2014.07.07
天氣冷，乜都噏一餐。七一行，香江熱到暈。
七七壞車事件
柯拿，大家好，
舊時喺商場裏面開工，唔知外邊陰晴冷暖，而家對住條街，寒風吹埋嚟，真係感受到冷酷嘅現實世界，點滴在心頭。二十年來，一開工就唔停手咁做，而家實在真係太得閒。好彩我預備咗好多嘢畀自己做，絕對唔會畀自己無無聊聊咁過日子。
都好感激啲 fans， 真係有啲舊客人喺商場見唔到我，仿似晴天霹靂，四圍摷我喺邊，相逢恍如隔世，真感動。不過，唔知有幾多客係咁，要數量夠至維到皮㗎。耐心等待。
上週一，阿珊返咗香港，佢最怕熱，不過，點可以錯過七．一。每次講電話，佢都猛呻好熱。你哋就熱，呢度就凍。據說，今年雪山落咗好多場雪，雪地破晒紀錄咁靚，可惜，今年可能去唔到滑雪喇。
星期三，大小姐一個人自己飛去美國，再去墨西哥，要參加朋友嘅婚禮。飛美國要搭三程機，佢要一個人搞掂轉機，真係有的擔心。托頼，佢搞掂晒，安全地埗。我喺面書話 " proud of you"，係由衷嘅一句。而家又有面書，
imessage、FaceTime ，通訊方便，又真係放心好多。
而家，間屋又剩返我一個人喇。
頭先講起七一，唔講又唔得，七一㷫回歸，遊行人數，你話一萬又好，一百萬又好，官字兩個口，數字任你噏，總之個場面就係人山人海，非常虛冚。我畀條橋阿狼，一於取消七一假期，冇假放點遊行？
回歸前要推銷一國兩制，又話剰係換個名，換支旗，香港嘅事，你自己管。而家又出白皮書，啲有頭有面嘅人，又跳晒出嚟話過你知：所謂自己管，都有規限嘅。基本法呀，聯合聲明呀，有寫嘅，解釋權喺我度。冇寫嘅，我話乜，就係乜。
白髮珠婆婆已經講得明明白白，當初客客氣氣，畫公仔唔畫使出腸，以為你地醒爬，知道佢阿爺條腸係直係彎。點知十幾年過去，你哋班友，仍然未醒目，仲成日搬英國佬嘅老皇曆出嚟。白髮婆婆唯有同你講個一清二楚。即係話：民主自由普選？梗畀你，不過⋯⋯係中國製造嘅。
阿狼見你班友講極唔明，都費事嘥口水，而家就話過你知，一國兩制呢的咁新嘅嘢，唔係你哋一般人可以明白。總之有乜唔明就問阿爺，所有答案，以阿爺嗰個為準。講完，明未！
今朝雖然凍，我如常早起去 gym，七點揸車到咗M2交匯點，等紅燈後，架車居然死火停正喺南行綫七條
lane 中間。正係返工時間，兩邊都係快速嘅車流，我後邊塞咗一串車，個個抽頭轉綫，險象環生。咁危險，我即刻喺紅燈時離開架車，喺路邊
call roadside assistance 同埋警察。最後架車拖咗去車房，Danny 大偈話個油泵要換喇。都係嘅，呢架車係我哋移民後買嘅第三架車，已經揸咗十幾年，行咗二十八萬公里 ，係我哋 keep 得最耐嘅車，從未壞過，今次係第一次喺路上跪低，已經好叻仔，我好感激佢喇。冇嘢嘅，換過油泵後，仲有排行嘅。
睇下日曆，原來今日係七七，古有七七事變，今日有七七事件。有興趣，可上面書睇相。
再噏過
嚤囉
No comments:
Post a Comment