2011.06.19 啟榮點解係Ｋ仔，羅賓撈亂嚤囉仔，網上猛噏講故仔，點會咁易做儍仔

2011.06.19

啟榮點解係Ｋ仔，羅賓撈亂嚤囉仔，網上猛噏講故仔，點會咁易做儍仔。

柯拿，大家好，

世恩問點解啟榮變身成Ｋ仔，我唔係History major，但我都好有興趣摷下發生過嘅事。故事係咁嘅：

去年8月26日，啟榮發出電郵告知各兄弟姊妹，話佢冇事嘞，同日，三羅喺電郵話好彩冇話啟榮索Ｋ。27日，啊珊電郵話，啟榮自己就係Ｋ仔啦，可唔可以告佢身為Ｋ仔呢？同日，我覆電郵話：身為Ｋ仔並唔犯法，管有Ｋ仔至有罪，邊個管有啟榮就犯法！28日啟榮電郵話，差人告唔到，因為Ｋ仔隱咗形，好似隱閉青年一樣。同日，三羅認為Ｋ仔呢個名好啱啟榮，又時尚，又年青，建議佢受落呢個名。同日，啟榮電郵話接受Ｋ仔呢個名。不過佢喺電郵下款仍然用kw。直到9月10日先至首次以Ｋ仔作下款，直至如今。

咁多人回應呢張枱，可惜錯、錯、錯，唔係當值嗰張鋼枱，請問鋼枱點瞓？凍tit tit, 凍死嚟咩！係室內辦公室門外嗰張木枱，如果冇記錯，枱對上重有吊扇，三塊扇葉，會斬死人嗰隻。後來裝修後，原來木枱嘅位置就變成大堂中座，木枱就移到廁所對面嘅窗邊。費事各位估錯晒，請睇相，就見到鋼枱與木枱喇。喂，二羅，揾番張枱喇！咪話揾唔到。

要同三羅道歉，累你比人點錯相，篇亂噏嘢係我，嚤囉寫嘅，同羅賓無關，一人做事一人當。而家出埋相，坐喺長枱嗰個靚（第三聲）仔，就係我。

要多謝糖兄保羅點醒，我喺鋪頭，啲客比錢前show 佢哋啲senior cards出嚟，問我有冇折頭，我一見「senior」 ，就以為佢哋「high and noble」，嚇得我即刻比折頭佢哋。而家至知原來只喺old而已，咁我唔駛咁驚啦！真係唔講唔知咁鬼豬嘜……！

我話我每周六都下載香港嘅電台節目，屋企亦有TVB收費電視。冇錯，呢啲就係我主要嘅消息來源。我都希望盡量聽得平衡啲，但梗係難免多啲聽自己認為啱聽嘅資訊。喺收風方面，我覺得都幾全面。資訊發達年代，唔駛吓吓自己親眼見過，親手摸過至知係真嘢。例如噚日九樓附近馬師道建築地盤大火，啲著火嘅木板同竹枝飛晒落街。雞農喺中環天橋頂聲稱自殺，一個雞仔餅想爬上去，點知失足跌死咗。……。呢啲新聞，我同全港市民同步收到。你問吓有幾多港人當時親身在場，咁同我睇到嘅，又有乜分別？當然我缺乏嘅，係唔可以親身體會到香港人對事情嘅感受、睇法…。所以我好鍾意聽「烽煙」節目。Phone in 嘅，有港人、大陸人與及來自世界各地嘅華人，雖然一啲都唔全面，但係都叫做盡吓人事，知道大概咁啦！

所以我每次返香港都好期望可以同你班友仔交流吓睇法，好可惜，好失望，大家似乎都唔想涉及咁多「政治化」嘅題目，而且唔輕易講出自己觀點。我都明嘅，唔好抝咁多，咁樣可以友誼永固吖嘛。又或者我諗多咗，實情唔係好似我講咁，而係多數見面都係飲茶，唔通一邊咬住义燒包，一邊討論國情咩？真係好想有時間可以認真交流下一啲嚴肅啲嘅問題。我喺咪好唔化呢？

我烏啄啄做咗仁類政敵都唔知，好彩唔係人民公敵。大佬，對事物觀點唔同啫，駛唔駛變成政敵咁誇張呀？不過，都多謝你誓（唔係逝）死保衛我嘅發言權。好彩，我嘅發言權托庇於袋鼠之邦，絕對冇問題。問吓你嘞，你點睇香港嘅言論空間，樂觀？悲觀？我同你嘅政治觀點有乜嘢唔同呢，又？

保羅兄提及「急於求成」。我絕對唔係精英，睇樣係低Ｂ多啲。但邊個唔想快啲，人之常情啫。得唔得一件事。不過，我地高牀暖枕，當然可以奢談羅馬非一日建成呢啲真理。嗰啲比坼遷辦敲緊門嘅人，下一秒鐘就家都冇埋喇﹔鄧玉嬌唔用刀仔拮死呢隻禽獸狗官，下一秒鐘就貞操不保喇﹔蔣丁丁女士等咗廿二年，都係想為個仔討回公道啫，……。重要佢地等幾耐？我好低Ｂ，聽講話羅馬一日起唔到。好，我比多日你。兩日，○Ｋ？事實係好多人已唔耐煩，群體事件無日無之，前幾日輪到我鄉下，增城。而家真係堆緊乾柴，小小星火，就變成乾柴烈火。不過世事無絕對，是吉是空，God knows！

就算井少與保羅好樂觀咁認為有好多嘢可以做去改變佢，但頭痛醫頭，腳痛醫腳式嘅小修小補，於事有補咩？舉國體制嘅改革，茲事體大，涉及tons of tons嘅利益，既得利益者會放手咩？而佢哋啲飛機大炮咁利害，所以，我都係悲觀，唉！

斬吓眼，我喺袋鼠國都住咗廿年，對呢度嘅社會、政治體制都略知一二。每當聽聞神州大地嘅不平事，荒謬事，不其然都用袋鼠國去比較。有人會認為國情不同，唐人自有唐人嘅一套。明嘅！不過我都會喺呢度交流交流，比較比較，冇壞吖。

我諗起曾禮賢（講聲how are you mate先），你喺澳洲時，有一次曾季賢一家來澳探你，我哋一齊食晚飯。佢有一個習慣，就係如果佢食到啲好食嘅嘢，就算咬咗一半，都會將嗰半嚿夾番出嚟，比老婆食。因為佢鍚老婆，所以有好嘢，都第一時間分甘同味。曾夫人口講好核突，實在內心唔知幾甜。貓sir（學啊蚊嗌），我有冇講錯！

我就好似曾季賢咁，如果見過，經驗過袋鼠國啲好嘢，我會同大家交流吓。雖然唔一定啱駛，知多一啲，冇壞吖。

保羅兄，呢單嘢I can’t agree with you more！前朝嘅人，回歸後加入親中陣營投機博懵，而家，劉皇叔、唐唐等人教我哋點愛國，死未？！

講起愛國教育，我諗起曾德成。曾德成入讀史丹利時，我去過漢華中學，參加聲討大會，舉拳嗌過：釋放曾德成。當時情景歷歷在目。

啊鳴，乜嘢「自由樂園」，係咪你啱啱老作嘅，我就未聽過嘞，邊個聽過出聲！葡萄園係後門出後樓梯轉左嘅露台，喺大裝修前，真係有棚架種有葡萄，但我就未見過出葡萄，可能一有，發達喇！就比班乜姐物姐摘晒，因為葡萄園就係辦公室窗外。不過我唔明點解要喺張枱談情喎？貪佢夠公開咩？

平時係星期六晚或星期日寫電郵，今次早啲，因為星期日要去hiking。

多謝老咩頭有留意我嘅亂噏，我會一路留番，有一日腦退化時，睇番自己啲嘢，希望可以減輕病情。

再噏過，

嚤囉