2011.11.07 願有相士噏前程，煲吠唔駛好鬼驚

2011.11.07 

願有相士噏前程，煲吠唔駛好鬼驚。

柯拿，大家好，

連續七個星期不停開工，好在有娥姐幫手，噚日係旅行後第一個唔駛返工嘅星期日。咪以為我會攤喺屋企乜都唔做，相反，星期日非常咁唔得閒。所以呢篇周記又遲咗

一早起身怱怱食個雞批飲杯咖啡，驅車去邦大海灘Bondi Beach。每年一度，好多世界各地嘅大型雕塑好手，將自己作品擺喺呢度。展覧場地實在係Bondi海灘沿海岸嘅山坡上，所以就叫做Sculpture on the beach。如果展覧場地由頭行到尾，再行返轉頭，需時約個半鐘。再唔講如果每件展品慢慢欣賞，花你一整日絕唔出奇。井少，有冇興趣重臨Bondi，不過珍寶蚝就已經絕咗種喇。

我地怱怱忙忙行個匝，就要走頭，因為蔣家大小姐今日有表演，我哋必定捧場。係佢唱歌嘅學校每年一度嘅表演，水準都幾高嘅。最緊要係人人都好有heart，對音樂好有熱誠，全場五百幾人，熱情高漲。全場表演得最好係邊個？重駛講，梗係我個乖乖喇。

我會將短片及相放上fb，請少候。

散場已經係七點喇，約咗世翀、Ivy食晚飯，大小姐夏澄有約，未克參加逢星期日嘅蔣家晚宴。是晚也，閒話家常，十分温馨也。世翀幫我買咗固ipad2又幫我放app，上plan等等，當然重要教我點搞呢件ipad2，以後各位如收到我由ipad發出嘅嘢，就知我已修成蘋果嘞。

今朝，一早起身，即刻打開TVB，睇吓區選搞成點。民建聯、工聯會帶領一眾有形、隱形建制人仕，將轉軚民主派、掟蕉力量派，鬼鼠大狀派等等打得落花流水，啊爺啊嫲見到乖孫咁得力，打咗一場咁漂亮嘅勝仗，一定飲得杯落喇！

呢個結果唔係我所願，但我亦樂見。

有四成幾人參與，投票率絕對唔算低，呢個結果始終係一人一票公平選出，願賭服輸，當然要專重選舉結果。雖然區議會仍然有委任，議會組成唔算公平，此是後話。

有人話，選舉唔係公平，因為一開始已經實力懸殊。啊爺啊嘛嘅乖孫，得到嘅銀両拾卜，源源源不絕，相比起一眾反對派，簡直蚊脾同恐龍脾，無得比！啊爺個孫做群眾工作做將仔細，無容置疑。要做得仔細，銀両嘅拾卜當然係不可或缺者。相比於要喺街乞人俾錢，或者只得一千零一條黎氏壹仔水喉嘅窮鬼，梗係優勝得多。不過，咁樣唔係唔認輸嘅藉口。

好明顯有四成幾人走出嚟，覆行公民權利及義務，用選票表示意見。其中大多數人支持啊爺乖孫，明顯獲得市民授權。至於嗰五成幾嘅人，以後有乜唔滿意，千祈唔好埋怨，因為係你自己主動放棄自已嘅權利，又或者表示，乜水選到都唔關佢事。我絕對唔會好似林公公嘅羅輯，「有五成幾嘅人冇投票，即係表示唔同意」。

區選後，我替反對派諗到三條路：

其一，東施效顰。學啊爺乖孫，蛇齋餅糭米。不過可能學唔嚟，因為五行欠水，唔到你話學就學。就算你想幫街坊排難解困，一來，人手唔夠乖孫多。更甚者，有關當局會向你諸多刁難，完全唔合作，反之，如乖孫開到聲，即刻有商量。所以，如果你有問題，要人幫忙，尤其係涉及神州官府，你會揾譚耀宗幫忙，抑或揾梁耀宗幫忙呢？一字咁淺啦！所以，呢條係死路。

其二，返歸瞓覺。既然大多數人唔likie你呢套，你又唔願意放棄自已理念。眾人皆醉我獨醒，好痛苦啫。咁樣，採菊東籬下，此中有真意，如此這般，算了罷。呢條係好嘆嘅路。

其三，螳臂擋車。繼續努力，雖千萬人，做自己想做嘅。呢條係艱難嘅路。得唔得，唔係自已可以講嘅，after all最後都係人民嘅抉擇。

咦，我有一個問題：早知會贏到開巷，五區公投，乖孫就應該揾人同掟蕉大狀聯盟選過，一舉踢佢哋五條友出局。咁，煲呔就唔駛聽埋啲乜嘢孔子、孟子、阿里士多德。咁就唔會噏爛仔、黑社會地方。又唔駛比長毛掟蛋，搞到話「當時我好驚」咁羞家喇。

有早知，冇乞兒，唉！

再噏過，

嚤囉