2011.10.23 議會公道，駛乜噏粗

2011.10.23 

議會公道，駛乜噏粗。

柯拿，大家好，

袋鼠國瞓喺南半球，古老大陸，連動物都古怪過人。世界立立亂，每日發生咁多嘢，都好似唔關佢事咁。最緊要係一路飲啤酒，一路睇AFL（澳式足球）。本周大事係事頭婆到訪。事頭婆要喺英聯邦峰會（2011 commonwealth Heads of Government meeting）演講，所以提早幾日到袋鼠國，先到坎培拉睇花展，再去布里斯本（我唔叫「布里斯班」，乜嘢「屍斑」？！我唔鐘意），昆士蘭去年又打風，又大雨，又水浸，總之一鑊煙，佢嚟安慰吓班臣民。實在年初威廉皇子都到過昆士蘭。之後，事頭婆就會去栢斯（西澳洲）峰會演講。

講起女皇，大家知否澳洲喺憲制上，係屬於大英帝國。睇吓國旗，都係Union Jack（米字旗）再加南十字、聯邦星，極似97前香港旗。又有聯邦總督，好似肥彭，名義上代女皇管理袋鼠國。每年大選後，候任總理及其班子要到總督府瑾見總督，總督就會代女皇任命總理及其內閣成員。有趣嘅係，原來總督係由總理題名比英女皇，女皇委任後，又返過嚟變成總理嘅波士。憲制上，甚至有權罷免總理。關係錯縱複雜。

每當有國宴，例如胡主席到訪袋鼠國。祝酒時，袋鼠總理話：

「為胡主席飲杯！」

胡主席就會話：

「為英女皇飲杯！」

作為袋鼠國民，有啲人條氣唔順，我哋樣樣都咁獨立，點解重要黐住你英國佬，做你嘅臣民呢，又？所以就引發約13年前嘅保皇立憲、共和之争！全體國民即時分成兩派。一派話共和派係美國佬左仔，係破壞穩定……。另一派就話保皇派係老而不，漠視社會進步……。總之互數不是，極盡破壞河蟹之能事。

當時，有一日，我舖頭有個客，睇嚟佢係保皇派，佢先數共和派嘅種種不是，然後問我係邊派。我話：「我由殖民地香港嚟，見慣女皇像、英國旗，有乜禮儀都唱天祐我皇。如果袋鼠國民鍾意做英國殖民地，我都冇所謂。」呢番話實在暗寸佢哋保皇黨冇志氣，有獨立嘅澳洲人都唔做，硬係要黐住英國佬做殖民。

為搞掂呢壇嘢，1999年，聯邦政府就進行全民公投。民主社會，唔會好似林公公話，「哎…民意…已經好清楚」，又或者話，「公投？浪費公帑，做民意調查就得喇」。因為大家都知道民意可以操弄，調查結果當然可以任你扭曲，任你解釋，為你所用喇。所以，一人一票，清清楚楚。   

當時嘅執政自由黨甚至容許其內閣成員有不同意見，當時總理何華德係保皇派，而佢嘅副手，財長高德樂就係共和派。

事頭婆亦表態，話尊重各位袋鼠先生、小姐嘅意見。你成立袋鼠共和國我冇意見，你繼續做我嘅殖民地，亦十分歡迎。

公投結果？保皇派以些微票領先，君主立憲制，維時現狀至今。幾時再提共和？怕者要等到事頭婆騎鶴個日喇！

投票結果公報後，無論輸贏，袋鼠先生小姐即刻返歸，繼續飲啤酒睇Rugby，之前抝到面紅耳綠嘅議題，即時拋諸腦後。立憲派，共和派一齊飲番杯，一齊打番場波，回服河蟹嘞。

冇嘢嘅，制度公道，願賭服輸。投票前，盡力争勝，輸咗亦保持丰度，養精蓄銳，下次再砌過。唔駛動刀動槍嘅。

如果制度公道，人人公平，每人都有得say，而且份量相等。邊個鍾意抓爛塊面，粗聲粗氣喺議會講粗口。唔公平嘅選舉制度，唔公平組成嘅議會，重可以做啲乜。

唐山大兄，想河蟹？城管、武警唔係長治久安之法。

唉…，唔知佢明唔明！

喺電台聽到一首歌，係德文嘅，原來就係我小學唱過嘅野玫瑰，有冇人記得？

野玫瑰（廣東話）

男孩看見野玫瑰，
荒野中的玫瑰，
清早盛開真鮮美，
急忙跑去近前看，
愈看愈覺歡喜，
玫瑰 玫瑰 紅玫瑰，
荒野中的玫瑰。

男孩說我要採你，
荒野中的玫瑰，
玫瑰說我要刺你，
使你常會想起我，
不敢輕舉妄為，
玫瑰 玫瑰 紅玫瑰，
荒野中的玫瑰。

男孩終於來折它，
荒野中的玫瑰，
玫瑰刺他也不管，
玫瑰叫著也不理，
只好由他折取，
玫瑰 玫瑰 紅玫瑰，
荒野中的玫瑰。

冇乜特別意思，不過忽然想唱吓而已。Anyway……。

再噏過，

嚤囉