2014.06.08
財散人安樂，換個幕，踱一踱，焉知冇收穫？
租個附近車房繼續開工
柯拿，大家好，
六月份，袋鼠國踏入冬季。前排落咗幾陣小雨，果真一雨成冬，天氣亦凍起嚟。加上日短夜漸長，一早一晚都幾寒㗎。講過好多次，我鍾意雪梨嘅夏天，冬天就麻麻嘞。每個冷天，梗要有一兩 個禮拜傷風，又咳又唔瞓得，好彩，touch wood，次次食過一個療程抗生素就冇事。前排又係咁樣，連
gym 都去唔到，托頼，而家冇事喇。
最近嘅大事，就梗梗係搬鋪喇。到而家，所有嘢，可以講約略大定。都應該坐低，回望過去一個月所發生嘅事。
當然最重要，就係趁住仲喺鋪頭呢個月，盡量通知最多客人。首先寫篇短文，交代一下閂鋪嘅事，當然多謝呢個、多謝嗰個，就係指定動作喇。而呢篇文，亦貼咗上新開嘅面書戶口上 ( Kin's Cobblers Carlingford）。估唔到，呢篇文得到唔錯嘅反應。有啲客專誠嚟同我講，話篇文寫得好。哈，真係令我鬆毛鬆翼。最重要係文末有電話號碼及面書戶口名稱，咁樣，啲客就可以隨時聯絡我。
其實，企喺條街收貨係唔係行得通，我都十五十六。不過乜都試下咁話喇。
一日，經過商場後街，見有間屋，門口有放租木牌。咦！呢度距離商場只有約十間屋距離，係唔係可以租嚟開工呢？即刻聯絡地產佬。結果？當日就落訂。呢間屋第一日放租，就畀我租咗。如果我有宗教信仰，我一定會話：冥冥中，果真有主宰，唔係，邊得嚟咁啱線。
商場租約傾唔埋欄，最重要梗係租金喇。我哋當時係要佢減租，我至肯租。原因係，過去兩三年嚟，呢個商場已經走下坡。約兩年之前，我哋向商場提出減租，反覆傾咗冇幾耐，佢答應減租。既然目的已達，我亦唔去深究點解地產奸商咁順攤。後來傳出商場賣盤消息，大家就恍然大悟。佢要 keep 住所有租戶，放賣嘅時候，盤數就好好睇睇喇。
商場半年前易手。消息話，新業主係個 Mainland Chinese。最近幾年。大量大陸資金湧入澳洲，已經唔係新聞，我哋隔籬有個區，同獨行俠同名嘅，叫做
Eastwood。好早，已經畀嚟自大陸嘅華人攻陷，嚇到啲鬼佬紛紛搬走，名副其實係 ⋯⋯ 走鬼。而家去嗰度，你冇乜機會講英文。去買魚、買肉，講國語比較方便。不過多數店鋪，廣東話都係
ok 嘅，因為唔少係由廣東地區嚟嘅。嗰度最大嘅商場，已經畀大陸資金買咗。
又有消息話，新業主買咗我做嘢嘅商場，目的係要拆毀佢，再建巨型綜合建築，樓下幾層係商場，上面高樓住人。佢買咗就可以申請改地契，佢哋咁有米，聯絡一下市政府嘅議員，改地契，對佢哋嚟講，可能唔係難事。既然盡快拆，當然毋需顧及商場服務平衡、前境等因素。好簡單，邊個畀得起租，邊個就可以入嚟。商業社會，點會怨乜嘢人！
我好阿Q，我應該感恩。附近區域人口組合嘅大變，呢個商場，有啲鋪頭已經頂唔順，但係又畀租約鎖住，走唔甩，個個月蝕錢。邊得嚟咁多錢蝕？而家，我可以全身而退，算係咁喇。
唔係話走，就可以拍拍羅柚走人。要將舖頭回復原狀至走得，即係話要拆晒所有嘢，交返個空殼畀商場。講到尾，即係話要錢喇。咁樣搬一搬，萬幾兩萬袋鼠幣，又化為烏有。唉！咁又冇咗三次旅行嘅盤川！財散人安樂，花得起嘅錢，由它去罷！
新鋪一邊執嘢，一邊開工，都做咗個幾禮拜。有人專誠嚟支持，又有電話查詢，又試過送貨上門，反應都好正面。留返一個最大最大嘅問題：客量夠唔夠大呢？
好彩新鋪距離商場不遠，行三、五分鐘就到，不過始終冇商場咁方便。所有成功、失敗因素已經計算在內。唔試過，又點知得唔得。條路就擺喺前面，邊行邊諗邊打算喇。
行到今日，整單咁嘢我。係咪造物畀個機會我，等我做下少啲，做下少啲，逐步過渡，換過另一個方式生活呢，咁話？
再噏過
嚤囉
No comments:
Post a Comment