2011.11.20 小號巧遇播音后，噏到薔薇口難收

2011.11.20 

小號巧遇播音后，噏到薔薇口難收。

皇后到訪

柯拿，大家好，

熱，今日好熱。睛天萬里，揾嚿雲睇吓都冇。本周有一個夜晚，居然係44年來最熱嘅一個晚上，夏天真係嚟咗。

呢個禮拜，我行路双腳冇乜掂地，ha！點解呢？原來經仁類一讚，即刻鬆毛鬆翼。不過諗真啲，智者真係唔敢當，因為萬一唔夠「強」，慢吓手變成「弱」，就成為「弱」嘅智者，咁就大劑喇，after all，我只係講我心中話啫。盼望一日，神州子民都可以無懼咁講出心裡話。

一日，喺舖面低頭做緊嘢，忽然聽到一把熟悉嘅聲。我即刻認到。「尹芳玲！」我叫咗出嚟，佢估唔到只係想去舖頭整番好個手袋條帶啫，居然有人可以憑把聲認得佢，當然好高興。從末見過佢真人，只係喺報刊及電影上見過。歲月催人，當然不復當年青春，但温柔和藹，落落大方就深深感受得到。我當然不忘將我對佢嘅記憶倒出嚟。播音皇后，大丈夫日記，手車伕之戀…，重問薔薇之戀係咪佢親自唱。咁多年後，喺地球另一面，有粉絲咁記得你，比你都開心到飛啦。原來佢住喺舖頭附近，此後，不時佢都會嚟嗲兩句。有冇收佢錢整手袋？唔收唔好意思嘅，收順啲咁話喇！

講起大丈夫日記，講起播音皇后，講起尹芳玲，焉能忘記同佢齊名嘅播音皇帝，林彬。當年風暴，我雖唔喺旋渦之中，亦喺氣旋邊沿。67年何文田窩打老道山，火燒福士甲虫，皇帝葬身火海。港英落重賞緝兇，可惜（or幸好？）無人獲得懸紅。至今仍係未破懸案一宗。當年嘅我同而家嘅我，睇呢件事，當然係南轅北轍。呢段歷史仍然係禁區，邊個有力，重現歷史真像，我撑你！！！草原上嘅動物，努力喇！

我喺九寨溝，一路行山，一路唱薔薇之戀，估唔到冇耐就過到尹芳玲，冥冥中，有預兆，信耶？

…………………

薔薇之戀

作詞：周聰　作曲：鄺天培　演唱：尹芳玲

我問你想什麼，你總不對我說，
你要是愛薔薇，那怕薔薇莿多。

我問你要什麼，你總是看著我，
你要是一條心，那怕會受折磨。

浮生如夢為歡幾何，良辰美景不要錯過，
迷濛的月色看不清楚，難道你不敢愛我。

我問你愛什麼，你總是看著我，
你要是愛薔薇，為何不說清楚。

…………………

我諗，華夏之戀就好似薔薇之戀。點解要帶刺，要炎黄子孫愛得咁辛苦？點解愛佢要受折磨？愛佢點解唔敢講？幾時良辰美景再現？……？

Ps. 請上面書，一睹芳容

再噏過，

嚤囉