2014.07.16
我本書，出咗世喇！
香港書展有售
柯拿，大家好
舊年，出版社老闆、羊咩博士叫我寫本書，將我 did did 咁 dur 嘅旅行經歷同人分享。哈，佢搵啱人嘞。我天生多嘢講，係唔係都噏得一餐，講古仔正係我嘅興趣。不過都要扮下謙虛：「出書？講笑咩？得唔得㗎？⋯⋯er⋯⋯ ，好喇，試下喇。」求其作晒狀推辭幾句，就即刻應承上馬。
呢本書其實係我嘅遊記，寫嘅係我 2010 年，第一次做獨行背囊友去以色列及約旦嘅故事。之前，我完全唔識用電腦，為咗方便喺旅途中同屋企聯絡。我買 net book，開電郵，開博客。旅途中，每日都發電郵返屋企，每日都寫遊記，連同
嗰時，我唔識打中文，遊記都用英文寫，而家睇返，真係估唔到，我可以寫咁多英文。馬仔應該係最佳讀者，經常都有回應，而且，將全程遊記集成一篇，仲畀咗個題目，叫做：Morlaw's Planet。
為咗要出呢本書，舊年年尾開始重寫，再做多啲資料搜集，一方面豐富內容，最重要嘅係查證所有資料嘅真確性，呢一步，用咗好多時間。
全本書係用我熟悉嘅廣東話寫成，梗系喇，而家係講古仔，的麼了？幾冇癮，廣東話至夠傳神。我希望睇書嘅人，感覺係聽緊古仔。
我都算做得好快，今年二月中去南美洲旅行之前，就將全部遊記搞掂。三月中旅行返嚟之後，再搞掂埋自序、前言後語、簡介等等。跟住多次來回校對，六月尾，終於完成最後定稿。跟手，出版社開機印刷，咁就大功告成喇。
阿蚊(雷麗文)由頭到尾都睇住呢本書嘅製作，大熱天時，四圍奔波勞碌，大汗疊細汗，事無大小都親力親為，咁梗係要好好咁多謝佢喇，返香港請飲茶就走唔甩嘅喇。
仲有一定要多謝嘅係三羅(羅喣堂）幫本書畫公仔插圖。上次阿珊嗰本書「港女講食」，裏面嘅港女漫畫插圖，就係佢畫嘅。三羅幫得阿珊畫港女，點可以唔幫我畫呢個背囊友！點解咁講？1984年，我哋婚禮嘅邀請咭，係用詩經做主題，配咗三幅漫畫，全部出自三羅手筆。三十前畫咗一次，三十年後，再接再厲，夠晒歷史意義喇啩，多謝多謝。
我嘅第一次，點可以冇阿珊份。我每一篇寫完，第一個睇嘅就係佢，除咗指出錯誤，佢絕唔會執意改動我寫嘅嘢，話要保留我嘅風格喎。全本書有成六萬字，到咗最後校對，佢要短時間一口氣睇晒。錯別字、標點、分段，一一唔放過，絶對唔係容易。之後，佢去咗香港，仲要幫我喺本書上用毛筆題字。你哋而家明白，點解我會聽晒佢話，絕唔駁嘴喇。
噏咗咁大堆嘢，狐狸要露出尾巴咯：
大家揸定銀紙，幫趁買本書喇！
書展期間，只可以喺書展會場至買得到。資料如下：
書名： 五十後去哪兒
獨行，以色列、約旦。
作者： 嚤囉仔 (呢個係我一出世嘅名，比我嘅真名仲要早 )
定價： HK$ 88
書展會場八折。
澳洲暫定 A$ 12 （連郵費）
出版： 火石文化出版社
書展會場攤位：
至於袋鼠國嘅朋友，如蒙捧場，要買書者，請通知我，趁阿珊仲喺香港，佢可以打點郵寄事宜。至於安排食一餐，順便收錢派書傾吓偈，絕對唔難，到時再算。
最後，梗要多謝老闆羊咩博士，佢咁有眼光搵我出書。又知我窮光蛋一名，斗零都唔使我出，我唯有畀心機，大大聲叫多啲人買書，等佢唔使蝕咁多，慢吓手，有得賺就更佳喇。
各位：買⋯⋯多⋯⋯幾⋯⋯本⋯⋯書⋯⋯喇⋯⋯喂⋯⋯！
咦，聞說，如果呢本書好賣，有機會出古巴遊記⋯⋯尼泊爾遊記⋯⋯中南美洲遊記⋯⋯？
故事會發展成點，就睇你哋喇。
再噏過
嚤囉
Ps. 本書乜嘢樣，請上面書睇睇
https://www.facebook.com/media/set/?set=a.666593740084716.1073741919.100002022875470&type=1&l=61b3a10c72
No comments:
Post a Comment