2012.02.03 沙丘噏歷史，失業冇銀捉pipi

2012.02.03 

沙丘噏歷史，失業冇銀捉pipi。

柯拿，大家好，

又有得玩。澳洲中大校友會經常搞好多活動，校友亦踴躍參加，相得益彰也。上周五，一年一度家庭營又開鑼喇，家庭營共三日兩夜。

情商娥姐幫手周六、周日睇鋪，令我無後顧之憂，多謝晒。周五收工後，即踩兩粒半鐘車，北行188公里，到達營地Anna Bay。行車時橫風橫雨，擔憂跟住兩日天氣係點。到達營地已接近9點，食過簡單晚餐，即义足電，再戰明天。

一宿無話，Zzzz……。眼矇鬆，蛋香飄半空。早餐已預備好，翻身由上隔牀碌落地，唔駛半分鐘，已揸住刀义食緊半生熟太陽蛋。郭沫若搭緊飛機時，見到兩個太陽。我而家都見到兩個，一個係愛心太陽，而家擺咗上台，另一個係大自然母親嗰個，温温暖暖，高高掛在天。嘩！好天噃，速速坐喺門前陽台欄柵上，用ipad影張相，放上面書，公告天下，等人羨慕吓。唔駛do喎，梗係要炫燿一番。

雖然話全團有40人，但活動都係自已安排。有小組遠足、有漁翁獨釣，總之各顯神通。我哋一行十幾人，今朝節目……沙丘四驅行。由營地行到沙灘集合點，只十多分鐘，方便得很。

呢個沙灘，喺華人社區，十分聞名。但，我敢講，冇乜幾多個，可以講出沙灘個名。之所以聞名，係因為呢度嘅Pipi。

回帶捲返十幾年前（94？），一家四口，驅車至此，只知Anna Bay（區名name of city）內有個沙難，有好多蜆，但唔知係邊個沙灘。用港式英文問袋鼠佬。How are you 米？…Er…can you tell me…er…where is the beach where I can catch a lot of …er… pipis？…you know …er… pipi！驚死哈佬佢唔明，再用兩隻手掌擺理一齊，開開合合扮一隻蜆。我問得咁清楚，佢嘅指示亦相當清楚。好容易就揾到，Stockton Beach。而家至發覺，世上居然有咁樣一個天堂，連綿32公里海灘，就喺沙下邊藏咗幾多食物。毋須掘深，只要踎低，或如果唔怕pat pat濕，乾脆坐喺沙上，手喺身邊探落沙內一兩掌深，大大隻嘅pipi(s) 就喺你掌握之中喇。

Pipi亦養育大自然生物，就見到海鷗趁住蜆打開殼吐沙時，撲上去，一啄就中，蜆肉就喺口中。所以會見到海鷗跟住浪濤，喺淺水處走嚟走去，好不忙碌。重有一種雀，叫pied，全身黑色，係食蜆專家，佢可以喺蜆殼邊沿啄一個窿仔，就可打開蜆。重有，佢哋係愛情專一嘅雀仔，好似小甜甜話齋：one life one love。佢哋出現，一定成雙成對。

大家知道，只要華人鍾意食嘅「嘢」，呢件「嘢」就離種族滅絕不遠矣。老虎如是，熊人、鯊魚、髮菜…等等，無一倖免。眼見pipi買少見少，當地市議會及國家公園管理局，即下限捕令，每人只可帶走50隻，而且派有督察，一見黃口黃面，又拎住一個二個膠桶，即截停檢查。唔好提到種族歧視咁高層吹，只因為鬼佬唔多吼pipi啫。喺華人社區中，個個都聽過因濫捕而被罸錢嘅故事。係咪咁就OK呢？當然冇咁簡單。蜆口繼續減少，當局只好狠下殺手鐧：禁捕，一隻都唔准攞走！不過傷害已造成，唔知要幾耐至可復原。再唔講，而家只能禁非商業捕捉，持牌魚民仍然繼續捉pipi。會唔會全面禁捕，省漁農部同國家管理局仍然抝緊手瓜。

坐上四驅小巴，暢遊沙丘，團友係顛簸之中，高談說笑，一樂也。咪以為浩瀚黄沙就好乾，原來沙底就係源源不絕嘅地下水，只消喺沙面向下掘1米兩米深，就見水，而且終年唔乾，好一個真人不露相。

司機車我哋上沙丘最高點，都係30公尺高啫。好曬，個個戴起黑超，搽足sun block，落車行吓，欣賞呢座南半球最大沙丘。影相，調笑不在話下。而我，當然不忘喺沙丘上打筋斛，沙真係好軟熟，跌極唔痛，十分過癮。

車繼續向西行，喺一群鐵皮屋前停低。點解沙丘中間，有個小村落？原來上世紀30年代，經濟大衰退。Stockton 沙灘西端連住嘅就係工業城市紐卡素Newcastle，失業工人生活困難，部份人走入沙丘，搭起鐵皮屋Tin House居住。佢哋以捉魚、捉蜆為生。因為地下水，源源不絕，抽取地下水作飲用外，甚至喺沙丘上灌溉種植，過住自給自足原始生活。因為呢個歷史原因，國家公園管理局亦隻眼開隻眼閉，由得佢哋繼續住到今時今日。由最初有八十幾户人家，到而家只剩低11户。佢哋冇權賣地，亦唔准擴建、加建。由得佢自然消亡。呢度嘅居民雖然唔駛比租，但亦需付出代價，就係成日要剷沙。海風將沙灘上嘅沙吹入陸地，經千百年形成沙丘，風沙亦可將起喺沙丘上嘅鐵皮屋掩埋，居民就係要同大自然作永無休止嘅搏鬪：你吹沙嚟，我又剷番出去，周而復始。諗起日本小說「沙丘之女」。估唔到上咗堂歷史課。

上完歷史堂，再上體育堂。四驅小巴去到終點站，前面就喺一幅60度沙丘斜坡，大家除大赤腳，攞住滑板走上斜坡頂。再由坡頂滑下，好有速度感。玩到夠就搭番四驅小巴回程。

午間，全團人馬由不同方向去到盲鰽養殖場食晏，菜式只有一款：炸魚薯條。輕輕鬆鬆食個晏，談笑用餐一樂也。餐後參觀養殖場。

帶咗body board點會唔用，趁住天仲好光，一個人攬住塊板出去海灘滑浪。今日好好浪，滑得好順。玩玩吓，有两個鬼仔見我咁款，教我兩度散手，果然好掂，有人點下，係好啲嘅。係咁比啲浪冲吓冲吓，冲到救生員都收工嘞，我都盡興而返喇。

第三日係回程日，回家途中，到處隨意停留欣賞湖光山色。早上去睇無花果園，午餐後，重去咗植物公園同理小小動物園…。

咁又完咗今年嘅家庭營，明年請早。

再噏過，

嚤囉

Ps. 可上我面書睇相

http://www.facebook.com/media/set/?set=a.242699082474186.57011.100002022875470&type=1&l=d2b844db42