2012.09.18 噏吓古仔先，咁又20年

2012.09.18 

噏吓古仔先，咁又20年

我哋叫呢架十二年老爺車 "小露寶"

柯拿，大家好

二十年前，1992年9月15日晚上，長頭髮嘅嚒囉，連同靚老婆（....當然，而家重靚），帶住6歲半嘅翀翀，9個月大嘅澄澄，出現係九龍城香港啟德機場，等候夜機飛去袋鼠國雪梨for good（for good，我鍾意呢個叫法）。多謝廖新偉，章蘊綸車我地去機場 。

行李唔多，但一定要hand carry 一個電飯煲，同埋奶樽煲。其他家當，早於幾周前已由貨櫃運走。回想起當日早上，要離開一手一腳建立起嘅屋企，心情當然唔多過癮，翀仔重係喊住咁離開.... 。

候機大堂，好友陸續到來送別，萬分感動，呢一幕一幕永誌於心，而且又有錄影，又有相；得閑時都會攞番出黎睇，到而家，每次番睇，個心仔都會恍一恍。

企係departure個牌，同屋企至親、好友揮手話別，正是：此地一為別，孤蓬萬里征。轉身走向海關，抹乾淚水，上機前，大把手續要做，重要照顧兩件細慨，點得閑傷感。

因為有個BB女澄澄，安排坐喺第一行，有個 capsule 掛咗喺牆，就係澄澄張床。好驚佢會成晚嘈，好彩佢好乖，一覺睡到天光。

順利落機，到達藍天白雲慨雪梨。李小姐已經喺機場等緊，而且一早幫我地訂咗motel落腳，冇左呢支盲公竹，做嘢會好論盡。此後，就係積極搞掂生活所需，李小姐心細如塵，陪我地租屋、搵小學、攞醫療咭、買車... 等，好多急需而又鎖碎嘅工作，一個禮拜，全部搞掂晒！再三多謝佢喇！

記得第二朝起身，同翀仔落街跑步，街頭跑到街尾，感受吓袋鼠國嘅早晨。此後，每年嘅9月15日，一家人都會嚟番呢度，緬懷一下。

對住藍天白雲，都要交租食飯。咁啱，九十年代，正係袋鼠國經濟最低迷嘅時候，雙位數失業率，好難搵工做。教體育？開玩笑喇！唔好講唔合符呢度嘅教師資格，你連rugby，cricket都唔識，教乜鬼？打開報紙，咁大個雪梨，只得兩版廣告，死未！我地由細到大，阿媽教落，讀多啲書，一定搵到食。把心一橫，用 mature student 身分，考入雪梨大學，讀職業治療師。好在袋鼠國福利好，讀書學費唔駛交住，聯邦政府重有津貼畀，真係人間天堂。

幾十歲人，再讀書，都係好大嘅挑戰。讀下讀下至知，完成四年大學，算你順利搵到份治療師工作，每周稅前得500蚊，重少過賣叉燒包，咁，唔夠皮噃！先至醒覺，呢度讀書vs收入，原來冇必然關係。雖然袋鼠國，書中絕無黃金屋，呢年半大學生崖，都無話嘥嘅，係識多咗嘢，又令我多咗認識袋鼠國醫療制度。

決定騎牛揾馬，一路返學，一路揾工。冇耐，一日飲茶，偶然睇到一份廣告，補鞋連鎖店請人，即管打個電話去問，佢叫我即刻見工。可能我真喺好醒目，見完即請，重話要第二日即刻返工。就係咁，亂打亂撞，呢一行，一做就做左18年。人生就係咁奇妙，20年前，你要我揀100份工，相信我都揀唔到呢行。我好尊敬呢份工作，有咗佢，自此以後，一家人安安安穩穩生活係藍天白雲下。無言感激！

至於阿仔，佢有我倆各一半基因，性格一定唔同人咁品。最初幾年，佢要付出好大努力至可以適應得到，阿珊當然亦花左好大精力去幫佢。20年跌跌撞撞、有喜有悲、有驚心有安慰；激利你傷心標眼淚有之，逗到你開心標眼淚又有。總之，好似打瀉五味架，乜味都齊。而家，都叫做順利畢業，有自己嘅事業，有自己嘅家庭。當然，前面重有好長嘅路要行，佢係進取嘅人，我對佢好有信心。最緊要係開開心心咁生活。

大小姐嚟袋鼠國時只得9個月大，係完全冇香港生活過嘅絲毫記憶，性格十分鬼妹仔。大小姐合群、愛憎分明，敢於出聲，似足阿媽。佢又唔喺硬繃繃，見勢色唔對，又會縮番條槓，絕唔會硬踫硬，十分醒目。佢又識氹人，經常氹到你鬼咁開心。唔好睇佢細細粒，佢做嘢都好夠膽色。今年大學三年級，讀多兩年，又話畢業。

要感恩，一對仔女，都算喺咁嘞。一入大學就揾兼職，除咗大筆駛費外，一般日常支出，都可以自給自足。原來仔女到咗大學，一般袋鼠家庭，都要求仔女自己養自己，咁係澳洲傳统。

阿珊雖然冇做全職工作，但係，佢重忙過我。仔女重係細時，管接管送，屋企鎖碎嘢，多到唔恨，佢又鍾意整齊，咁梗喺忙到飛起。

最犀利重喺佢嘅膽色，話說移民前，佢喺沙田駕駛學校上咗幾十個鐘，考牌時，話畀考牌官聽佢要移民，經過考驗，個官畀個pass佢。移民後，毫無路面經驗，佢每日喺返工返學繁忙時候，揸住架冇風油軚嘅老爺車，載住一對仔女往返屋企學校，來回四次，成百公里。老爺車間唔中又死吓火，就咁塞咗喺條馬路，又要顧仔女安全，又要叫road service，一個女人要獨自搞掂哂啲麻煩嘢，唔喺個個得嘅！

個仔初返學時，英文又唔識講，實在有好大適應困難，有幾個月，阿珊要孭住個一歲嘅女，同埋阿仔一齊入課室上堂。可知身心嘅壓力都好大，意志薄弱啲都真喺搞唔掂。回頭睇番，原來移民頭兩年最難捱。20年後，而家可以咁講，嗰兩年，真係一生人最艱難嘅兩年。隨住工作穩定後，仔女亦融入社會，社交圈子亦逐漸擴大，生活就愈嚟愈自在喇。

20年，時間唔短，係人生嘅三分一、四分一，我倆有幸，可以令仔女喺一個有相對高嘅人權、自由、法治嘅國度生長。每次都令我諗起，我又要多謝我阿爺，佢着草嚟咗香港，令我逃過幾十年神州浩劫……。

重有跟住嘅30年40年……，到時……

再噏過

嚤囉