2014.02.15 新年舞醒獅，噏起夏淑儀。鎖事記一椿，懶理人笑痴

2014.02.15 

新年舞醒獅，噏起夏淑儀。鎖事記一椿，懶理人笑痴。

噚日情人節，晨咁早同大小姐去機場。大小姐一早定兩張紙牌迎接阿媽：Welcome home；Happy Valentina's Day。阿珊喺禁區通道行出嚟，推住一大車嘢，兩個旅行喼，兩個紅白藍，一路行一路跌，非常論盡。離遠佢見到我哋，面上就露出好攰嘅樣，即係話：企喺度做乜，仲唔過嚟幫手！我哋即刻舉高紙牌。作見到紙牌，即刻四萬咁口，冧到痺。係咪呢，駛乜嘥錢買花買汽球，只要有心就得㗎喇。影番張接機相，隨即驅車返歸，不在話下。

留咗喺香港嗰兩個幾月，佢並唔係嘆世界，屋企有好多嘢要佢搞掂。日日凍鐵鐵喺條街四圍行，既要盡量避開北方強人，又要因住唔好惹到嗰啲 H 乜N 物，仲要吸收嗰啲北面吹落嚟，有形及無形嘅陰霾。除咗好開心可以見番啲老友，同埋見下屋企人外，留港，實在唔多戔。

佢返番雪梨，兩日後，又到我去遠遊。蔣氏一族，即刻吹雞，一齊食個晚飯。之後，要一個月，先至可以一齊喇。

新年期間，香港到處舞龍舞獅，慶賀新歲。曽師兄喺長洲應該揾唔少，安仔及其他師兄弟姊妹，有冇去長洲幫手敲下鼓邊呢，又？講起舞獅，香港一則新聞，戚起我條筋，令我又回憶起一段青蔥歲月嘅往事。

新聞話，夏國璋醫館醒獅團，聘用非法勞工舞獅。詳細新聞，你哋清楚過我，不贅。主角係已故夏國璋師傅嘅大仔夏德建。我唔識佢，但係我識佢家姐，夏淑儀。老咩頭，酸梅姐姐，仲記唔記得佢？

佢大過我三、四年啩，高高瘦瘦，好有氣質𠴱隻。一齊喺雅健前身，學生樂園口琴組。嗰時仲有 Vulture ( 貓sir)，死伙德，老妖怪。口琴組由老咩頭主理。老囉頭都好似間唔中 jam 下歌。

我做𡃁嗰陣，個個都係大哥哥大姐姐，多數出身名校。九樓多數出自雞記，呢種沉淪景象，應該由嚤囉仔開始。唉！

夏淑儀當然係阿姐級，佢讀何東，梗係老牌著名官校。老妖怪鍾意搞搞爛 gag，見到面都要問夏淑儀係唔係「好痛」，原來何東，英文叫 Ho - tung 。夏淑儀當然同佢駁嘴，tung 唔讀「痛」 ，讀作「吞」。鬥嘴性格，一啲都唔會認輸。

嗰時國術組啱啱組成，曾經有個綜合表演。除咗國術組自己嘅表演外，夏淑儀亦有表演北少林柔功門劍術套路。佢打起劍嚟，跳嚟跳去，好有女俠風範。嗰次表演，老妖怪亦有落場，乃父實係太極高手，並且設館授徒。好一個老妖怪，後生攸攸，慢吞吞打劍。當時年少無知，邊識柔中帶剛，綿裏藏針，呢啲武術至高境界。只知老妖怪，好似伯父咁慢吞吞打劍，失禮死人。反之，夏淑儀動若脫兔，好睇好多。因為咁樣，仲取笑咗老妖怪好一段時間𠻹。又咁講，嗰時你笑我，我笑你就係常態喇。我哋呢班友，咪笑到而家都係冇變，死性，有得改嘅咩！

舊時叫簡體字做「減筆字」。嗰時左傾，以識減筆字為傲。夏淑儀，我哋叫佢做夏淑叉。因為儀字，係人邊旁加個叉。睇嚟，佢唔係好鍾意我哋咁叫佢。

記憶中，會考之後，佢就再冇上嚟，口琴組亦解散。自此，再冇音訉。而家聽到佢細佬嘅新聞，就諗番起呢一段往事啫。

再噏過

嚤囉