2013.01.14
饅頭新年噏進步，荊棘滿途民主路
柯拿，大家好，
小號所有幫手全部放假，只得我一條友，好在工作性質唔駛擔擔抬抬，就算每周工作七天，對體力要求都唔大，我咁fit，遊刃有餘。
李饅頭喺"非時卜"，祝我新年進步，我梗多謝佢咁有我心，下次返香港請飲茶就走唔甩喇。我嘅回應係，年紀都唔細咯，進乜鬼步吖，求其開開心心，學阿Sam話，最緊要好玩就得嘞!
講開年紀，都唔知関唔関呢個人嘅事，自從咩博登六之後，搞到細過佢好多嘅人，都逐漸貼近個六字，諗落都覺得恐怖。
我除咗刷牙剃鬚外，好少睇鏡。每次照鏡，都覺得鏡中反映同心中自覺嘅形象有好大落差，實在令人洩氣。我唔可以阻止頭髮數量水平降低，以及色澤變淺。好彩對阻止腹中塊肥肉過份猖狂増長，我都係有啲辦法嘅。after all，而家乜嘢世界，六張嘢，點算老!自我安慰，又開心啲!
袋鼠國同學會有個friend,都大過我幾年嘅，重成日著住短裙仔。我呢個人，最鍾意賣口乖，我話，你成日都咁青春。估唔到佢嘅回應係咁過癮，佢話，「呢啲唔係叫青春，係叫垂死掙扎」!我當然表面O晒嘴，其實內心就讚同到不得了。
講到進步，又令我諗起，我土生土長嘅香港。民主進程，睇唔到寸進，司徒華後尾嗰幾年講過，民主冇進步，都盡量唔好畀佢退步。咁即係話，防止退步已經好巴閉，民主向前行?好難嘞!你睇議會嘅組成，仼你點睇，都睇唔到阿爺會放手畀你哋，只會愈揸愈緊。傳統民主黨派亦已褪色，激烈抗爭派又唔係人人頂得順，民主路，就好似每年嘅遊行，咪就係得個「行」字咯!咁直情就係垂死掙扎喇。不過咁，掙扎都好過瞓低任人劏。
上個禮拜，成個袋鼠國都熱到飛起。報紙有幅漫畫，上帝坐喺焗爐邊，有人問佢，"what are you cooking ? " 上帝話," Australia
唔止袋鼠遍地火頭，香港都火頭處處。
劏房、在職貧窮、貧富懸殊、地溝油、中港矛盾、身分認同••••，總之問題多多，睇唔到幾時可以解決，好灰。我唔住喺香港，都好感覺到嗰種熱力。
我哋成日嘲笑郭沫若，話佢係文醜。我而家有啲同情佢。
記得我哋喺九樓圍喺風扇底，講到粵語長片成日有啲咁嘅情節，抗日英雄畀日本仔捉咗，日本仔攞住火鉗問佢招唔招，••••等等。如果有一日，我哋係間諜，又畀人捉咗，問你招唔招，我哋全部都話，梗係第一時間招哂喇!（二、三羅，安仔••••，我有冇記錯?）雖然係半講笑，都有半真。大佬，邊個鍾意受酷刑，黐線咩!我哋講笑啫，但係，郭老先生就真係身處偉大領袖身邊，佢睇住幾多人因為逆偉大領袖之意而得到悲慘下埸，佢冇乜得揀，為咗保命，當然又順便榮華富貴，就寫出「窗外一個紅太陽，窗內一個紅太陽」嘅詩，嚟歌頌偉大領袖。又睇下，而家一啲讀咗好多書嘅知識分子，有大學校長，大學教授、醫生、律師，西瓜靠大邊，講嘅都係阿爺啱聽嘅嘢。郭老就話冇得揀啫，呢班友絕對有得揀，又冇人攞住火鉗對住佢。
中學讀過孟子離婁篇：「責難于君謂之恭，陳善閉邪謂之敬，吾君不能謂之賊」。呢班識字分子要溫下書啦。
再噏過
嚤囉
No comments:
Post a Comment