2011.06.12
九樓室內呢張枱，你噏我噏冇痴呆
呢張枱本來擺正中間，大装修後搬近門口
柯拿，大家好，
九樓室內，辦公室外橫放咗一張長枱。我哋喺呢張枱上寫壁報、寫鋼板、做油印，搬櫈圍住又可開會。大裝修時，一齊食飯，呢張就係大餐枱喇。老咩頭提及啊木劏兔仔、以及我用240V電串住一個燈胆電曱甴…等等古靈精怪嘅事，通通都喺呢張長枱上發生。到夜晚，呢張枱就變成老咩頭張牀喇。
我嘅九樓前輩，多數係讀得書嘅人，不少出身官津名校。到我呢輩，雖仍有出身名校者，例如井少、二羅（只係舉例，未提到者唔好嬲），但肆業於雞記者就更多！我哋一放學就即上九樓，當然各式其色，而最常做嘅就係圍住呢張枱，猛噴口水，老咩頭記唔記得講過呢句說話﹕「你班友，書又唔讀，成日圍住張枱，喺度發噏風」！
二羅，記唔記得成班友（重有邊個？）圍住張枱睇老夫子水虎傳，笑到個個碌晒地？呢一幕，我記得好真！
呢張枱陪住我哋渡過幾多個開心嘅日子，佢係我哋交流心得、人生經驗嘅平台。坐喺呢張枱邊，無需就住就住咁講嘢。三羅記唔記得「皮、皮、皮……」呢首歌，就喺呢張枱集体創作！不過有時太真性情，會得罪人，but that is life…...好懷念呢段日子！一噏，就係三十幾年前嘅事。
我一向都唔識用電腦，2010年，我決定solo旅行，如果我連電郵都唔識，會好唔方便，於定就開始學用電郵同寫blog。我第一批嘅電郵係book hostel嘅。跟住喺旅行途中，每日都發出電郵同blog，馬仔，你應該最清楚喇！
4月我旅行完返港，得知Ｋ仔抱恙，各好友即用電郵互相聯絡，互相照應。此後Ｋ仔就得到天氣報告呢份工喇！
到6月至8月間，安哥發咗兩個電郵﹕「老鬼們，準備開始人生吧」、「兩個選擇」，咦，寫得咁過癮，你知我點會執輸，於是就開始寫電郵喇。我第一篇用呢種形式寫嘅電郵係去年8月14日，題目係「噏得就噏，咁至適合」。咁一路keep住，寫到而家。
我有個心願，要將我過去嘅事寫番出嚟，我咁諗係因為有時我記起我啊爸啊媽，我會問，佢哋嘅童年係點過嘅呢？佢哋啊爸啊媽又係點樣嘅人？佢哋點樣相識？佢哋以往嘅生活點滴？……？佢哋在世時，我冇問。當我想問嘅時候，佢哋已經答我唔到。touch wood，好似死鬼廋皮猴Sinatra話，regret ，I had a few，而呢樣嘢都係我人生嘅其中一個大遺憾！
世界輪流轉，你而家噏你啲嘢比你個乖仔乖女知，佢啋你都儍。百零二百年後，我哋兩腳一伸，騎鶴西去，班友想知我哋啲嘢，如果我有寫低嘅話，佢哋都可以睇得返，盡吓人事咁啦！呢個就係我喺blog度寫回憶錄嘅原因。而我每周都堅持寫一篇電郵，就好似周記一樣，記低一周嘅所思所想喇，每一篇，我都記低，以後佢哋隨時可以睇番。
電郵就好似九樓呢張枱一樣，大家圍住發噏風，口水多者，就噴多啲，亦有人選擇只聽唔講。不過，圍喺張枱時，你眼望我眼，邊個釣緊魚，邊個留心聽。邊個likie，邊個唔likie。笑聲、媽聲；掌聲、掌摑聲﹔開眉，皺眉都係即時嘅回應，一目了然，咁就係交流啦！但係隔住個網，我睇唔到你嘅尊容，亦聽唔到你銀鈴似嘅笑聲，始終掙咁啲嘢！你知點做啦！
都要感恩嘅，我哋生活喺自由世界，點噏都冇問題，so far。但自由唔係必有之物，係要守護嘅，會唔會消失呢？靠你哋啦！
再噏過，
嚤囉
No comments:
Post a Comment