2012.06.24 點至愛国任佢噏，變面香江眼仔濕

2012.06.24  

點至愛国任佢噏，變面香江眼仔濕

柯拿，大家好，

落咗成個月雨，又話唔知係幾多年來最濕嘅六月，前幾日終於見番藍天艷陽，停吓雨喇，我鍾意陽光燦爛嘅雪梨。

終於完成晒所有尼泊爾旅遊日記，一共27篇，全部登晒喺我個blog度。井少如果仍然睇唔到，稍後Ｅ畀你。

我將三張base camp同Kala Pathar嘅相，放大貼喺舖頭，我啲客好有興趣，個個走嚟恭喜我，又讚我好fit，我當然唔會客氣，全部受晒。咁，同啲客又多咗話題。有一樣係估唔到嘅，差唔多每一日，都有人見到相後，走埋嚟話我知，佢都去過EBC！呢條trek 真係咁popular！

一日飲茶，同枱多係崇基校友，講起中大崇基生物系，冬青婆婆，胡秀英教授，於5月22日，以102高壽，息勞歸主。呢本植物學人肉字典，載譽國際植物學界，佢嘅威水史，就人盡皆知。我即刻谷哥一吓，睇吓有冇滄海遺珠。終於畀我發現，佢有兩點同我相似之處：佢上世紀以獎學金，入讀南京金陵女子文理學院，畢業後，返家鄉母校教體育。咦！我又差唔多喎，我上世紀以蔣桂林教育基金獎學金，入讀文理書院，畢業後又教過體育。嘿，OK噃！

揾到啲la lung，真係與有榮焉喇。

喺冬青婆婆騎鶴西去之前，又有名人辭世。5月11日，我正在尼泊爾Porkhara踩緊單車。李子誦以100歲高齡病逝。本來想寫成「見馬克思」，但谷哥之後驚覺，我真係背！原來李社長唔係共產黨，而係國民黨！？！全名係中國國民黨革命委員會，咁點去見馬克思呢？死訊傳出後，好多人接受訪問，與及傳媒報導，都喺李社長個名前面，冠以「愛国報人」稱號。中共駐港人員、港府高層、傳统愛国人士等，接受扑咪時，眾口一詞，都稱李社長一生愛国。

愛国？點愛法？點樣為之愛国？我好想知。

我個人唔識李子誦，好似大多數人咁，最認識嘅，就係5日21號開天窗，寫痛心疾首呢件事。佢由1951年至1989年，任職文匯報，其間經歷咁多慘絕人寰嘅歷史事件，死咗咁多人，寃假錯案，假大空宣傳，無日無之。當時，佢又做咗啲乜嘢，嚟顯露佢愛国之心呢？Ｋ仔，你識佢，你清楚啲，你話畀我知佢點愛国，睇吓我學唔學到。

之後佢被香港工委炒魷，咁，開天窗呢單嘢，算唔算愛国行為？呢班去佢靈堂躹躬嘅人，又唔評價呢件事。咁李子誦係開窗前愛国？抑或，開窗後愛国？曾德成等愛国人士，話佢一生愛国，我聽唔明。

喺文匯、大公做嘅，就叫愛國報人。咁肥佬黎、何國柱、林行止，又算唔算愛国報人呢？中国国貨公司、華豐、裕華叫愛国，咁先施、永安又算唔算？培僑、香島叫愛国學校，咁培正、民生又算唔算？‧‧‧‧‧？

胡秀英Vs 李子誦，邊個愛国多啲呢？如果話，愛国冇分多啲少啲，咁，點解唔叫冬青婆婆做「愛国植物學家」呢，又？

真係死得人多，李社長帶住鹿死遺憾（有冇？）而終，15日後，又有湖南李旺陽歸天。坐咗22年監，罪名係顛覆國家政權。都係因為支援學生啫，我諗唔通，究竟喺国家宣傳機器上，開天窗寫痛心疾首，抑或，組織工會支援學生，呢兩單嘢，邊個威力大啲？換句話講，邊件罪名大啲？咁，如果李社長係愛国報人，李旺陽係唔係愛国工人？一個靈前擺滿花圈，10人扶靈，冠蓋雲集，讚譽滿天。一個連死都冇牀瞓，只剩低一條繩、一對拖鞋、同一大堆遺憾。

呢兩件老李，結局嘅落差，實在太大。

好明顯，「愛国」呢個行為，畀人壟斷咗。我話，好簡單啫，你跟住愛国報紙講嘅路綫，行為規範去做，無論轉左轉右褪後，一於緊跟，咁就愛国嘞。唔識跟嘅，就係落後群眾。反對嘅，嘿！反中亂港！

最近，睇到程翔篇文，原來「痛心疾首」唔係出自李子誦手筆，佢甚至認為咁講過激，想用「乎復何言」代替。開天窗佢亦唔敢自把自為，而要上報，經過新華社香港工委，張俊生嘅批準，先至作實。

哦！而家明晒，李社長，一生愛国，你當之無愧！

我細時，以為自己好愛國，不單愛祖国用国貨，差啲啲讀埋愛国學校。而家，呢個「国」，我愛唔到。我嘅「國」同呢個「国」有好大落差。

一日，聽商台節目，陶傑訪問一個音樂人，播出一首歌，聽到眼濕濕。

香港香港

作曲：翁家齊
作詞：鄭國江
主唱：陳美齡

香港我心中的故鄉
這裡讓我生長
有我喜歡的親友共陽光

路上人在跑趕呀趕
幹勁令我欣賞

這裡有許多好處沒法講

說一聲香港香港
你永遠是尋夢鄉
香港香港  你那色調難忘

山頂看小島水裡躺

處處換上新裝
看看那海鷗飛過自由港

海邊看小島穿晚裝
處處耀眼生光
這個市區的吸引沒法擋

說一聲香港香港
載有我童年夢想
香港香港  叫我不易遺忘

香港香港  載有我童年夢想
香港香港  叫我不易遺忘
香港香港  你永遠是尋夢鄉
香港香港  你那色調難忘

‧‧‧‧‧‧‧‧‧‧‧

睇吓高官、新舊特首、愛国人士、民主政黨，‧‧‧‧，已經唔係我所認識嘅香港。

我---好悲觀。

再噏過

嚤囉