2013.12.25 聖誕快樂

2013.12.25 

聖誕快樂

柯拿，大家好，

噚日，聖誕前一日，一早返鋪頭，見到隔籬魚店大排長龍。咁嘅場面，我已經見咗20年。聖誕節，耶教徒唔食紅肉，所以就買海鮮。每年今日，全澳所有商場，魚店就係焦點。再唔講 down town 嘅雪梨最大魚市埸，個個揸車去買海鮮，架架車排隊入停車場。由凌晨開始，附近道路已經打晒蛇餅，交通亂晒大龍。通街企滿肥嘟嘟嘅袋鼠差佬，差婆，三十幾、四十度，列日當空，企喺條街，手忙腳亂指揮交通。都好嘅，趁機減下肥，亦唔係乜嘢壞事。魚巿埸買海鮮盛況，就一定係當日報紙主題，就好似香港農曆年尾，趁墟行花市一樣。

買個麥記早餐， iPad 打開電郵，嘩，火花四射。

我而家表態。我開心都嚟唔切喇，我真係一個受寵嘅人，一定要掂住木頭，再要感恩一番。

阿珊最錫我，佢知道我要用幾多時間去完成一篇嘢，有時半夜三更仲寫緊，成日話：「喂，仲寫，聽日仲要返工㗎」。佢緊張我寫嘅嘢，就係愛錫我嘅表現。畀人錫到燶，梗係開心喇。

井少係識咗四十年嘅朋友，將兩個放大鏡掛喺面上，已經係夠晒詼諧。講嘢冇句好說話就梗嘅喇，不過，我哋成班友，由細到大，個個都係咁嘅喇。井少話吊癮，絶對係抬舉緊我。我哋呢班衰友，就算讃人，都要兜個大匝，硬係講唔出個「好」字。就好似多數人對老婆，硬係講唔出「我愛你」呢句神奇咒語。不過，而家井少，大庭廣眾，兜口兜面話：「文章写得越来越好，就系产量太少。甘得闲快D写多几篇来顶瘾」。我，夫復何求，呢又。

人大咗，面皮愈嚟愈薄，大家喺江湖混咗幾十年，都好識做，逐漸將菱角銼圓，免傷和氣，都係人之常情。我喺袋鼠國二十年，呢度民風純僕，多數都好有禮貎，但唔係虛偽嗰隻，人人到好真性情。唔只我倆，喺呢度大嘅一對仔女都係咁，一就一、二就二，好鬼老實。老實還老實，梗有啲嘢，講明唔話你知，亦毋須用大話隱瞞，你明知係秘密，亦會尊重佢哋。有幸走咗嚟南半球，簡單真性情得以保留。

我係大唔透嘅人，最鍾意大顛大廢。每次返香港，約番少年時好友，喪噏一輪，重尋故夢，真係好開心。但係最近，有個好強烈嘅感覺，我感覺香港港愈嚟愈陌生。呢處生我養我育我之地，居然同我喺情感上，愈行愈遠。如果唔係有呢班兒時好友，仲可以一齊大顛大廢，我諗唔到我有返香港嘅理由。

又𣛟咗出大海，返番嚟。

點解我要寫嘢？阿爸阿媽升咗天之後，我忽然覺得我對佢哋嘅歷史，對佢哋嘅人生，所知有限。人喺度嘅時候，我冇去問，到走咗嘞，就算問親戚，都隔咗一重山咁遠喇。我悔之，但已恨晚，我即刻咁諗，我家公子、千金，而家對我啲歷史，有鬼興趣咩，雖然我哋都好傾得埋，但都係有一句冇一句，又唔知上唔上心。到有一日，我騎鶴西去之時（年尾流流、大吉大利，百無禁忌），佢可能又好似我咁，想知佢老豆多一啲呢。我唔會令佢後悔，歷史不應重演。嗱，乖仔乖女，你唔駛問，我寫埋畀你。大小姐唔識睇中文？唔緊要，叫阿哥讀又得，阿嫂譯又得⋯得咗。

橫掂都寫，我諗，如果咁好彩（或不幸），老到老人痴呆都未去得。入咗老人院又唔定，連自己係邊個都唔記得。日日喺度hea，都好無聊啫。就算有人，仔女又好、社工又好，本住個好心嚟陪你，邊得嚟咁多嘢同你講噃。如果你有自傳、遊記、隨口噏記錄等等。咁，好嘞。有心人只要照讀就搞掂。呢個就係我要用廣東話寫嘢嘅原因嘞。因為用廣東話寫，神髓亦可以最大限度保存落嚟。

我個人，又冇乜秘密，橫掂寫開，掟上網同老友分享，有何不可。話唔埋，我記錯咗、遺漏咗，有老友講番畀我知。又可以藉此繼續聯絡，多啲了解老友動向。總之好處多。

唔怕爆響口，我發覺我可能好自戀。我成日攞番自己啲文章，翻睇又翻睇，哈，毎次睇都覺得自己寫得好好。樂此不疲，可能係病態喎。不過，話之佢係咪病，總之我開心就得嘞。

既然我自己已經高度評價，如果啲老友睇完，再撩多幾隻字，我聽到回應，咁就梗係錦上添花喇。不過，正如聘霞所講：分享需要很大的勇氣, 用心, 用力, 用時間.....。仲有，我認為，需要一張好厚嘅面皮。所以我話，我冇失望，因為我從來冇奢求過。

話雖如此，偶然嘅一句回應，絕對係枯燥生活上嘅一帖清涼劑。

賴子同我都鍾意唱歌，幾時再合唱一曲。文章尾嘅歌，全部唔係一早諗定，而係寫寫下，支歌就喺個腦閃出。我覺得完晒個故事，歌詞嘅意義就彈晒出嚟。anyway, 有回應，就chi chat 多兩句喇。

本來呢篇嘢諗住噚日出。點知喺舖頭寫到一半，忽然鬼咁忙，寫唔晒。下半部份，今日，聖誕日，喺雪梨北面520公里，一個海灘城巿，嘅一間YHA旅舍內，繼續完成。

老老士土都要講：祝大家

聖誕快樂，　

再噏過

嚤囉

寫於 Coffs Harbour