2012.04.14 

我呢個仔

有時同朋友講起仔女經，成日聽到人呻，話佢個乖仔，乖女冇主見；唔知自己做乜，唔知自己想點。無論讀書選科，都要阿爸阿媽指指點點。不過，我呢個仔從來唔駛我指指點點，因為，佢鍾意自把自為，好多嘢，佢做咗先至話俾你知。

我鍾意旅行，八十年代初，出嚟做嘢，一有假期就四圍去。嗰時盤川有限，多數係去大陸。，孭住背囊，四五年間，去過北京、大同、內蒙、上海、南京、蘇杭、黃山、福建、桂林……等。1985年，就嚟暑假，正在著手計劃行程。有一日放工返屋企，老婆話啱啱睇完醫生，話有咗BB，原來呢個仔唔聲唔聲就出現喺阿媽個肚。

邊度都唔駛去啦，即刻約醫生做檢查，同時又買BB衫、BB牀、BB車、BB玩具……，總之務求作最佳預備。到86年，約咗醫生，book埋醫院喺3月22號星期六，歡迎阿仔到嚟。呢個仔可能唔受鐘意接受安排，早咗三日，3月19日，星期三，呢個仔唔聲唔聲，話嚟就嚟，攪到要飛的入醫院。

88年8月11日，阿仔第一日返學。阿仔返學嘅情形，我哋當然好留意，重以為好清楚佢喺學校嘅一舉一動。直至有一日家長日，見到佢啲同學仔，見到佢啲先生，先知道，呢個仔唔聲唔聲收埋好多威水嘢，唔話俾屋企知。嗰啲係乜嘢？點威水法？各位自己問佢好嘞

。

經歷小學、中學，邊個知，呢個仔，有幾多收埋收埋，唔聲唔聲嘅嘢？

2002年10年斑選科，佢選好至話你知，

2004年考HSC，又係一樣，佢選好晒科，選好晒學校再通知你。

2008年4月13日，阿仔話，「老豆，有啲嘢揾你商量，」從來都係做咗件事，再通知，今次事前咨會咁奇怪？睇嚟，呢件事一定對佢好重要。原來佢話，明天中年要向Ivy求婚，重話要我等佢好消息。（4月13號嘅第二日就喺….4月14日…，駛唔駛咁好計劃？）

結果係點，唔駛我講喇，

今日，阿仔同Ivy組織自己嘅家庭，一家人，互相幫助好緊要，有乜嘢幫得到手嘅地方，即管開聲，阿爸阿媽一定撑你，不過最好早啲開聲，咁樣，大家都爽啲！

 再噏過

嚤囉