2012.01.15 雙英寶島選票决雌雄，豬狼香江齋噏等收風

2012.01.15 

雙英寶島選票决雌雄，豬狼香江齋噏等收風。

柯拿，大家好，

蔣家大小姐外遊個多月後，終於喺上周四飛返雪梨啦。有機會可以生活喺不同文化嘅家庭，實在係好難得嘅經驗。返家後，佢滔滔不絕咁講佢嘅經歷，佢對當地人及社會嘅體會，好有趣。睇樣，一有機會，佢會再去。可惜，佢欠缺盤川，只係喺朋友屋企附近活動，唔去得好遠。憾事也。努力揾多啲$，下次去多啲地方。

井少質疑我上篇講周記數目，我係數目白痴，唔識數。唔駛急，我將會同你朝見口晚見面成個月，到時，成個folder比你睇。如果有邊篇你錯過，再睇番都唔遲喇。

真係好感動，好感動。噚晚就坐喺電視機前，睇住美麗島島民，點樣利用自己神聖嘅一票，選出自己認住嗰隻英。廣華出世嗰隻英羸咗之後，不忘贊賞自己嘅對手，並叫自己黨友開心幾日就夠，最緊要做好島民比佢哋嘅責任。輸咗嗰隻客家英，亦好有風度咁恭喜對手，並承認自己做得唔夠，未能說服島民去投佢哋信任票。更負起敗選嘅責任，辭任黨主席。當然亦不忘叫執政黨做好本職，為島民服務。最後重叫死忠份子繼續支持，下一屆將捲土重來，再戰江湖。

勝利一方嘅島民開心到喊，輸咗一方嘅就失望到喊。全島大喊一餐後，第二日，返工開舖，照常生活，藍綠島民，照舊嘻嘻哈哈互動。留番四年後，再唇槍舌劍，互不相讓，再決雌雄。

國家嘅政黨輪替，再唔係飛機大炮、你死我活。呢個景象，幾千年神州歷史，可曾見過？（btw，多數美麗島島民，並唔認為自己同炎黄二帝有任何lah lung，this is another story）

我喺袋鼠國，見到嘅，就係咁上下喇。諷刺得很，愈趨民主化嘅美麗島，第一屆民選總统，居然係岩里正男李登輝。第二、三屆係台灣之子啊扁。但係咁樣，並無損民主美麗島之名。After all，呢啲都係人民嘅選擇，冇啊爺睇住，冇啊嫲幫你預選。好壞自己受番。唔駛驚，我堅信人民會總結好嘅、壞嘅經驗，再作出明智選擇。

不過，世界咁大，都係香港好，港人毋須費神，啊爺啊嫲，預先選兩件乖孫過你揀。不過，得兩件揀，慌死你覺得「寡」，揾多兩件民主派頭面人物，經由街坊撳電腦民主程序產生嘅候選人，一齊參加選舉，咁夠晒民主元素喇啩。香港人又交足戲，又報紙民調，又電台烽煙，假作真特真亦假，認真合作。既然玩得咁開心，啊爺啊嫲應承各位，以後照辦煮碗，千秋萬世。

至於萬里神州，更加毋需各位老百姓粗心，講明唔搞多黨輪替啦。大家只須努力提高GDP，盡老百姓責任，交齊各級政府嘅賦稅。至於邊位太子做主席，邊位秘書做總理，佢哋四四六六拆掂之後，就會出皇榜公告天下，屈時，各位老百姓就地除喇。……唔使傷腦筋，真幸福。

唔同人有唔同取向，有人博埋條命都要爭取自主權，有人鍾意揾明君，有人……？

咁，唐山、美麗島、東方之珠，你likie邊度呢？

再噏過

嚤囉