2013.03.15
今日無謂噏咁多，就請阿姐唱首歌
雪梨市中心行乞者，狗都乞埋一份（攝於澳紐軍團日，多咗道具）
柯拿，大家好，
三月，袋鼠國踏入秋季，天氣唔係特別涼快，但係日照時間明顕短咗。朝早黑，夜晚收工返屋企，太陽已落到好低。
世恩呵呵呵，喺非時卜話我架單車咁乾淨，暗寸我踩單車疏懶。其實鬼唔想踩多啲咩，我最鍾意玩，人人都知，可惜要揾銀，尤其細路重係細，又要補習，又要供屋，咁就要開工喇。
不過咁講，喺袋鼠國，如果唔去供間屋，功課細路自己搞掂，其他普普通通，你又可以生活得好他條。因為如果搵得唔夠多，政府會畀家庭津貼過你。細路又有牛奶金，租屋又有租金津貼。連屋都租唔起，政府租埋屋畀你。唔係香港劏房喎。喺大雪梨巿區，幾百呎、1千呎，車房露臺，走唔甩。如果喺郊區，獨立屋，車房，前後花園，非常普遍，唔駛交一個崩。
有病?畀張保健咭過你碌，政府幫你找數，買藥?
幾貴都好，低收入人士每次幾蚊雞（3蚊?），每年重有上限，過咗上限，唔駛錢。普通人買藥，亦有補貼。所以我哋帶藥出國，要帶埋醫生紙。免費教育不在話下，又驚死啲家長冇預錢畀細路開學，每個新學期，政府寄支票畀全日制中、小學家長，人人有份，冇入息審査。......
。
所以如果想喺袋鼠國餓得死，絕對係9.999高難度動作。喺澳洲，都有乞兒
(街頭賣藝者唔係乞兒，係藝術家，佢要你嘅欣賞，唔係憐憫），都有露宿者，你唔駛特別可憐佢哋，呢啲係佢自己選擇嘅生活方式。
邊個人會努力工作?你會問。多數人都想生活過得好啲，買啲靚嘢，去下旅行，在在需財。就我所見，始終係努力工作居多。比起香港，工作壓力就細好多，一般人都係揾咁多駛咁多，就算儲蓄，都好限，因為到退休年齡，亦有全民養老金照住。當然唔係大魚大肉，兩餐温飽，居有定所，係唔駛憂嘅。袋鼠佬成日講，最好兩腳一伸𠴱日，啱啱駛晒啲錢，咁就
good fit 嘞。
袋鼠國，絕對係社會主義天堂。福利好，唔一定養懶人，最緊要係畀咗國民有好大嘅選擇空間。以前幫我睇鋪嘅布朗太太，佢有兩個仔。大仔士提芬讀書好叻，而家係出名打商業糾紛嘅律師，好有錢，搭飛機一定要搭頭等嗰隻，當然工作壓力大，又鬼剃頭，又白晒頭髮。布朗太太個細仔讀到十年班就冇讀，最鍾意滑浪。好細個就搬咗去北海岸海灘區住，貪嗰度有靚滑浪海灘。平日做下散工，夾埋政府津貼，生活無憂。專心專意去滑浪。兩個仔反差咁大，布朗太太當然㑹比較，有時都會呻下，話個細仔冇咁叻。我同佢講，邊個仔生活過得快樂啲都好難講。
現代富裕社會，應該有能力畀民眾用自己嘅方式去生活。
聽香港烽煙節目，有個自稱中產嘅女人打電話入，話自己都揾得唔算少，但係仍然要一早開工，到晚黑七、八點都唔知收唔收到工。都係僅僅供到樓，頭家咁大，交埋啲乜費物費，月尾所剩無幾。工作時間長，冇乜時間見仔女，娛樂、運動時間更加少。言下之意，覺得生活好辛苦。我話，如果搵銀係興趣，用晒自己時間都在所不惜，咁係OK嘅。但係如果入息微薄，一定要長時間開工至夠温飽，香港咁多銀，都要搞成咁，都係對人性嘅侮辱。
又講佔領中環，好多人話，星期日、七一、遊行當運動，然後和平散去，都可以嘅。佔領中環?唔駛返工咩？你幫我供樓呀?你養埋我全家?要我犧牲爭取普選?算吧喇!有人爭埋畀我，又唔拘嘅。
香港生活逼人，呢個辯解，好有道理喎。Hah，諗下諗下，如果社會有足夠保障，經濟上，巿民無後顧之憂。照計，夠膽出嚟同政府
say no 嘅亦會多咗。阿狼咁醒目，點會搵自己老襯，佢唔搞長遠社會保障，最好巿民要出盡九牛二虎之力，至得基本溫飽。咁樣，出嚟遊行示威反政府?問過你老闆先喇。
伸而廣之，如果基本高齡服務、全民退保等保障已經由政府搞掂。蛇齋餅糭米、老人院舍、長者安居、家庭探訪、社區照顧、...等服務根本就係全民社會保障嘅一部份，由政府一手搞掂，咁又何須假手工會、政黨去派?!
Hah，咪住，冇咗蛇齋餅糭米、等等優勢，保皇工曾，政黨，同反對派工會政黨就扯得平均啲，到要選票時，尤其係小選區嗰隻，優勢亦相對減低。搞好長遠福利?阿狼有冇咁笨。
佔領中環呢單嘢，愈搞愈複雜。意念都係向前行多咗一步嘅，而家重係發展緊，蟻民們只可以騎驢睇唱本
---- 走著瞧。有人話，佔領中環都可以考慮，不過唔好阻交通。記起趙紫陽去探學生時，話佢後生時都臥過軌，要學品姨問下米，佢臥軌時，有火車嚟，唔知會唔會起身，等火車駛過之後，再臥過，咁話呢?
好耐冇去戲院睇過戲，上個禮拜去睇孤星涙。有一幕，講政府軍攻入革命學生陣地，居民見大勢已去，紛紛閂門，學生走投無路，只有死路一條。佔領中環成功與否，除咗參與者，巿民大眾嘅支持（或反對)力度都好緊要。以後香港會點樣，就睇大家喇，
講到孤星涙，不如請大小姐為大家唱首孤星涙嘅插曲。多謝欣賞。
再噏過
嚤囉
No comments:
Post a Comment