2012.01.08 往事本如煙，世態常變遷。每周噏一篇，記憶可延年

2012.01.08 

往事本如煙，世態常變遷。每周噏一篇，記憶可延年。

柯拿，大家好，

新嘅一年，安哥與其同志……組織龍年大食會及猛噏茶敍。好可惜，我要開工，未克參加。但各位踴躍參加，影多啲相擺上面書，我就當出咗席喇。

天真係有不測風雲，之前話天氣反常，重預測聖誕、新年會又濕又凍。事實係，聖誕日及Boxing day，我去咗踩單車，曬到我變咗嚿炭。此後就開始熱，變返典型雪梨天氣，有一日，重喺唔知幾多十年以來最熱嘅一日。天氣，真係難測！

難測嘅點止天氣，特首跑馬仔嘅過程亦多變。振英哥露出狼尾巴，「民意」下滑。鐵頭河聯同又傾又砌基哥出嚟搞局，又搞ipod初選。望住呢群民主人士，我即刻諗到個四字成語，「葉公好龍」，…哦！龍年喎，唔怪得啦。anyway我仍然埾持我嘅預測，啊爺tick嘅頭馬，一定係成日笑到見牙唔見眼嘅唐糖。

安哥諗諗佢，趁住咁多老友聚首一堂，開個賭局。大家估吓邊位係黄袍加身嘅真命天子，輸咗嗰堆要請嬴咗嘅食一餐。咁又有藉口食多餐喇。咦！我都參加得噃！預埋我！安哥，認真諗吓佢。

聖誕新年期間，都幾忙，又多飯局，周記就停一周嘞。

講起周記，每周一噏嘅形式寫周記，原來第一篇係2010年8月14日，題目係「噏得就噏，咁至適合」，至今共108篇。

講吓我寫周記嘅歷史都好。走入時光隧道，去返四十年前，當時國術組嘅領導人係死佬仁。每周開一次周會之外，死佬仁重好關心我每周嘅思想走勢。每星期我會寫一篇周記，記錄該周發生嘅事同埋我嘅所思所想。每周佢會嚟我屋企一次，睇我嘅周記。而家諗番起，當時我老豆一定會好奇怪，點解個仔每星期都要比篇嘢呢條友睇，又神神秘秘咁。但啊爸從來冇問過我一句関於呢件事。

死佬仁後來離開國術組棄武從文（記）之後，就再冇人要求寫周記，冇人要求，我又點會寫。

至於嗰時嘅周記寫啲乜，我係醒目香港仔，當然會寫啲佢想睇到嘅嘢，至於有幾真，就好難講。死佬仁咁醒目，信幾多，佢亦心裡有數，絕唔會我噏乜，佢信乜者。

信不信由你，呢一大輯周記，我keep到而家，重喺我牀下底。

第二次寫周記，係我讀文理嘅時候。嗰時由香港雞轉去文理，班主任叫盧志明，花名就係LCM喇。蔡凝芳，我有冇記錯。LCM要我哋寫周記，逢星期一交。我由雞仔私校，轉去大雞私校。門高狗大，所以第一篇周記嘅開頭第一句就喺「偌大的校舍……」。反映到我呢個鄉下仔出城嘅心理，絕對係未見過大場面。不過，功課始終只係功課，而唔鍾意做功課同欠交功課，係嚤囉仔嘅天性。係咁，如是者，做咗三、四篇周記，就冇做喇。

信不信由你，呢本灰色面嘅文理校簿嘅周記簿，我keep到而家，重喺我牀下底。

蔡凝芳，睇樣，你係交齊功課嗰啲學生。咁你又有冇keep住本周記簿？

真係有啲後悔，點解當初唔keep住寫多啲。係咁，我就記得更多往事，唔駛比歲月神偷，咁容易撻咗我啲記憶。

上次返香港，我揾我舅父同佢傾咗好耐，我問佢好多関於我啊媽細時嘅事，重用video錄影咗佢嘅口述歷史，我對我啊媽又有多啲瞭解。

我而家每周一噏，相信有一日，我啲仔女想知多啲佢老豆，我嘅嘢，都唔會太難啩！

咁，各位，又有冇興趣每周一噏呢？

再噏過，

嚤囉