2012.07.15
阿狼噏承諾，信佢淚一壳。
柯拿，大家好，
舖頭附近有間港式茶餐廳，都成日幫襯。飲嘅食嘅都唔錯，蔣家小姐最鍾意佢嘅凍檸茶同滑蛋牛河，而少爺就鍾意佢嘅椒鹽盲鰽，係晚飯之必點。無可否認，呢間嘢嘅食物好有香港水準。不過，我最鍾意作另類觀察，我發覺重有一樣嘢好似香港嘅，就係伙記嘅面口。你叫伙記，佢一定係拉長塊面，無喱笑容。佢哋伙記間互相調笑，就四萬咁嘅口，一有客人叫，喺千份一秒間，收起笑容，由咁 J 變成咁 L。我心諗，老闆點解會請呢啲伙記？點知一睇，原來老闆都係用咁嘅態度對客。明嘞，有咁嘅老闆就有咁嘅伙記。
香港領導層都係咁。阿狼講嘢，我辜且唔叫佢「大話連篇」，但一定好似清末壞鬼文膽，將說話扭嚟扭去，總之留咗好多窿窿罅罅，畀自己走盞。講起嚟，天花亂墜，聽完就一嚿雲，永遠冇一個肯定嘅答案，方便自己日後反口、走數。阿狼係咁，3屍14命，件件都喺咁。再睇下阿狼嘅老闆，即係阿爺，咪又係一樣！明嘞，有咁嘅老闆就有咁嘅伙記。
回帶記一記。十幾年前，阿爺、本地土產愛国愛港（and治港）人士、以及本地大孖沙，四四六六講好，繼煲呔之後，就係唐糖。如果唔喺有咁嘅安排，以唐糖咁嘅質素，你估佢可唔可以搭直通車，baba聲，先委任做局長，直上財政司，再直上政務司，然後等「被選」特首？！點知人算不如天算，原來有好多個阿爺，佢哋打緊擂台，未分勝負。阿狼昅實呢個寶座N年，如今重唔係大好良機。但係，要扭轉十幾年嘅部處，學大陸化語言 --- 總得有個說法！哈！人格謀殺！話你有女人，話你喺辦公室疏化唔正經，話你喺屋企掘窿。再稟告阿爺，然後自薦，阿狼根正苗紅，純淨過蒸溜水，乃最佳替代唐糖之物。…….. 結果？大家都知喇。
大班台聽到個烽烟 phone in話：住喺玻璃屋，唔好掟石頭！你用人格去謀殺人，人哋就用相同嘅尺嚟睇番你，同埋你嘅伙記，咁好公道啫。於是，阿狼間屋、局長打通相連屋、互租屋；六四、國民教育、李旺陽……一嚿一嚿石，兜口兜面掟埋嚟，點檔？中文老師，下次教成語「請君入甕」，你知道點舉例子喇！唔知國民教育有冇教毛主席語錄，毛主席都講過「搬起石頭打自己的腳」，唔知阿狼今次算唔算呢。
當有人話：佢都未做，畀個機會佢試吓先。我又會問，點解呢個機會要畀阿狼，而唔畀阿唐？街頭阿黄，街尾阿喪，佢哋都想試吓。咁，邊個有權去攞呢個機會呢？重有，邊個有權去畀出呢個機會？
所以，叫香港人畀機會阿狼，係一句廢話。今時今日，邊個至有權畀機會阿狼，唔駛我講喇啩。97阿董上台，02連任，05腳痛，煲呔接任，07連任，12阿狼上，邊一次，香港人有得say？
幾時，香港人真係有權去畀機會人？
我好悲觀，真係好難。當權者有乜動機會放棄自己嘅權力？權力亦代表利益，佢哋只會搏晒老命保護權力，放權？講笑咩！
争取民主，就係限制濫權。咁，阿爺及其伙記，點會增加民主成份，去削弱自己手上嘅權力咁笨呢，又。
毛主席又話，國家要獨立，民族要解放，人民要革命…，咁多怨氣，真係亂起嚟，我點揾銀？Mmmm……畀你間唔中集吓會，遊行吓，嗌吓口號，舒舒氣，然後和平散去，晚飯宵夜，卡拉OK，第二日照常返工。咁，郁唔到我嘅權力，冇壞吖。
掟蕉？掃台？….咁暴力！坐馬路？抬棺材？….阻人揾食！
唔好咁激，有嘢慢慢講，阿狼會話，「我向全港市民莊嚴承諾，我唔排除會喺合適時機考慮提議一套或多套適合當時社會環境嘅計劃，並責承適當嘅政策局喺一定時限滙集建設性嘅意見再寫成白紙草案以供廣泛討論，再委任著名學者社會名人及各不同持份者於短期內成立法案草議委員會，討論成熟後向立法會提交藍紙草案，立法會委任bla bla bla……！！」
咁嘅承諾，我都有得出賣。
雖然阿狼搞到我輸咗餐飯畀賴子，實在我唔介意邊個當選，只要係公公道道嘅選舉制度。可惜我睇唔到佢向住好嘅方向去。傳媒歸邊，收窄言論自由，洗腦國民教育….！
好灰。
再噏過，
嚤囉
No comments:
Post a Comment