2011.07.10 香港雞，二胡豬皮歡樂嚟；窒到瓜，哈佬居然噏唐話

2011.07.10 

香港雞，二胡豬皮歡樂嚟；窒到瓜，哈佬居然噏唐話。

柯拿，大家好，

十分高興收到芝芳、芝貓姊妹花回應，鼓舞得很。記唔記得有一次喺香港雞有一個表演，打通咗兩三個課室。中樂組表演歡樂歌（？）。老囉頭吹西班牙狂想曲，miss Lee鋼琴伴奏。宋家姊妹及孔龍均有出席。我寫咗一個相聲，我同黎樹春表演。馬仔，重記唔記得係點？

我同啊樹各自由兩側走向台中，作偶遇狀…。

樹﹕嚤囉

我﹕（緊接）叉

樹﹕long time no see

我﹕is your body well？

樹﹕my body is very well, thank you.

…………

嗰時攞呢啲英文嚟講笑，估唔到n年後，來到袋鼠國，居然聽到鬼佬鬼咁正經咁講long time no see！不過重未聽到有人問is your body well。

咦！面青都可能在場喎。各香港雞校友，究竟嗰次係乜嘢表演？

鄭少講嗰次喺南洋戲院隔籬電車路街邊做小販賣遙控車呢單嘢，我化咗灰都記得。嗰陣，年三十晚擺街邊賣嘢係冇人拉嘅，當晚擺街邊嘅有井少，大羅、二羅…，重有邊個呢？快招認！我聲大大叫賣係指定動作喇，一眼見到有廿零歲嘅哈佬行過，我即刻轉明珠台，對住哈佬大嗌〝radio control model car〞，個哈佬停咗步望住我，扮晒一頭霧水咁欵。乜你聽唔明咩，心諗，我慢啲講多次過你聽。我重覆。哈佬居然用廣東話對我講：「我都唔知你講乜嘢！」然後帶住詭異微笑，施施然走人！在坐各人見到我比外國列强欺侮，居然亳無愛國心，全部哈哈大笑。（你地因住，學李國章話I will remember this！）我係好學嘅人，即刻請教大羅，佢話，唔係咁講嘅。大羅，記唔記得呢單嘢？又記唔記得你當時點樣指導我呢？

實在大家都知，呢啲係鬼佬嘅幽默。我學到嘢。有時喺舖頭，有人（鬼）對我講一大堆類似中文嘅嘢，我又扮作一頭霧水，然後講Oh, sorry I didn’t realise that you were talking in Chinese。然後大家就哈哈大笑。

啊珊上周三一早返到雪梨，以後有餐好食喇。今年蔣家都係驛馬星動，到八月尾，我倆會去西藏、九寨溝、張家界，然後經香港至返雪梨，到時飲茶再噏。

我之前問仁類，我哋政見有何不同。佢講咗，我未講，咁唔公道，而家講番。

睇樣，都有幾大距離，（如理解錯咗，請開聲，誤會就唔好喇）最大者係我完全唔覺得呢個係「我哋嘅政府」。不過，你講嘅自由表達意見等乃普世價值，我點會唔認同呢？喺電郵撩一兩隻字，有時好難表達，有機會三口六面交流吓就好咯！

我一年前連電郵都唔識，因為Ｋ仔，我開始用電郵同九樓各人溝通。多謝馬仔經常更新電郵地址。我鍾意講自己，一來自戀，二來作為周記，好等將來郁都唔郁得時，可以睇番自己啲威、水史。最重要者，係拋磚引玉，希望我又講，你又講，好似返番九樓，坐喺長枱邊吹水嘅光景。坐喺長枱邊，各豬朋狗友一個微笑，一聲yes，都係鼓勵。一個皺眉，一句「係咁嘅咩？」都係刺激思考嘅動力。各位識做喇！

但我絕對唔鍾意我寫嘅嘢會令人反胃，變成垃圾電郵。如我乞你憎，唔該盡快刪除，並通知我將貴寶號由我嘅電郵名單中删除。

再噏過，

嚤囉