2013.10.27 一噏又話幾十年，及時行樂大過天

2013.10.27  

一噏又話幾十年，及時行樂大過天

柯拿，大家好，

睇報紙至知，原來10月25日係 Danny 仔陳伯強忌辰，係20年前！乜時間真係過得咁快，而家講起一啲嘢，郁下就以十年廿年咁計，幾恐佈。

講起佢，就梗係講佢嘅歌。我都好鍾意唱佢嘅歌，好聽、易唱，音域同我好啱key。大小姐吹色士風，佢考八級時，買咗支高級嘢。我執二㰙，攞咗支舊嘅嚟吹。只須要大小姐教我啲音喺邊度，我就識玩幾隻歌。Danny仔啲歌，好似，今宵多珍重等，最啱用色士風玩。

記得有一次，當時天皇巨星嘅梅艷芳演唱會，Danny 仔係其中一個嘉賓。佢同阿梅又唱又跳就梗嘅嘞，今宵多珍重就係必唱嘅歌。嗰次， Danny 仔喺台上有一段獨白，佢恭喜阿梅有今日嘅成就⋯⋯。實在係一段好普通嘅恭維客氣說話，當然亦係出自真心。但我聽起嚟，我感受到佢替好友高興之餘，亦自憐懷才不遇。又後生靚仔，又作曲作詞，又唱得又跳得。居然半紅不黑，最後重英年早逝，都算命苦。

而家Danny 仔同Anita，可以喺西方極樂，載歌載舞。人間種種，何必太多顧慮，富貴浮雲，虛幻一場，每一日快快樂樂咁過，至係正經。

講起阿梅，報紙又話，因為債務問題，佢嘅遺物畀人拎去拍賣，賣唔去嘅就變咗垃圾，去晒堆填區，累到一眾梅迷，喺垃圾堆爬上爬落去尋寶。人死如燈滅，曾經擁有過嘅，留番低嘅。當事人已無能為力，話唔到事喇。可能唔知邊一日，向閻君申請個囘府證，然後化作一縷青煙，咁就可以故苑重遊。不過，梅姐返番嚟，見到自己心愛嘅用品，成為堆填廢料。見到自己阿媽阿哥，一曰到黑，為個銀失禮人前⋯⋯。呢個人世，重有乜好留戀，快快脆脆返番地府，飲碗孟婆茶，投胎去也。

原來梅姐嘅命運，早有預示。李碧華拍胭脂扣，如花一角，除梅姐外，不作他人想。如花、十二少相約自殺殉情。當日，如花吞鴉片而死，點知十二少背棄盟約、臨陣縮沙。如花死後，喺地府等極都見唔到十二少。53年後，重訪故地。見番潦倒嘅十二少，方知十二少並非如自己所想，係一個對愛情堅貞嘅人。眼前呢個潦倒猥瑣、貪生怕死嘅核突佬，點會係自己魂牽夢繫、風流倜儻嘅十二少！⋯⋯。呢個人世，重有乜好留戀，快快脆脆返番地府，飲碗孟婆茶，投胎去也。

少年時代，有個心，相信民主公義自由，會擁抱神州大地。愈半個世紀嘅經歷，此心已死。不過，呢個已死嘅心，偶爾都會重返故地，可惜都係揾唔到靈藥，令佢搏動。⋯⋯。呢個心，唔會飲孟婆茶，不過要快快投胎。此處不留人，自有留人處。心之所屬，邊個逼到我，世界咁大，必有安心之所。邊度令我開心，邊度就係我嘅蓬萊。

紀念 Danny 仔，就以此曲作結。

 今宵多珍重

主唱：陳伯強

作詞：鄭國江

作曲：王福齡

愁看殘紅亂舞 憶花底初度逢

難禁垂頭淚湧 此際杏月朦朧

愁緒如何自控 悲哀都一樣同

情意如能互通 相分不必相送

放下愁緒 今宵請你多珍重

抱入懷裡 深深一吻莫匆匆

懷裡情人在怨 相愛偏不能容

情人無言地哭 心怎不隱隱痛

再噏過

嚤囉