2012.03.05 習副一伸手，大代爭崩頭；黑材係咁兜，你噏佢噏口水流

2012.03.05

習副一伸手，大代爭崩頭；黑材係咁兜，你噏佢噏口水流。

柯拿，大家好，

三月，袋鼠國踏入秋天。回顧成個夏季，本來嘅火山季節，居然雨落個唔停，上面昆士蘭，下面維多利亞，四圍都水浸。星期一，新南威爾斯西南都一個叫Waga Waga嘅地方，居然經歷160年來最大雨，成個地區居民要撤離。好彩我都住得幾高，係好大雨，touch wood，一切OK！唔話你唔知，落雨天，就係我嘅旺季，good for business！$$$$。

星期日，都係好大雨，但仍然阻唔到喺雪梨舉行嘅，第35屆同性戀嘉年華，袋鼠佬叫mardi gras parade。澳洲著名歌星Kilie Minogue亦有出席，警隊亦派出穿著整齊製服嘅男子漢参加遊行。來自世界各地嘅同性戀團體，派隊參加遊行。服裝打扮色彩斑斕，當然不乏靚仔靚女養眼場面。記得有一年Mardi gras前幾日，有個客攞條dog collar嚟鋪頭，要我喺狗帶上打滿啲鍋釘。呢位仁兄就戴上頸去巡行喇。

唔好以為係gay嘅先會去mardi gras，呢個係一年一度雪梨嘅國際盛事，為雪梨帶嚟大量旅遊收益。下次有興趣嚟袋鼠國，各位可考慮呢個時候。

海洋公園為樂樂盈盈營造氣氛，希望可以一索得熊貓，點知，打架收場。呢種動物，居然冇興趣雌雄之事，咁點生仔？佢哋要自我滅絕，人類又要幫佢哋生仔。咁算唔算干擾大自然呢，又？

熊貓同籠，打架收場，豬狼爭鬪，場面更加殘酷。本來以為係戲一場，點知一個唔覺，趁住編劇、導演、監製意見不合，配角乘機搏懵，居然唔跟劇本，即場爆肚，挑戰第一男主角欽點地位。招式狠辣，出手又快又準。而且似乎早有預謀，喺Ｎ年前已經籌備定，乜嘢深挖洞圖則，婚外情、私生子……，要幾臭，有幾臭，一次過掟晒出嚟，就要喺廣大觀眾面前落你面。

不過，我仍然堅持，特首摔角賽，確確實實，只係一場戲。我有錯嘅係，我以為係影畫戲，原來係現場戲劇，而且係一齣胡鬧、爆肚劇。不過，我深信，一待各位啊爺四四六六拆掂後，即刻改好劇本，各位男女主角、配角、咖哩啡、喎呵仔，一一歸位，照本宣科，演好啊爺（s）呢齣戲。

好多人睇好振英哥，我仍然堅持，啊爺會揀唐糖。唔好再講乜嘢治港理念、行政能力、選舉政綱；口才、人品、私德……，呢啲全部係花招。民望？更加唔駛講，偉大嘅檔幾時信呢一套？你睇，習副一出，佢同邊個握手先，個個即刻大造文章。即係話，人盡皆知，啊爺一搥就可定音，其他花招，意思意思而已。

咁，Why唐糖？

我邊個都可以唔信，我點可以唔信李超人，李超人何許人也，李氏力場直達天庭、消息靈通，每次落注前，一定做足功課，無寶不落，點會失手？如今，小超仍企喺Henry呢邊，再不論四大地產家族，十大富豪，各大銀行家，至今仍然企硬撑唐糖。所以，我就跟佢哋落注。

講真，邊個做有乜分別，都係啊爺指揮捧下嘅dancer啫。

咦！唔係噃！呢啲只係我哋蟻民嘅睇法。對唔同利益集團嚟講，唐糖羸，抑或振英羸，當然有好大分別，分利益分地盤喎，咁大利益，流晒口水。唔怪得啦，打到甩褲都要爭，正常嘅！

再噏過，

嚤囉