21011.10.30 早餐噏家常，煎蛋通粉熱鴛鴦

21011.10.30 

早餐噏家常，煎蛋通粉熱鴛鴦

柯拿，大家好，

城中熱話，梗係小悅悅…。

噚晚，娥姐請食飯。我倆當然唔會錯過。花旗蔘雞湯、銀魚蒸豬肉、瑶柱蒸水蛋、清炒深海魚球、上湯浸鮮摘郊外小唐菜，泰國宮庭絲苗白飯，大和啤酒任飲就不在話下。所謂「飲飽食醉，不忘吹水」，由袋鼠民生，講到大唐。講吓講吓，又提起小悅悅…。

今早，蔣家大小姐非常賞面，陪兩件嘢去食早餐。大小姐一向貴人事忙，一個禮拜冇幾何見到幾多次面。所以大家都珍惜可以一齊坐低嘅時間。問吓佢，學校生活點樣？學生會搞成點？btw佢係學生會幹事。PT工作開唔開心？，補習學生聽唔聽話？唱歌堂上成點？年尾嘅旅遊計劃，進行成點？教會？朋友？…？講吓講吓，又提起小悅悅…。

佢話，佢哋朋友間傳閱一輯Utube短片。唐山，有兩隻狗行行吓街，一隻比車車死咗，另一隻唔肯離開，不斷悲鳴，重叼食物同水比死去嘅同伴，教人動容。畫面跟住就播放小悅悅呢單嘢，情景係點，大家應該睇咗好多坎，毋用再多講。用意好明顯，就係話嗰啲行過小悅悅身邊而見死不救嘅人，就係禽獸不如！

好多人引用孟子四端章，「今人乍見孺子將入於井，皆有怵惕測忍之心…」，話測忍之心，人皆有之，係天生嘅。呢18條友仔，見死不救，就係泯滅人性！

我又有啲唔係咁諗噃，呢18銅人當然唔係可取，但係，喺一個經常懲罰好人嘅地方，啲人見慣晒見義勇為嘅人，比人話尋釁滋事，搞到到一身蟻。避免自己身陷險境，係人之常情嘅舉動，怪只怪嗰啲造成呢個社會環境嘅人。

可能有啲人仍然會講：「如果我在現場，我就會……」。我唔敢質疑佢會點做，我只問一句，如果你個乖乖去神州，佢請教身為人父、人母嘅你，你會點教佢，救？唔救？

唔駛答我，在心中得嘞。

華東水災，四川地震，呢啲「天災」，人人伸出援手。個個讚，話係善舉、有同情心，福有攸歸，總之大好人。但係，被貪官欺壓、收地、強拆、豆腐渣…，呢啲「人禍」，邊個睇唔過眼，做架樑，呢啲「多事」嘅人後果會係點？

唔駛答我，新聞經常有報導喇。

喺神州大地，避險自保，唔敢出聲，人之常情，絕對理解。

喺自由之地，如楓葉國、袋鼠地、東方之珠，呢啲任發噏風，毫無危險嘅地方。見到不平事，仍閂埋個口，不發一言，……唉……，唔識講。

辛亥百年，孫大炮喺香港啟迪革滿清老命嘅思想。百年來，因為香港嘅特殊地位，比滿清追趕嘅國民黨份子，比國民黨追趕嘅共產黨份子，比共產黨追趕嘅反共份子，都喺米字旗疵蔭下，執番命仔。神洲大地每個改變階段，都有洋紫荊嘅影子。今日，當洋紫荊變身成金紫荊，當龍獅變身成白紫荊。東方呢粒明珠，會唔會比人壓碎，變身成珍珠末，淨係識幫啊爺啊嫲開水定驚、塗脂抹粉？

命運會唔會係咁？你話過我知。

再噏過，

嚤囉