檢查包，裏面有三個細長透明盒仔，每個內有一支用藥水浸住，比牙簽長些少嘅膠棒仔，醫生吩咐要分別做三個樣本檢查。第一個樣本早已收集好，即刻攞出嚟，用其中一支膠棒仔，喺樣本五個不同位置都拮一拮。如是者，當晚及第二日早上，照辦煮碗，毫無困難就集齊三個樣本，分別寫上時間、日期，即刻攞去化險所，再靜侯消息。

再過一日，夜晚收鋪返屋企，揸揸下車，電話響。「醫生想同你講吓個化驗報告⋯⋯。」使唔使咁急？係咪好緊要呢？一路揸車，個腦將我嘅所有相關常識全部預演一次。話就話心境平和，處之泰然，而家有的嘢咁貼身，緊張起嚟，都係人之常情啩。

第二朝，再次打尖睇醫生。報告話，第一個樣本，human hemoglobin 呈陽性反應，而另外嗰兩個就搵唔到呢的蛋白球嘞。發現咁嘅嘢，梗係要認真啲對待，即刻再轉睇相熟嘅醫生，一如所料，佢即刻轉介睇專科醫生。再安排照鏡，呢的都係常識嚟喇。

嗰個星期日，一早約咗全家人一齊食晚飯。咁，啱嘞，一家人，邊有乜嘢秘密，我要認認真真同阿仔、阿女、新抱仔，將呢件事交代一下。

當日，一家人齊齊整整食晚飯。蔣家個個都口水多過茶，一邊食飯，一邊高談闊論，社會民生，宗教政治，天南地北無所不談。阿仔、 Ivy，講佢哋嘅工作近況；大小姐就講佢即將起程嘅美國之行。我呢啲出口問題，絕對係倒胃口嘅話題，都係飲飽食醉之後再講。

酒過三巡，菜都冇味。我一反常態，用咗比較正經嘅語調將成件事交待一次，講完仲驚死嚇親佢哋。點知兩件嘢聽完，居然哈哈大笑。

阿仔話：澳洲佬如果遇到咁樣嘅情況，即刻四圍話畀人知，因為發生啲咁嘅嘢，係 man 嘅表現。仲叫我睇吓報紙雜誌嘅笑話，漫畫，佢哋成日攞呢個話題嚟講笑。（乜咁嘅咩？)

大小姐話：佢啲 friends 甚至影埋相，貼上面書！(吓？係真唔係？）

兩件嘢爭住講，講到郁身郁勢，七情上面，全家人笑到反艇，件事果然反高潮。原來呢兩件嘢，一早有備而來，要將呢件事淡化。邊個唔知呢啲嘢可大可小，但係愁眉苦面，又有鬼用咩！係喎，笑完一餐，又真係舒服好多，我實在好多謝呢兩件嘢。

因為檢查要庥醉，我揸唔到車，阿仔即刻 mark 低日子接送，又預備同新抱仔嚟㷛粥做晚餐一齊食，仲喺埋我屋企過夜，叫做看住我咁話嘞。有人咁惜我，我梗詐驕喇。

日子果然可以沖淡情緒，喺等待檢查呢三個禮拜，心情又真係冇乜嘢，不過就諗多咗呢個問題。

記得聽過啲拆彈專家嘅故事：拆彈專家一生人拆好多炸彈，有真有假。就算係真，so far 全部都拆到。但係點知會唔會有一日，踫到一個拆唔到嘅彈，而炸彈上仲貼咗佢自己個名！做得拆彈專家，就預咗有咁嘅風險。人生嘅經歷何嘗唔係如此，預咗喇。一世人流流長，行咁多路，前面會遇到啲乜嘢，點到你講。

要做撿查，早幾日就要預備。首先唔准食菜、生果之類嘅多纖維食物。到咗前一日黃昏，就開始禁食，晚上及檢查當日早上，就要食瀉藥同埋大量飲水，務求清理腸胃，等到時睇鏡，醫生就睇得一清二楚喇。

阿仔準時接我去 day surgery ，登記、畀錢（承惠500袋鼠幣，唔知醫療保險可以攞返幾多？）驗明正身後，帶上手帶，換上手術袍，坐喺度等叫名。麻醉師帶我入房，瞓喺張有轆嘅牀上。話時話，蔣家包括新抱仔，除咗我，全部都麻醉過，呢次就係我嘅第一次。咦，我又一啲都唔緊張喎。望到牆上個鐘，記住呢個時間：2014年7月12日上午10點35分。

庥醉師幫我戴上呼吸面罩，裏面唔知噴住啲乜嘢氣畀我嘆，佢再喺我右手手背挿上針筒，注射咗兩筒針藥，我以為佢會叫我數數目，睇戲係咁講嘅，點知唔使兩分鐘，我已經暈咗。

⋯⋯⋯⋯。朦朦朧朧醒返，感覺就好似好好咁瞓咗一覺，仲好似發咗個夢𠻹，內容係乜就唔記得喇。望吓四周，見唔到有鐘。牀邊企咗位女士，佢睇住我醒返，我問佢我瞓咗幾耐，「45分鐘。」佢話。

起身落牀，仲覺得有些少暈暈地。佢叫我扶住牀邊着返衣服，我又試吓唔扶住，又如何。哈，我嘅平衡仍然好得喎。佢陪我行返出大廳，嗰度有一排疏化畀人休息，仲有三文治，咖啡或茶供應。果然招呼周到。此時，著住綠色袍嘅鍾醫生走埋嚟：「唔使擔心，乜嘢唔好嘅嘢都見唔到，有冇問題？」我似乎仍然瘟瘟鈍鈍，唔識問問題。到醫生行返入房，我至醒起有個問題，䕶士幫我追入去問醫生。我嘅問題係，聽日星期日，可唔可以踩單車 (第二日，卒之我踩咗成50公里車)。

此時，阿仔亦嚟到接我走，我感覺我已回復正常，中午仲同中大友一齊食晏。咁晚飯又點會食粥咁冇癮，同阿仔、新抱仔一齊去香港茶餐廳擦餐勁好過喇。

我記起享利方達嘅最後一齣戲，係同佢個女珍芬達合演嘅金池塘 On Golden Pond。戲中亦係飾演兩父女。兩父女一向關係疏離，老父假日居於金池塘邊一間小屋，個女探望期間，一日，老父酣寐正濃，個女以為老父歸天。雖然係誤會一場，但預演咗一幕生離死別。從此做女嘅明白到能夠相聚嘅時間，確係屈指可數，當然就珍惜大家喺埋一齊嘅每一分每一秒。

情節其實幾老土，但係而家諗返起，又覺得幾感動。今日， touch wood ，我遇到呢個係「詐彈」，點知邊日，幾十年後，一百年後，遇到個真嘢，又拆唔到，上面仲貼咗我個名⋯⋯，fingers crossed 。

都係咁講：想做就去做，而且仲要快的做。多啲同家人、心愛嘅人一齊，開開心心咁過每一日。

係好老土喎。不過，而家，呢個係我最大嘅人生目標。

再噏過

嚤囉