2013.01.24。 任噏任掟機任挑，豺狼陰陰笑，心仔卜卜跳

2013.01.24。

任噏任掟機任挑，豺狼陰陰笑，心仔卜卜跳。

天威真係難測，上個星期初已預測禮拜尾會有高溫，星期五早上，天文台已經嗌嘈晒叫啲人小心，溫度可能會去到三十幾四十度。到下午我出街食晏，一出商場，就感覺到熱浪，吹埋嚟嘅風，嘩!熱辣辣，就好似喺廚房焗緊嘢，打開焗爐門嘅感覺。到三點鐘，雪梨天文台錄得46度，夜晚睇新聞至知，呢個係雪梨天文台150年有紀錄以來最熱嘅一日，我有幸肆身其中，實在與有榮焉。跟住，四圍山火，啲 Bush Fire Brigade 同埋志願 fire fighters四圉騰去救火，已經係指定動作。

好多時喺電視新聞見到消防員救火，又直升機掟水彈，又拉喉噴水。其實，除非火埸接近民居或重要建築物，先會盡力去撲火，以拯救人命及減少財物損失。更多嘅時候，如果山火現埸遠離民居，消防員唔係救火，而係放火。係有系統咁放火，目的要燒出一片空地，等山火燒到空地，因為冇晒燃料可燒，就自然熄滅喇。

所以喺山林中，一早就開辟咗長長，縱橫交錯嘅隔火道，fire trails ，將一大片嘅山林分成一個一個方塊，一方面阻隔火路，一方面畀消防車可以到達，而呢啲隔火道往往就成為行山者嘅行山路徑。鄉郊消防員 bush fire fighters 平日嘅工作，好大部份，就係保持隔火道𣈱通，其中一個工作就係放火!即所謂 back burning。將生到亂哂籠嘅植物、枯死咗嘅植物燒咗去。當然喺較潮濕季節進行。好多時山林大火係有人蓄意放火造成。有啲縦火者居然係志願消防隊員!當你知道 back burning 係消防員嘅工作，咁就唔難理解，有縱火者鐘意做消防員嘞。

所以再講人定勝天，就真係冇腦，個地球溫度係咁意升高十零廿度，就搞到我哋雞毛鴨血，萬物之靈?好鬼脆弱啫!不過咁，人類嘅滅亡，並唔等於世界末日，烏蠅、曱甴、老鼠等會繼續生存，地球一樣圍住太陽繼續轉。

唔好講到世界末日咁遠，我冇咁長命等到嗰日。噚晩電視睇到奧巴馬宣誓連仼，跟住演講。佢講到人權、平等、自由係天賦嘅，每個人都應該享有，但呢啲嘢唔會自然出現，係靠人自己去爭取嘅。咦，呢番話乜熟口熟面?各位睇番我舊年最後一篇文，我咪係咁講囉，乜執我口水尾。我同佢咁夾嘴形，當然係與有榮焉喇。

個幾月冇見阿珊面，每日打電話就梗嘅喇，最近重每晩喺電台節目聽到佢把聲。睇個樣口碑都唔錯，各位又有冇聽呢個節目呢?

科技進步，多得高琨，經電腦，每曰都聽到即時嘅電台節目，睇到即日嘅報紙、電視節目，真個是天涯若比鄰。記得初到袋鼠國，要出 城（雪梨 down town），喺唐人街啲書局，至可以買到兩日前嘅報紙。港幣兩、三蚊嘅報紙，呢度要畀5蚊袋鼠幣，又係嘅，搭飛機嚟噃，梗係矜貴啲。

呢排電台、電視、報紙講嘅，就係阿狼嘅施政報告，咁多人講過報告內容，我都費事喺呢度鸚鵡學舌，乜都畀人講過晒喇。人民力量毓民同長毛，喺施政報告攪嘢就梗嘅嘞，由day 1開始，佢哋開宗明義，講到明入去議會，就係要用抗爭手段，嚟突顯制度嘅不公平，從無掩飾過。煲呔曾畀呢班激進友搗蛋之後，會黑口黑面。而阿狼喺呢個情形下，居然面帶笑容，就好似講，吹咩!你奈得我何?掟嘢?大聲鬧我? too simple, sometimes naive 喇。阿狼佢呢種笑容，令我心寒。

份報告有幾多料，現晒形喇。有團體話要遊行抗議。我講咗好耐，嘉年華會式嘅遊行，根本就係民主花瓶，我超級懷疑佢嘅效果。面對強大嘅政府機器，普通人無權無勇，又要返工返學，顧住揾食，供樓畀租，養妻（夫)活兒，鬼得閑咩?有時間都休息透下氣喇。無奈呢個政府逼到人要走上街表示訴求，咁已經好慘嘞!更衰嘅係，行咗咁多年，唔係得個吉，而係愈行愈遠，吉都冇個。不過，唔行又可以點?令我記起周星馳功夫裏面一幕，話說周星馳畀火雲邪神打到變柿餅，佢居然揸住枝幼幼嘅樹枝仔，輕輕打咗火雲邪神一下。即係話，雖然強強弱懸殊，都要話你知，我好唔服氣。後來周星馳畀元秋、元華，呢對神雕倈侶救番，唔死得，重練成如來神掌，打敗火雲邪神。香港民主路有冇咁好嘅結局，就靠香港人自己嘞。

港大法律學院戴耀廷同我睇法相近（哈，叨下光先)，都認為齋遊行，之後和平散水係冇用嘅。前幾日喺信報登咗篇文，建議社運人士可以考慮做激啲，例如佔領中環。呢番話如果出自毓民、長毛口中，就一啲都唔出奇。而家連謙謙君子，港大法律學院教授䵧耀廷都咁講，學劉紹佳話齋，唔通香港真係到咗臨界點?

都係嗰句，我同奧巴馬都咁講，自由、民主、人權係雖然天賦嘅，但係都要由人自己去爭取至有嘅。

再噏過

嚤囉