2011.11.27 白茵飾演巴士銀，我噏特首唐家揾

2011.11.27

白茵飾演巴士銀，我噏特首唐家揾

柯拿，大家好，

今日，好眼瞓，噚晚夜瞓，今朝五點幾起身，因為要送機。呢幾年，蔣家驛馬星動，頻頻外出。蔣家大小姐夏澄星期五考完晒試，今日即刻起程去美國。佢先由雪梨直飛洛杉磯，會停LA兩日，再會合朋友飛Atlanta，住喺喬治亞州佢朋友屋企，過埋聖誕及新年至返屋企。

櫃台check in後，去到閘口，影張標準送機相。當然會擔心，但亦開心有機會擴闊視野，心情矛盾。

請上面書睇相。

上周，提及尹芳玲嘅薔薇之戀，冇耐商台晴朗居然又播，唔係尹芳玲版本，而係林憶蓮。先至知原來Sandy都有唱。一聽，都係鍾意尹芳玲唱。

羅賓覆我，提起巴士銀，講起巴士銀，我只記得白茵，係長鳳新出品，我喺南洋戲院睇。即刻谷哥一吓，原來巴士銀主題曲係尹芳玲所唱。網上有人話，巴士銀本來係商台廣播劇，後來搬上銀幕。我對呢個說法有懷疑。各位又點睇？下次有機會再見皇后，我會問佢兩個問題。

其一：巴士銀之謎？

其二：18摟C座是否林彬屋企？

講起銀色新聞（或舊聞），總係比社會議題容易為人接受。調劑一吓枯橾乏味、講嚟講去三幅被嘅特首跑馬仔新聞。都係美事。

咁啱得咁繑，寫緊呢篇嘢時，電視即時新聞，正在播放振英哥宣佈正式入閘跑馬嘅消息。首先，我唔會相信呢個係Election，絕對係Selection。睇嚟，撑唐唐嘅人腳威猛好多，我睇高佢一綫，佢會「被選舉」。咦，啱啱又睇到有記者問唐唐，話有人話唐唐係豬，好蠢。唐唐話﹕「我屬龍，多謝！」OK喎，有戙篤笑felt喎。

咁啦，不如開個盤，各位認為邊位英哥會跑得出？並講出乜嘢原因啊爺會揀佢。

再噏過，

嚤囉