2012.02.12 李雲噏出迷魂鎖，特首摔角招式多

2012.02.12 

李雲噏出迷魂鎖，特首摔角招式多。

柯拿，大家好，

明我以德。周三，啊Sam重返港大，同80後90後師弟師妹大唱鐵塔凌雲。重寫咗新歌「明我以德」賀港大百年慶。後生仔女，大唱40年前嘅歌。識我耐嘅，都知我係SamHui 粉絲，以後唱浪子心聲、半斤八両，唔怕比人話out喇！

懷舊，除咗啊Sam嘅歌，重有摔角。點會忘記君子馬蘭奴、迷暈鎖李雲、印度之虎戴加星……。初到澳洲時，偶然打開電視，居然見到摔角！招數當然更加兇狠，好多摔角手重戴住面具，招式新穎，喺擂台上打空翻，飛嚟飛去。不變嘅係嗰個四面圍繩嘅摔角台、重有朦查查公証，同埋，坐喺第一行嗰個成日企起身，指住出茅招嘅摔角手大鬧嘅啊婆。原來摔角喺澳洲係大生意，呢度叫WWE，即World Wrestling Entertainment，而家重有好多fans。

講講吓，發覺特首SElection似摔角多過似跑馬。明明係戲一場，摔角台下，觀眾個個磨拳擦掌，為自己所擁嘅摔角手高聲吶喊。

馬蘭奴正使出毒蛇鑽，忽然黑魔寇蒂斯喺褲頭攞出胡椒粉撤向馬蘭奴，君子即刻乜都睇唔到。黑魔再拖馬蘭奴去繩角，用突出嘅繩箍住馬蘭奴條頸……。台下啊婆企起身大嗌，話比矇查查公證聽。但嗰邊廂，毛人鴕利奥作狀同矇查查公證理論，遮住黑魔出茅招。……。

有一年，摔角手來港比賽（表演），上歡梨今宵，馬蘭奴、李雲正接受何守信訪問，忽然有兩個「奸」嘅（狂人潘納？茅王田中？邊個？）由後台走出台前，四個人就喺錄影厰內打起嚟，重攞起啲櫈四圍掟。嚇到啲觀眾雞飛狗走，錄影厰內亂晒大龍。一輪打鬥，邪不勝正，君子、迷魂鎖，合力將奸人打番入去後台。馬蘭奴繼續接受何B訪問，此時，見到佢額上流緊血，可知打鬥幾咁激烈，真嘅一樣。馬蘭奴最後聲言，一定要喺擂台上好好教訓呢班奸人一頓。

唐營、梁營。紅酒、西九。大厰家、穿膠花。出身富貴、生於閉翳。……全部都係包裝。港人又幾入戲，大家非常努力去討論，迷雲鎖、毒蛇鑽、倒頭舂、熊抱、前臂攻擊等絕招，究竟邊招好打啲。又齊聲鬧衰啲茅招，捽眼、插眼、箍頸、撤胡椒粉、兩個打一個……等。當然更加要鬧矇查查公證，冇把好關。

同時，出埋學者用醫學、運動力學、去研究招式嘅力度、殺傷力。又由社會學、倫理學角度，去評論招式是否合乎道德、老百姓能否接受…等高級理論。各大傳媒亦非常配合，日講夜講，務求將戲演活。

細佬仔時，擔櫈仔坐喺電視機前，真係以為，呢班喺擂台上打到擂台下嘅摔角手係真打嘅！

用啊Sam嘅世事如棋作結

倉卒歲月，世事如棋

每局都光怪陸離

驟晴驟雨人事天天變

有喜亦有悲

恩怨愛恨，世事如棋

每局都充滿傳奇

若顰若笑難辨心中意

似比幕前做戲

苦衷拋萬里，今天慶幸有知己

捉番盤棋共行樂

衝破內心藩籬

張眼遠望，世事如棋

每局應觀察入微

但求共你棋藝相比較

瞭解做人道理                        

再噏過

嚤囉

Ps. 本周出咗20篇西藏遊日記，載喺我個blog。