2012.08.19 撞棍登島噏句烏啄啄，愛国稱號本屬朦查查

2012.08.19 

撞棍登島噏句烏啄啄，愛国稱號本屬朦查查。

柯拿，大家好,

冬天就到盡頭，早咗天光，大地回暖，今日同校友會探路，路邊好多挑花都開滿晒花，冷天真係過喇。我哋呢度暖咗，照計，香港都應該冇咁熱啩！

氣温可能唔太熱，但係愛国嘅熱情，睇嚟就爆晒錶喇。亂打亂撞，畀啊牛幾件蛋散勇士登陸釣島。反中亂港之流，一登釣島，即刻榮升愛国勇士。「愛国」行情，真係海鮮價，點到你觸摸。一個日日自稱反共嘅人，攞住五星旗（五星點解？大粒星係乜？）踩上釣島唱義勇軍進行曲，已經夠晒荒謬。愛国報紙即刻封呢幾件成日抬棺材，去中聯辦贈慶嘅友仔--愛国。工聯會、民建聯組織接機，荒謬之事，無過於此。

阿牛話宣示主權，睇嚟，呢個行動，畀日本仔confirm實質控制權至真。邊個拉人，邊個被拉，一目了然。唔係話你阿牛先生插旗唱歌就宣示到主權。今年五月，我攞住袋鼠旗，喺尼泊爾奏袋鼠國第二國歌，咁係唔係宣示咗袋鼠國喺尼泊爾有主權呢，又？

香港人，商機至上，我即刻諗到條好橋，阿牛先生可以參考。而家啲旅遊項目五花百門，有綠色旅遊、生態旅遊，袋鼠國亦有工作旅遊working holiday……林林總總。呢條路綫，由香港出發，搭保釣N號，直闖釣島，名為「愛国保釣旅遊團」，無須護照，無須回鄉咭。行程包括：港日踫踫船、跳船搶灘、沙灘持旗漫步……etc，夜宿石垣市。應該有得搞也。Hah，唔知買唔買到旅遊保險呢？

獨裁政權最鍾意四圍揾敵人，一來，自己做嘅衰嘢，有得賴。二來，亦係為高壓控制人民造藉口。幾十年來，外面有英帝美帝蘇修蔣幫，裡面有地富反壞右（黑五類），走資派…etc。而家推国民教育受阻，啱嘞，造大「保釣」呢單嘢，大家提高愛国精神，將日本仔呢個大奸角擺上枱，推行国教，名正言順。

又講国民政育。好簡單，一日係一黨專政，一日都唔應該有。阿狼話三年內唔硬推，即係第四年就嚟料。教協話呼籲簽良心約章，簽咗又如何，教署、校方叫你依指引教，作為教師，你點可以唔聽指令。而家啲辦學團體、校監同大陸咁多關係，學校點運作，唔駛講喇。教師要養妻（夫）活兒，唔聽指令，會糧尾慌。

我畀阿狼一條橋：国教科最好用普通話教，本地老師講普通話太渣，咁，順理成章，最好由內地輸入国教老師，佢哋比本地老師更明白国情，本地老師唔駛教囯教科，可以更加專注自己嘅本科，……。佢哋點教你啲乖乖，你管唔管得到？

我對民間力量可以阻止阿狼力推国民教育，一啲都唔樂觀。教協、家長互堆責任。我上次講過，遊行有鬼用，你遊完，佢再洗。

極權政府又鍾意創造新詞彙，咁樣，解釋權就喺佢手上，即係任佢噏。又鍾意重新解釋舊詞。居然有中大教授話洗腦並非貶意，佢話所有知識傳授都係洗腦過程！嘩！教授，詞語、說話都有共通解釋，容有些少出入，都唔可以太離譜。洗腦就係洗腦，一定係貶意，唔係任你解。見到呢啲「知識分子」，就諗起郭沬若。

再噏過

嚤囉

Ps. 電郵寄出前，睇到各電邮對話，井少咁老實，佩服！