2014.03.19 厄瓜多爾，秘魯兩國之行

2014.03.19 

厄瓜多爾，秘魯兩國之行

印加歷史之行 -- 馬丘比丘

柯拿，

大家好，

人係貪心嘅動物，好多嘢都嫌唔夠，旅行係其一，我嘅秋季大旅行，又告一段落。而家坐喺飛機上，諗番起呢個月，去過嘅地方，遇到嘅人同事，真係好似發咗場夢。唔係咩？人生，本來就係一場夢。即刻將呢個境幻記低先。

因為所揀旅行嘅日子，北半球仍然凍，所以就揀南半球。我喺出發前已經寫咗一篇嘢，略略提及行程。而家睇番轉頭，同預期相去不遠。

由雪梨去南美洲好花時間，第一站由雪梨去厄瓜多爾首都基多市，已經要三十幾個鐘，中途仲要轉嚟轉去。到咗基多，又發現唔見咗行李，好在第二晚，機場就送番行李畀我，又好在我預早咗嚟，如果即刻要去加拉巴哥斯島，就真係唔知點算嘞。

睇好多旅遊資料，都話，嚟呢兩個國家要非常小心。畀個印象我，好似四圍都係賊，又有城市游擊隊、恐怖分子，隨時擄人勒索咁。我出外絶對打醒十二個精神，安全上。

厄瓜多爾，只喺地理堂聽過，知道同赤道有關。舊時串法係 Equador，而家係 Ecuador ，此外，就一無所知喇。連首都 Quito 基多巿呢個名，都係訂機票時至第一次見。好早識得加拉巴哥斯島，但從來唔知佢係屬於厄瓜多爾。第一晚喺基多瞓覺，甚至唔夠被，凍到震。第一個印象，點解赤道咁涷。原來基多係高地，海拔二千八百公尺，同海岸完全唔同。

第一日，自己行咗一個匝，對基多市有好好嘅印象。壞人度度都有，呢度唔會係特別多，的士大佬會叫你推高玻璃窗，因為有人伸手入嚟搶亦唔奇。大城市，小心啲永遠著數。此外，市容整潔，多數人有禮貌、守規矩。呢度旅遊區，其實係一個幾安全，舒服嘅地方。

後來遇到導遊 Pedro，佢話呢個狀況只係始於約十年八年前，之前政府貪污，毫無作　為，人民唔可以分享經濟成果，治安唔好就係結果。據佢講現屆民選政府大有作為，反貪污，大搞基建，深得民心咁講。我都希望佢國家進步，我哋又多笪地方好去。

估唔到喺赤道可以上到五千公尺火山冰川，又可以喺火山山坡踩單車，全部都係全新經驗。

嚟南美洲，點可以唔見一見呢隻嘢。因為抗議網絡管制，而走紅神州大地嘅神獸草泥馬，呢度到處可見。呢隻畀人改咗名嘅動物，實在係 Llama 或者 Alpaca，佢哋係兩種唔同嘅動物。不過又可以交配生咗另一隻動物。關係就好似馬，驢、騾咁上下。兩隻動物外型十分相似。主要分別在於面型，Llama 吻部比較突出，而 Alpaca 則較短及圓。兩種動物嘅毛都可以紡織，但以 Alpaca 毛較柔軟。兩者都可作食用，仍以 Alpaca 嘅肉較可口。

今次主菜中嘅主菜，就係加拉巴哥斯群島。呢堆群島，由海底不斷噴發嘅溶岩所形成，分分秒秒仍然在不斷變化當中。群島距離南美大陸1000公里，加上信風、泠暖海流滙合，造成獨特生態環境：有赤道嘅企鵝；有好似飛彈，由空中插入海中捉魚嘅飛鳥，藍腳板boobies。有世上獨一無二會潛水嘅海蜥蜴 marine iguana ；有可以活到百幾二百歲嘅巨型陸上龜；有唔鍾意食人嘅鯊魚；有完全唔怕人，企喺我隻腳揾食嘅 hummingbird；有種意同人一齊游水嘅海獅⋯⋯ 等等。再唔講嗰啲不知名嘅大魚中魚細魚，都有機會好近距離咁見識過。

當然最點晴嘅就係，搭大飛出去外島外嘅外島 Kicker Rock 徒手潛水。我係完全冇心理準備係咁嘅，第一，我估唔到啲水咁凍，我冇租 wet  suit，以為短袖 rash suit 都得，好彩都捱得過。第二，當潛水導遊話會見到鯊魚，我以為佢講笑。點知游咗冇一陣，就見到大黑影喺我十幾米處游弋，米幾長嘅鯊魚！一條，一條，又一條。都驚驚地㗎。好彩，佢哋同我，始終隔住一群又一群各種大小嘅魚。據說，鯊魚腸胃最啱係食魚，對人類，佢哋完全冇興趣咁話。

我講咗個笑話，全部團友都笑到碌地。呢啲鯊魚雖然最啱食魚，但係如果忽然有條想試下唐餐 Chinese Food，我咪好危險。咁講唔知有冇種族成分 Racism 呢？

最震撼一次係十幾米海底處，有幾條鯊魚，再上啲，有一群約十隻魔鬼魚  eagle ray 慢慢飄過，然後周圍就係魚，各有各游，互不侵犯。三三兩兩嘅巨型海龜，有時喺海底有時喺海面。百厭嘅海獅就喺你身邊一閃而過，再回頭望下你。好似話，乜嚟㗎，游得咁慢。海面幾吋深嘅一層，佈滿唔夠一吋長，閃耀住陽光反射嘅魚仔，藍色、綠色、銀色，靚到不得了。佢哋就喺你眼前游嚟游去⋯⋯⋯⋯！咁嘅親身經歷，一生難忘。

人生點可以無憾。旅行前，大小姐話送個可以潛水嘅攝錄機畀我，我冇聽佢話。今次真後悔，咁壯觀嘅場景，居然冇記錄低，可惜，真係有啲遺憾。

成日有人問，我去過嘅地方，邊度最靚。我永遠都係咁講：各有各不同，冇得比較。不過就算點靚都好，人生苦短，世界咁大，我點都唔會去第二次。不過今次，就係加拉巴哥斯群島，令我有重訪嘅念頭。⋯⋯ 睇下點。

加拉巴哥斯島，個名就係由巨型陸龜而來。而呢啲陸龜，亦係啓發達爾文生物演化論嘅由來。探訪巨龜保育中心、參觀孤獨約翰 Lonesome George 嘅最後居所。就係規定嘅節目喇。啲龜喺島上行嚟行去，我哋唔好話去掂下佢，摸佢個頭梗係唔得，就算睇，就算影相，都要離開三米咁遠，慌死會嚇親佢哋。

Hummingbird ，係達爾文重點提及嘅另一種動物。後來我行印加古道，都有好多 hummingbirds，但係佢哋好怕人，離遠就飛走晒。島上嘅又真係好唔同，每日我哋早餐，佢哋就飛嚟餐枱，啄食枱上嘅麪麭碎，完全當你冇到。好明顯，島上嘅動物已習慣同人類和平相處咗咁多年，至可以繼續保持呢種習性。

島上到處都有標誌寫住： Don't touch wild lives. Don't feed wild lives. They can feed themselves. 人同野生動物咁樣相處，算係見識過喇。最得意有檔賣魚檔，係喺海邊路口。有隻海獅成日企喺檔口，賣魚大嬸幫客人劏魚時，啲劏剩出嚟嘅頭頭尾尾，海獅就會攞嚟食。附近又有塘鵝、海鷗搶埋一份，有時海獅又會大剌剌咁瞓喺魚檔裏面，啲人又唔會趕佢走。個情景實在好趣怪。

不過，加拉巴哥斯島之旅，又唔係個個去得。要幾好水性，識潛水；又要行得路。咁至可以領略上山落海嘅趣味。

完咗加拉巴哥斯島之旅，就飛秘魯首都利馬，再𨍭飛 Cusco。集合另一隊人開始印加古道 Inca Trail 及馬丘比丘 Machupicchu 之旅。

Cusco 係古印加王朝軍事，文化嘅首都。

原來印加王朝只短短百幾二百年，經歷十幾個君主。直至西班牙殖民南美，印加王朝至宣告滅亡。而印加文化則承集成萬年以來，多個文化系統，不斷演化改良而成。呢啲包括佢嘅生活方式，語言，建築，信仰，服式，食物⋯⋯等。王朝可以滅，但係文化就始終保留住。有人話印加文化已經滅絕，我覺得好奇怪。我哋入山區，佢哋仍然講  Quechua 語，著住民族服飾，保留印加紡織方法。當然，隨住1572年，西班牙入侵，帶嚟歐洲文文，再加上都市化。要保留、承傳古文化，絕對唔係一件容易嘅事。

印加文化，信仰大自然，以太陽為萬物之首。每一個印加古城，必定有太陽神廟。而神廟大殿必定東向，迎接南半球夏至第一線陽光。所以又要有天文學智者，識得觀察不同日照時間，以確定神廟位置。神廟及王宮所用石頭，又要由冇雷公咁遠搬嚟，在在需要高超嘅計算及工藝技術。好奇怪，印加文化居然冇文字！佢嘅歷史，只能夠靠其他證據去推算出嚟。例如口述故事，墓葬、陶器上嘅璧畫等。而家有語言專家，嘗試將Katras 用拉丁字母拼音，變成書寫文字。好可惜，因為現實關係，新一代已經主要講西班牙話，亦羞於講 Quechua，因為唔想畀人話係鄉下仔。情況就好似而家嘅上海話一樣嘞。

呢個印加古道行之旅好特別，古道中，行經好多古印加遺址，全部都係受保護歷史文物。每行到一處遺址，大家都圍埋一齊，聽領隊講歷史。領隊唔單止係帶路人，喺講歷史時，你體會到佢哋敬仰自己歷史文化嘅態度。我呢個團嘅領隊，經常強調佢係 Mestizo 嘅身分。即係既有傳統古文化背景，亦有西班牙現代文化知識嘅人。其實文化承傳就係咁嘅一回事，邊有一種文化一成不變由頭玩到尾，梗係取長補短，互相滲透，不斷演化進步。

呢四日三夜，其實唔易捱，尤其係第二日，要由三千上到四千二嘅山㘭。唔係因為高山反應，而係上極唔完嘅長命斜。跟住再由四千二，急降二千六，絕對係膝頭哥嘅大考驗。再者，我孭住十公斤背囊，係從未試過孭住咁重行遠足。再再者，全團人都係廿零歲。包埋領隊，全體挑夫，年紀我最大。要同全隊人行進節奏趨於一致，需要唔錯嘅體力。我，不負所託，永不落後，而且經常喺前面，算係咁喇。哈哈哈。

真係要講下挑夫 potters，佢哋全部係山區嘅人，當然行得好快，每日喺我哋到步前，佢哋已經搭好晒我哋個人嘅營，每個人嘅睡袋地蓆及小量個人用品，都已經擺喺營裏面。有一個廚房營，此時，廚房已經開始工作。仲有一個餐廳營，營內又枱又櫈。當我哋到步時，桃夫又會拍晒手掌，以作鼓勵。每人營前都有一盤暖水，洗面洗手洗腳，服侍周到得好離譜。每餐又湯又主菜又甜品又飲品，仲要照顧埋嗰啲素食者。每人嗰份餐都精心佈置，每一個小節都照顧得到。主廚又著白色廚師制服，仲戴埋廚師高帽。喺山區可以咁樣食餐，夫復何求。

我烏啄啄揀咗呢個日子行古道，其實古道每年都有段時間封閉維修，到三月一日至重開。我哋行嘅時候，啱啱先至重開咗三日。三月又係雨季，第二日下午已經開始落雨，跟住都落下停下咁。到第四日朝早要上Sun Gate，嗰度係睇到成個馬丘比丘古城嘅高點。又係一段長命斜，行到乜都曉。上到去，四圍都係霧，連附近嘅山，乜都睇唔到，馬丘比丘，已墮五里霧中。我企喺懸崖，望住一片白茫茫，好失望，行得咁辛苦，居然唔可以居高臨下影張相，真係想喊。你揀雨季嚟，係咁嘅喇。

好彩落到古城，濃霧時聚時散。點都吼到啲時機，影番張標準馬丘比丘古城相嘅。都箅好彩喇。

印加古道，馬丘比丘古城之行，算係圓滿結束，我就好滿意自己嘅表現嘞。

自己再逗留利馬四日，預期會做嘅：遊舊城、搭飛機仔睇 Nasca Lines、踩單車等活動都一一做到，其實都好滿意。

又係好似厄瓜多爾咁，之前，我對秘魯一無所知，只知佢個名同「秘撈」同音。今次喺利馬，做咗兩次專人導遊，一次單車遊海岸，一次行路遊舊城，對秘魯、利馬，多咗啲啲認識。

我先前喺面書話：利馬係一個富裕，有禮貌嘅城市。我冇講錯，係我嘅親身體驗，但絕唔係全部嘅事實，導遊 Carolina 帶我上教堂頂一個高塔，嗰度360度望晒利馬城區。同總統府及其他高級建築物只一河之隔，就見到貧民區，呢啲係由鄉村出城市揾機會嘅移民。貧窮又造成各種社會問題，呢啲係多數大城市都行過嘅路。所以，導遊都叫遊客唔好過河。

我而家見到嘅旅遊區，井井有條，遊人行得放心，其實只係十年八年間嘅事。之前城市街角充滿罪惡，幫會、街童一堆一堆聚集，行人都提心吊膽。呢個政府上場，大刀闊斧，令城市呢一角換然一新， Carolina 話唔祈奢望可以好快改革成個國家，希望有十年八年時間，國家可以逐漸進步起嚟。我都祝佢，快啲成功。

唔講唔知，原來利馬係一個沙漠城市，基本上係唔會落雨，呢度係冇人帶雨具出街，連啲屋頂都係平坦坦，毋需做斜流水。雖然沙漠，但係水頭充足。水源就來自東面嘅安迪斯山脈上面嘅冰川。

有一樣嘢，不可不知，原來秘魯食物 Peruvian Food 都頗具名氣。我以為一定係受西班牙影響。原來秘魯菜受中國菜影響好大，呢度嘅中國餐館就叫 Chifa，我相信係廣東鄉下話炒飯嘅音轉。咁點解華人會出現喺秘魯。當秘魯進入共和時期，政府就解放黑奴，引致農耕大量缺乏人力，所以華人就畀人用低廉工資，賣豬仔嚟咗秘魯，陰差陽錯，亦因此將華人烹調方法帶入秘魯。

至於其他我所聽聞嘅歷史及小故事，我會喺旅遊日記一一提及。

呢次旅行，上山落海，又凍又熱，又有體力要求，又有政治社會歷史教育⋯⋯。真係多姿多彩。

以往旅行，我可以即刻寫到日記。今次每日都好攰，成個月寫得幾篇。我會開個新 blog ，將旅行日記放入去。到時再會通知各位。

再噏過

ps. 今日返雪梨，落機等行李轆出嚟，等極都等唔到。我真好彩，一不離二，行李再次失蹤。去報室，佢哋知道行李冇上機，答應聽日送番畀我。⋯⋯⋯！

再噏過

嚤囉