2013.04.21
笑噏恩寵澤，木頭捽到滑
柯拿，大家好，
行政會議一哥林煥光出席理大一個教育硏討會，佢爆料話阿爺認為香港係 a spoiled and loss child。我又唔明嘞，既然殖民政府咁邪惡，究竟我哋畀英國佬虐待吖?抑或係生骨大頭菜，畀佢種（縱、寵）壞呢?真係吊詭。後來王永平話，種壞香港嘅係北大爺。嚇咗我一跳，佢?佢種壞香港?係咩?
東方呢粒明珠係唔係縱壞咗，我唔知。況且，受縱（寵），唔一定壞。我自己，就係一個受寵嘅人（我自問唔係一個壞人）。中華傳統，避講好嘢，怕小器。所以唔會讚細路仔，驚佢受唔起。見到細路，唔可以講「靚仔，得意」，要講「好乞人憎、好醜樣」。鬼佬都有相似地方，每逢講幸運嘅嘢，都要加上 touch wood。我要講我受寵嘅故事，梗係要一路講，一路掂住嚿木至得。
係唔係幸福，從來都係比較。睇下地球物種，有蛇蟲鼠蟻，魚蝦蟹、豬牛羊。多數都要戰戰驚驚咁去過每一分每一秒，又要好辛苦，出盡法寶去搵嘢食，又唔知幾時，會畀隻乜嘢怪獸食咗，變咗人哋嘅食物。，總之一世都擔驚受怕，冇覺好瞓。我居然生而為人，成為萬物之靈嘅一員，我梗係受寵喇。
就算好彩做到人，都要睇乜嘢時份。叫得做人（我只講智人 homo sapiens）， 已經喺呢個地球存在咗25萬年，畀你幾生修到，生而為人，如果生不逢時，投胎做咗原始人，都好大鑊，又要打獵，又要瞓山竉。出街又要因住唔好踫到獅子老虎，又千期唔好有隻金錢豹伏喺樹枝上，吼住你行近埋嚟，撲落嚟一咬，咁又一世。我唔係生喺蠻荒世界，有城巿、有文化、有藝術、有科技。唔駛擔心畀猛獸撕成碎片，我梗係受寵喇。
據說，自有人類歷史以來，呢個世界都唔停咁打緊仗。打開歷史書，就係一頁一頁染滿血蹟、你死我活嘅鬥爭史。唔講第二度，亦唔講咁遠。中華大地，1600年明末流寇、李治成、張憲宗，天災人禍，啲人餓到要易子而食。帝女花阿爸吊死煤山，清兵入𨶹，留髪不留頭，掦州十日、嘉定三屠。查嗣同，維民所止文字獄。啲官叫邊個死，邊個就要死，七屍八命梁天來，慘絕人寰。清末，倭寇犯境、甲午海戰、列強侵華、割地賠款。義和拳民，太平軍之亂，互相屠城，死亡人數之多，至今仍係世界紀䤸。就算推翻滿清，都冇和平，北洋政府，南北對侍。一戰結束，喪權辱國二十一條。九一八、七七事變，八年抗戰。原子彈結束二戰，國共兩黨繼續打餐死。....... 再講多啲都得。呢幾百年，根本就係殘酷大世紀，人，生喺中華大地，點會有啖安樂茶飯!我生喺大戰結束，呢一生 so far , touch wood，未經過戰亂，有幸成為一個戰後嬰兒，我梗係受寵喇。
二戰後，世界權力再次劃分，中東、非洲、南美...幾多新興國家獨立。經歷咁多百年嘅野蠻，呢個殘酷嘅世界逐漸走向文明，理性。民主制度，邊實踐，邊改善。社會保障，民族平等，性別平權等等，喺戰後和平環境中，都逐步得以改善。中華大地，先有日本仔敗返東贏，後有老蔣敗退美麗島。以為馬列會為中華大地解開千年封建皇朝枷鎖，會為華夏黎民帶嚟民主自由富足嘅新國度。點知，共和國原來祗不過係另一個皇朝嘅稱號。解放後，運動一個接住一個，貧窮、飢餓、互鬥、封閉....、咁點生活?當時中國有七億人口，我生於中華大地，但偏偏唔係七億份之一，而係220萬份之一。我出身清貧，但從未試過捱餓。我嘅童年記憶，touch wood 就係一幕幕開心嘅片段。有幸喺呢一小段借來嘅時間，現身喺呢一小片借來嘅空間，我梗係受寵喇。
講過好多次，我嘅中小學階段，基本上係冇做功課嘅記憶，我一定係經常唔交功課嘅學生(馬仔、芝芳，我有冇講錯）。喺中四之前，我從未試過溫書，就算考試前都唔會。到中四、五、會考，先至喺考試前一個禮拜温下書，返學嘅記憶就係玩玩玩玩玩，非常快樂。我從來冇期望過我有好成績，攞住滿江紅嘅成績表，從冇面紅。為咗唔好麻煩阿爸，我中二嘅時候，已經有阿爸嘅圖章，一切學校通告、手冊，我都一手包辦。滿江紅嘅成績表，從來唔駛阿爸過目。阿爸阿媽從未因為學校成績閙過我一句，我返學讀書，從來冇壓力。大羅嘅名言（上次去倫敦探佢，提起過，佢唔記得晒）：如果嚤囉仔會考合格，就證明香港教育政度嘅失敗。大羅嘅猜想係合符羅輯，佢只係以事論事啫。世事如棋，點會咁容易畀你估到，我居然考咗入師範。呢條大懶蟲，居然變成人師，你睇，人生果然可以好荒謬。以後十五年，教體育，即係一邊玩，一邊賺錢。人哋猛呻學生難教，我就日日同學生玩，游水踢波打斛斗。喺香港做咗15年教師，玩足十五年。冇壓力、薪高糧準假期多，我梗係受寵喇。
有時啲嘢，冇話咁著數。食咗三十幾年順景，大脹小回都好正常，況且春夏之間嗰件事，係全體中華子孫嘅大刦，我係咁意揩到邊， fing 咗去南半球。我呢個小薯仔嘅遭遇，對比起大中華命運，簡直係蚊髀同恐龍髀--- 比都冇得比。憑藉樂天幼稚性格，喺呢片古老紅土大地嘅東南一角，儍更更又畀我玩多2O年。除咗工時長，呢個大缺點之外，我都算係搵到份好工喇，而且，睇個樣，呢份工重有排做。呢一生人，so far, touch wood 自己從未為生活擔憂過 ( 有冇邊個其他人擔憂過呢?我就控制唔到嘞）。睇番轉頭，亂打亂撞，畀我哋發現呢一片果然係人間樂土。傳統西敏寺式議會制度，民風純僕，社會氣氛和諧。我可以肆身於此，我梗係受寵喇。
當然唔可以唔講我身邊嗰一半，我哋細細個就識，佢陪咗我近半個世紀（嘩，有冇咁誇呀?）（講大些少啫，得唔得先）。記得有一次，一班人喺九樓傾偈，忽然阿金仔（阿蚊記唔記得佢，喺羅師讀音樂，高我一屆啩?）指住佢，同我講：「點解佢對你咁好」？
我成日話自己對食物冇乜所謂，實情係我經常食到好嘢。讀書時，冇乜銀，都成日有三角嘜朱古力，白箭香口膠食。佢精於煮嘢，呢個係公認喇，幾十年來，靚湯靚餸，從未間斷。古今多少人，窮一生精力去追尋美饌佳餚，我大剌剌坐喺度，就珍饈盡嘗。我又話自己對衣著冇乜所謂，其實，多數嘅衫褲鞋襪，我都唔駛點粗心，咁上下，自自然然有適時衣款擺喺衣櫃，著到著唔晒。
有個時期，我鍾意揸電單車，阿昌居然搵到一架二手嘢，價值650蚊，我邊度有。同佢講，冇幾耐，我就有錢買喇。咦，嗰650蚊，好似到而家都未還喎。高中時，扮嘢彈結他，最初，借咗 Miss Ko 嘅，冇幾耐，我就有個新結他喇，而家結他重喺屋企。我想要嘅嘢，不知如何，就有人幫我預備好。
三年前，大小姐入埋大學，我忽然戚起條筋，要試試 solo 旅行，而且專揾唔多平常嘅地方去。多數人知我要去 solo旅行，第一句問嘅就係，「佢畀你一個人去咩」?記得第一次係去以色列，臨上機時，佢攬到我實一實，佢憂心個樣，寫晒喺個面上。佢實在唔放心，但從冇講出半個不字。啱啱相反，重幫我搞掂機票，打點鋪頭等等雜務，駛我無後顧之憂。我有時照鏡會問下，鏡中人除咗五官端正、醒醒目目、聰明伶俐、......之外，有乜嘢值得人哋咁樣去愛惜你呢?我問佢，佢笑笑口話，「你?你梗係一無是處喇，貼個郵票寄你去阿布扎比都冇人要。」咁都得?揾唔到答案，唯有求諸於天喇。一定係上天派一個天使嚟照顧我。
咁，touch wood ，我梗係受寵喇。
再噏過
嚤囉
行政會議一哥林煥光出席理大一個教育硏討會，佢爆料話阿爺認為香港係 a spoiled and loss child。我又唔明嘞，既然殖民政府咁邪惡，究竟我哋畀英國佬虐待吖?抑或係生骨大頭菜，畀佢種（縱、寵）壞呢?真係吊詭。後來王永平話，種壞香港嘅係北大爺。嚇咗我一跳，佢?佢種壞香港?係咩?
東方呢粒明珠係唔係縱壞咗，我唔知。況且，受縱（寵），唔一定壞。我自己，就係一個受寵嘅人（我自問唔係一個壞人）。中華傳統，避講好嘢，怕小器。所以唔會讚細路仔，驚佢受唔起。見到細路，唔可以講「靚仔，得意」，要講「好乞人憎、好醜樣」。鬼佬都有相似地方，每逢講幸運嘅嘢，都要加上 touch wood。我要講我受寵嘅故事，梗係要一路講，一路掂住嚿木至得。
係唔係幸福，從來都係比較。睇下地球物種，有蛇蟲鼠蟻，魚蝦蟹、豬牛羊。多數都要戰戰驚驚咁去過每一分每一秒，又要好辛苦，出盡法寶去搵嘢食，又唔知幾時，會畀隻乜嘢怪獸食咗，變咗人哋嘅食物。，總之一世都擔驚受怕，冇覺好瞓。我居然生而為人，成為萬物之靈嘅一員，我梗係受寵喇。
就算好彩做到人，都要睇乜嘢時份。叫得做人（我只講智人 homo sapiens）， 已經喺呢個地球存在咗25萬年，畀你幾生修到，生而為人，如果生不逢時，投胎做咗原始人，都好大鑊，又要打獵，又要瞓山竉。出街又要因住唔好踫到獅子老虎，又千期唔好有隻金錢豹伏喺樹枝上，吼住你行近埋嚟，撲落嚟一咬，咁又一世。我唔係生喺蠻荒世界，有城巿、有文化、有藝術、有科技。唔駛擔心畀猛獸撕成碎片，我梗係受寵喇。
據說，自有人類歷史以來，呢個世界都唔停咁打緊仗。打開歷史書，就係一頁一頁染滿血蹟、你死我活嘅鬥爭史。唔講第二度，亦唔講咁遠。中華大地，1600年明末流寇、李治成、張憲宗，天災人禍，啲人餓到要易子而食。帝女花阿爸吊死煤山，清兵入𨶹，留髪不留頭，掦州十日、嘉定三屠。查嗣同，維民所止文字獄。啲官叫邊個死，邊個就要死，七屍八命梁天來，慘絕人寰。清末，倭寇犯境、甲午海戰、列強侵華、割地賠款。義和拳民，太平軍之亂，互相屠城，死亡人數之多，至今仍係世界紀䤸。就算推翻滿清，都冇和平，北洋政府，南北對侍。一戰結束，喪權辱國二十一條。九一八、七七事變，八年抗戰。原子彈結束二戰，國共兩黨繼續打餐死。....... 再講多啲都得。呢幾百年，根本就係殘酷大世紀，人，生喺中華大地，點會有啖安樂茶飯!我生喺大戰結束，呢一生 so far , touch wood，未經過戰亂，有幸成為一個戰後嬰兒，我梗係受寵喇。
二戰後，世界權力再次劃分，中東、非洲、南美...幾多新興國家獨立。經歷咁多百年嘅野蠻，呢個殘酷嘅世界逐漸走向文明，理性。民主制度，邊實踐，邊改善。社會保障，民族平等，性別平權等等，喺戰後和平環境中，都逐步得以改善。中華大地，先有日本仔敗返東贏，後有老蔣敗退美麗島。以為馬列會為中華大地解開千年封建皇朝枷鎖，會為華夏黎民帶嚟民主自由富足嘅新國度。點知，共和國原來祗不過係另一個皇朝嘅稱號。解放後，運動一個接住一個，貧窮、飢餓、互鬥、封閉....、咁點生活?當時中國有七億人口，我生於中華大地，但偏偏唔係七億份之一，而係220萬份之一。我出身清貧，但從未試過捱餓。我嘅童年記憶，touch wood 就係一幕幕開心嘅片段。有幸喺呢一小段借來嘅時間，現身喺呢一小片借來嘅空間，我梗係受寵喇。
講過好多次，我嘅中小學階段，基本上係冇做功課嘅記憶，我一定係經常唔交功課嘅學生(馬仔、芝芳，我有冇講錯）。喺中四之前，我從未試過溫書，就算考試前都唔會。到中四、五、會考，先至喺考試前一個禮拜温下書，返學嘅記憶就係玩玩玩玩玩，非常快樂。我從來冇期望過我有好成績，攞住滿江紅嘅成績表，從冇面紅。為咗唔好麻煩阿爸，我中二嘅時候，已經有阿爸嘅圖章，一切學校通告、手冊，我都一手包辦。滿江紅嘅成績表，從來唔駛阿爸過目。阿爸阿媽從未因為學校成績閙過我一句，我返學讀書，從來冇壓力。大羅嘅名言（上次去倫敦探佢，提起過，佢唔記得晒）：如果嚤囉仔會考合格，就證明香港教育政度嘅失敗。大羅嘅猜想係合符羅輯，佢只係以事論事啫。世事如棋，點會咁容易畀你估到，我居然考咗入師範。呢條大懶蟲，居然變成人師，你睇，人生果然可以好荒謬。以後十五年，教體育，即係一邊玩，一邊賺錢。人哋猛呻學生難教，我就日日同學生玩，游水踢波打斛斗。喺香港做咗15年教師，玩足十五年。冇壓力、薪高糧準假期多，我梗係受寵喇。
有時啲嘢，冇話咁著數。食咗三十幾年順景，大脹小回都好正常，況且春夏之間嗰件事，係全體中華子孫嘅大刦，我係咁意揩到邊， fing 咗去南半球。我呢個小薯仔嘅遭遇，對比起大中華命運，簡直係蚊髀同恐龍髀--- 比都冇得比。憑藉樂天幼稚性格，喺呢片古老紅土大地嘅東南一角，儍更更又畀我玩多2O年。除咗工時長，呢個大缺點之外，我都算係搵到份好工喇，而且，睇個樣，呢份工重有排做。呢一生人，so far, touch wood 自己從未為生活擔憂過 ( 有冇邊個其他人擔憂過呢?我就控制唔到嘞）。睇番轉頭，亂打亂撞，畀我哋發現呢一片果然係人間樂土。傳統西敏寺式議會制度，民風純僕，社會氣氛和諧。我可以肆身於此，我梗係受寵喇。
當然唔可以唔講我身邊嗰一半，我哋細細個就識，佢陪咗我近半個世紀（嘩，有冇咁誇呀?）（講大些少啫，得唔得先）。記得有一次，一班人喺九樓傾偈，忽然阿金仔（阿蚊記唔記得佢，喺羅師讀音樂，高我一屆啩?）指住佢，同我講：「點解佢對你咁好」？
我成日話自己對食物冇乜所謂，實情係我經常食到好嘢。讀書時，冇乜銀，都成日有三角嘜朱古力，白箭香口膠食。佢精於煮嘢，呢個係公認喇，幾十年來，靚湯靚餸，從未間斷。古今多少人，窮一生精力去追尋美饌佳餚，我大剌剌坐喺度，就珍饈盡嘗。我又話自己對衣著冇乜所謂，其實，多數嘅衫褲鞋襪，我都唔駛點粗心，咁上下，自自然然有適時衣款擺喺衣櫃，著到著唔晒。
有個時期，我鍾意揸電單車，阿昌居然搵到一架二手嘢，價值650蚊，我邊度有。同佢講，冇幾耐，我就有錢買喇。咦，嗰650蚊，好似到而家都未還喎。高中時，扮嘢彈結他，最初，借咗 Miss Ko 嘅，冇幾耐，我就有個新結他喇，而家結他重喺屋企。我想要嘅嘢，不知如何，就有人幫我預備好。
三年前，大小姐入埋大學，我忽然戚起條筋，要試試 solo 旅行，而且專揾唔多平常嘅地方去。多數人知我要去 solo旅行，第一句問嘅就係，「佢畀你一個人去咩」?記得第一次係去以色列，臨上機時，佢攬到我實一實，佢憂心個樣，寫晒喺個面上。佢實在唔放心，但從冇講出半個不字。啱啱相反，重幫我搞掂機票，打點鋪頭等等雜務，駛我無後顧之憂。我有時照鏡會問下，鏡中人除咗五官端正、醒醒目目、聰明伶俐、......之外，有乜嘢值得人哋咁樣去愛惜你呢?我問佢，佢笑笑口話，「你?你梗係一無是處喇，貼個郵票寄你去阿布扎比都冇人要。」咁都得?揾唔到答案，唯有求諸於天喇。一定係上天派一個天使嚟照顧我。
咁，touch wood ，我梗係受寵喇。
再噏過
嚤囉
No comments:
Post a Comment